TULI na ku yoyela mu mavu a ku sula na visoti, ngeci mukemuo ci hasa ku pua ca cikalu ku uana ciyulo. Ambe nga tua kala na cimo ciyulo, tu hasa ku ci zimbalesa mu vuasi. Ngue mu ya muesa Mbimbiliya, vika vi hasa ku tu kuasa ku uana ciyulo ca vusunga kaha ca ya ye? Kaha vati tu hasa ku kuasa vakuetu ku lingamo?

Ku kala mu ciyulo ca vusunga, noho nga muntu a li na ku livua ku lembama na ku niungiua. Tua tondeka ku kala na vavusamba va cili, kaha ca seho ya kama, ua pua kavusamba ka Njambi. Vati honi tu hasa ku uana viose-evi?

Masiko na vitume via Yehova via pua via cili kuli yetu ntsimbu yose. Mu tue ku a ononoka, tue ku muesa ngecize tua kulahela muli Yehova kaha tu tonda ku likuata vusamba neni. (Yelemiya 17:7, 8; Tiango 2:22, 23) Kaha Yehova a ka suena ha hiehi netu na ku tu hana ciyulo ca mu visinganieka. Isaya 32:17 nguayo: “Kaha cipanga ca vuviuke ci ka pua ciyulo; Na ku-pangesa ca vuviuke, ku-holoka na ku-tsiliela ku miaka yose.” Tu hasa lika ku uana ciyulo ca vusunga nga tu ononoka Yehova ku cizango cetu.​—Isaya 48:18, 19.

Yehova ua tu hana naua vuana vua seho mu ku tu kuasa ku uana ciyulo ca ya ye. Vuana vuaco vua pua sipilitu santu.​—Vilinga 9:31.

Kapostolo Paulu ua handekele ngueni ciyulo ca pua mutamba ua “muhako ua sipilitu.” (Ngalata 5:22, 23) Mu ku linga ciyulo ce ku tunda ku sipilitu santu ya Njambi, nga tu tonda ku uana ciyulo, tua pande ku tavesa sipilitu santu i tu tuamenene. Vati tu hasa ku lingamo?

Ha katete, tua pande ku tanda lizi lia Njambi ntsimbu yose. (Visamo 1:2, 3) Mu tue ku singanieka na civando ha viuma vi tu na tanda, sipilitu  santu ye ku tu kuasa ku tantekeya visinganieka via Yehova ku tuala ha vimpande via ku liseza-seza. Ca ku muenako, tu ka lilongesa vati ue ku niunga ciyulo ceni kaha omo lia vika ciyulo ca kala na seho ya kama kuli ikeye. Nga tu ononoka vi tue ku lilongesa mu Mbimbiliya, tu ka kala na ciyulo mu muono.​—Visimo 3:1, 2.

Ca mu civali, tua pande ku vundila sipilitu santu ya Njambi. (Luka 11:13) Yehova ua kulahesa vaze ve ku mu vundila vukuasi ngueni: “Ciyulo ca Njambi cize ca hiana mana ose, ci ka niunga mitima yenu na visinganieka vienu muli Kilistu Yesu.” (Filipu 4:6, 7) Nga tu suena na ku kala mu hiehi na Yehova na ku kulahela mu sipilitu yeni, a ka tu hana ciyulo ca vusunga mu visinganieka.​—Loma 15:13.

Mbimbiliya ya kuasa vavengi ku alulula miono yavo, kaha mu ntsimbu ino va kala mu ciyulo na Njambi, ciyulo ca mu visinganieka, na ku kala mu ciyulo na vakuavo. Mu njila ika honi va alulula miono yavo?

Tele kanda va lilongese vusunga, vamo vamuanetu va vamala na vampuevo va puile vakua vutenu na luozi. Vunoni va lihakela kapandi ka ku aluluka. Lelo lino lino va kala honi na ngozi, lukakatela na ciyulo na vakuavo. * (Talenu ha litota.) (Visimo 29:22) Tu talenu vati muanetu David na umo ndumbuetu Rachel va aluluile miono yavo mu cifua eci.

David, tele kanda eze mu vusunga, ua puile mukua ku paya vakuavo na ku handeka na vusoko vueni mezi a ku pihia ntsimbu yose. Vati ua uanene ciyulo? David ngueni, “Nja putukile ku ononoka vitume via mu Mbimbiliya mu muono uange, kaha mu ku lingamo, kasingimiko ha kati kange na vavusoko vuange ka putukile ku laana.”

 Rachel ua puile mukua vutenu omo lia ku kolela ha kati ka vakua vutenu. Ivene ngueni: “Ambe matangua ano, kasi nje ku pinda na visinganieka via vutenu, muomu vose ku ndzivo yetu va puile vakua vutenu.” Vika via kuasele Rachel ku uana ciyulo? Ivene naua ngueni: “Ku vundila na ku kulahela muli Yehova.”

David na Rachel va na pu lika vimueso vivali, via vantu va uana ciyulo omo lia ku ononoka vitume via mu Mbimbiliya na ku kulahela mu vukuasi vua sipilitu santu. Mua vusunga, vutuhu tua kala mu mavu a vutenu, tu hasa ku kala na ciyulo ca mu visinganieka. Kaha eci ci ka tu kuasa ku litombola na vavusoko vuetu kaha na vamuanetu mu cikungulukilo. Cikuavo naua Yehova ua tu leka ngueni, “kalenu na ciyulo na vantu vose.” (Loma 12:18) Vuno citava mpundu ni? Omo lia vika tua pande ku lihakela kapandi ka ku yoya mu ciyulo na vakuetu?

Mu cipanga cetu ca ku ambulula, tue ku ambulula muzimbu ua Vuangana vua Njambi. (Isaya 9:6, 7; Mateo 24:14) Vavengi va lema muzimbu uetu kaha ve ku u tava. Ngeci ka ve ku livua naua vungoco ni ku ivua matoto omo lia visoti vi ve ku mona ha mavu. Vunoni va kala honi na lulavelelo lua vusunga ku lutue, kaha eci ce ku va lingisa ku tonda ku “lengeya ciyulo.”​—Visamo 34:14.

Vutuhu ngoco, kati vose va lema muzimbu uetu, vamo ve ku u lema lika mu nima ya ntsimbu. (Yoano 3:19) Vunoni ambe vantu va tave ni va viane, Njambi ue ku tu hana sipilitu yeni. Ngeci mukemuo ca pua ca cili ku pua vakua ciyulo na kasingimiko nga tuli mu ku ambulula. Muomu mu ku lingamo, tue ku kava eci cimamuna ca Yesu: “Kaha omo mu kovela mu ndzivo, i sambelelienu. Kaha nga vakua ndzivo ize va na viuka cili, ciyulo cenu ci hetemo: vunoni nga ka va viukile kaha ciyulo cenu ci hilukile kuli enu vavene.” (Mateo 10:11-13) Nga tu ka muesa eci cifua, muose-muo mu va ka linga ni ku handeka vantu, etu tu ka tualelelaho ku pua vakua ciyulo. Kaha ka tue ku suva ngecize halumo tangua tu ka kala na vukovelelo vua ku ambuluila vantu vaco ku lutue.

Kaha naua tue ku pua vakua ciyulo mu ku muesa kasingimiko nga tu handeka na vakua nguvulu, ambe nga ve ku luisa cipanga cetu. Ca ku muenako, mu cimo cifuti ca mu Afrika, nguvulu ya tu vindikile ku tunga Vindzivo via Vuangana. Vamuanetu va tantekeyele ngecize va pandele ku seteka ku vula citanga caco mu ciyulo. Ngeci va vundilile umo muanetu ua puile laza misionaliu mu cifuti cavo, a ka handeke na Muluua u ya tuma nguvulu ya cifuti cavo mu ku pangela ku Londres, Inglaterra, linga a ka seteke ku mu lomboluela ngecize cipanga ca Vakaleho va Yehova ca pua ca ciyulo.

Muanetu u va tumineko ngueni: “Mu nja kovelele mu seketa ya vutambuilo, nja muene ngecize mpuevo ua keleho ua puile mukua ku handeka lilimi li nja lilongesele mu cifuti cavo mu nja puile misionaliu. Nja mu muenenene ku vizalo. Ngeci nja mu menekele mu lilimi liavo. Ua komokele, na ku nji hula ngueni: ‘Vika mu neza mu ku linga?’ Nja mu kumbuluile na kasingimiko nguange nji tonda ku handeka na Muluua ua cifuti cavo. Ngeci ua mu sanene ku telefone, kaha uezile, neni ua nji meneka vene mu lilimi liavo. Mu nima yaco, ua nji halakanene vuino mu nja mu lomboluelele via vipanga vietu via ciyulo.”

Mu nima ya ku halakana uze muanetu, Muluua uevuisisile vuino cipanga cetu kaha cizindo ceni kuli etu ca tepulukile. Mu nima ya ntsimbu, nguvulu ya cifuti cavo ya tavesele Vakaleho ku tunga Vindzivo via Vuangana. Vamuanetu va viukilile cikuma! Mua vusunga eci ci muesa ngecize mu tue ku singimika vantu tue ku tuala ciyulo ku lutue.

Matangua ano, vangamba va Yehova va kala mu citungu ca mu lutsilielo, ni nguetu ve ku lemesa Yehova mu ciyulo. Tu vose tu hasa ku vueza ku ciyulo caco mu ku linga cose linga tu kale na ciyulo mu miono yetu. Kaha tu hasa ku kala na vusunga ngecize tuli na ku ya Yehova ku mutima. Kaha mu mavu a aha, Yehova a ka tu hana ciyulo ca ya ye.​—2 Petulu 3:13, 14.