Ise ya Lehovoame, Solomone, ua puile muangana mu Isaleli mu miaka 40. (1 Vamiangana 11:42) Mu nima ya ku tsa ca Solomone, Lehovoame ua fumine ku Yelusalema ku ya ku Sekeme linga a ka pue muangana. (2 Mizimbu 10:1) Vuno ua vuile vuoma vua ku suana ha vuangana ni? Ise Solomone ua tsimanene omo lia ku hiana ca mangana eni. Ngeci mukemuo, Lehovoame neni ua pandele ku muesa nga ua kala na mana a ku manusula visoti via vikalu.

VaIsaleli va muene ngecize muangana Lehovoame ali na ku va pakesa, ngeci va tumineko tunganda, nguavo: “Iso ua kaluuisile mukambo uetu: vuovuno ngoco vene hehuisa ove vipanga via ku kaluua via iso, na mukambo ueni ua ku lema u a tu hakele, kaha tu ka ku pangela.”​—2 Mizimbu 10:3,4.

Lehovoame ua kele na cihangula ca cikalu ca pandele ku linga. Nga a tava ku lizi lia vantu, kaha neni na vusoko vueni na vose va kele na ku pangela ku nganda, nga ka va kele naua na vimo vi va kele na ku va lingila vantu. Vunoni, nga a viana vi va vundilile vantu, kaha va mu alulukila. Vika ua hanguileho? Ha katete, ua ci ka simutuilile na vakuluntu vaze va kuasele ise. Va mu lekele a halakane ku vantu. Vunoni ua ka simutuilile naua na vakuavo vakuendze, kaha ua hanguile ku yandesa vantu. Ua va lekele, ngueni: “Tata ua lemuuisile mukambo uenu, vunoni ange nji ka vuezelelako: Tata ua mi longesele na makote, vunoni ange nji ka mi longesa na manieue”ni nguetu na makote a vimbimbo.​—2 Mizimbu 10:6-14.

Mua mono vi tu hasa ku lilongesaho ni? Lelo mu lukungulukilo lua Yehova mua kala vakuluntu vavengi vaze va pangela Yehova mu miaka ya ingi kaha va hasa ku tu kuasa ku linga vihangula via cili. Tu muesenu mana mu ku va halakana.​—Yombi 12:12.

Ngeci Lehovoame ua kunguluile civunga ceni ca masualale va luise ize miyati ya lisino. Vunoni, Yehova ua tumine kapolofeto Semaya a ka va mamune ngueni: “Kati mu ka kandukeko, cipue ku lua na vana va nokuenu vana vaIsaleli: hilukenu muntu  uose ku ndzivo yeni, muomu Cuma eci ca fumu kuli ange.”​—1 Vamiangana 12:21-24. *​—Talenu litota.

Vuno ca puile ca casi kuli Lehovoame ku halakana kuli Yehova ni? Vika vantu ve ku singaniekele ku tuala hali muangana uavo ua muha? Vutuhu ua va zuzuisile ngueni a ka va yandesa na ‘makote a vimbimbo’ vunoni ka hasele ku linga na mumo muahi ku tuala ha lisino li va lingile! (Setekesenu 2 Mizimbu 13:7.) Vunoni, muose-omuo mu va mu singaniekele vantu, muangana na masualale veni “va halakanene ku lizi lia Yehova na ku hiluka na kuya kuavo, ngue mu lia tumbuile lizi lia Yehova.”

Vika tu lilongesaho? Ambe nga vantu va tu tsopa, vunoni ku ononoka Njambi ntsimbu yose ca pua ku muesa mana. Njambi a ka tu vezikisa ntsimbu yose, nga tu pua vakua ku ononoka.​—Ndeutelonomi 28:2.

Vuno Lehovoame va mu vezikisile omo lia ku ononoka ceni ni? Lehovoame ua tualeleleho ku pua muangana ua miyati ya Yunda na Mbenjamini, kaha ua tungile vimbonge via vihia ku vihela viaco. Kaha ua hanguileho vimo vimbonge via “kolesele cikumakuma.” (2 Mizimbu 11:5-12) Vunoni ca seho ya kama, ua ononokele masiko a Yehova. Mu ku linga, vuangana vua miyati likumi vua putukile ku lemesa tumponia, vavengi va kele na ku tundako mu ku ya ku Yelusalema linga va kuase Lehovoame ku ku lemesa ca vusunga. (2 Mizimbu 11:16, 17) Mua vusunga mu ku linga Lehovoame uononokele Yehova, vuangana vueni vua kaniamene.

Omo vuangana vua Lehovoame vua kaniamene, ua lingile vimo kati vikevio. Ua likelele ku ononoka Yehova na ku putuka ku lemesa vanjambi va makuli! Vika honi via mu lingisilemo? Vuno vanaye vaze ka va puile vaIsaleli vakevo va mu suangeleyele ni? (1 Vamiangana 14:21) Yanini, vunoni cifuti cose ca kavele lungano lueni lua ku pihia. Ngeci Yehova ua tavesele Muangana Sisake ua Ingito a kuate vimbonge via vingi mu vuangana vua Yunda. Evi via puisilemo mpundu vutuhu Lehovoame ua kaniamesele vimbonge viaco!​—1 Vamiangana 14:22-24; 2 Mizimbu 12:1-4.

Visoti via livuezelele omo Sisake uezile na civunga ceni mu kua ku luisa Yelusalema, mua kele na ku sikila Lehovoame. Ha ntsimbu yaco, kapolofeto Semaya ua hanene Lehovoame na vamiata veni ou muzimbu ua ku tunda kuli Njambi: “Mu na nji seza, ngoco vene ange naua nji na mi eca mu livoko lia Sisake.” Vati ua lingile Lehovoame omo lieci ku sungamesa ca Yehova? Ua tavele cimamuna caco na mutima uose! Mbimbiliya nguayo: “Kaha vamiata va Isaleli na muangana va likonkekele kaha nguavo: Yehova ikeye mukua vuviuke.” Ngeci Yehova uohielele Lehovoame, kaha Yelusalema ka va i nongesele.​—2 Mizimbu 12:5-7, 12.

Mu nima yaco, Lehovoame ua tualeleleho ku sika mu vuangana vua Yunda. Tele kanda a tse, ua hele vuana vua vingi ku vana veni. Halumo ua lingilemo linga vakevo kati va ka alulukile muanaye Aviya, uze ue ku mu suanene ha vuangana. (2 Mizimbu 11:21-23) Mu ku lingamo, Lehovoame ua muesele mana ku hiana muze mua lingile ku vunike.

Vutuhu Lehovoame ua lingile vimo via cili, vunoni Mbimbiliya nguayo: “Ua lingile cize ca cipi.” Omo lia vika? “Muomu ka hakele mutima ueni mu ku lengeya Yehova.” Ngeci ka ile Yehova ku mutima.​—2 Mizimbu 12:14.

Vika tu hasa ku lilongesa ku muono ua Lehovoame? Vintsimbu vimo uononokele Njambi. Kaha ua lingile vimo via cili ku vangamba va Yehova. Vunoni ka kele na vusamba vua ku kaniama na Yehova kaha ka kele na cizango ca kama ca ku ya Yehova ku mutima. Ngeci ua likelele ku linga via cili na ku putuka ku lemesa vanjambi va makuli. Halumo mu hasa ku lihula nguenu: ‘Vuno omo Lehovoame ua tavele ku-sungamesa ca Yehova, ua lingilemo muomu ua liveyele mpundu ku visevuka vieni kaha ua tondele ku ya Njambi ku mutima? Ni ua lingilemo lika muomu vakuavo va mu lekele ku lingamo?’ (2 Mizimbu 11:3, 4; 12:6) Ku vukuluntu, Lehovoame ua putukile naua ku linga via vipi. Ua litepele cikuma na kukueni Muangana Ndaviti! Muomu  vutuhu Ndaviti ua sevukile vintsimbu vimo. Vunoni ua liveyele na mutima uose vipi via kama via lingile. Kaha ua lemene Yehova na ku lemesa ca vusunga na muono ueni uose.​—1 Vamiangana 14:8; Visamo 51:1, 17; 63:1.

Tu hasa ku lilongesa via vingi ku muzimbu ou ua mu Mbimbiliya. Vose ve ku lihakela kapandi ka ku tondela vavusoko vize via va kambela na ku kuasa vakuavo, ve ku linga vuino. Vunoni linga tu ye Yehova ku mutima, tua pande ku mu lemesa mu cifua ca tava ikeye, kaha na ku likuata vusamba vua kama neni.

Linga tu vi puisemo tua pande ku lema cikumakuma Yehova. Ngue muze mu tue ku sambeya tuhia mu ku vuezaho vikuni, tue ku sambeya cilemo cetu kuli Yehova mu ku lilongesa lizi lieni ntsimbu yose, ku hilula hali vize vi tue ku tandamo, na ku kakatela mu ku vundila. (Visamo 1:2; Loma 12:12) Cilemo caco ci ka tu sindiya ku ya Yehova ku mutima mu viose vi tue ku linga. Cikuavo naua, ci ka tu kaniamesa ku liveya mu vusunga nga tua sevuka, na ku vundila Yehova linga a tu ecele. Kaha ka tu ka pua ngeci mua Lehovoame vunoni tu ka kakatela ku ku lemesa ca vusunga.​—Yunda 20, 21.