Mua vi Tantekeyele Ni?
Vuno ku Ntsimbu i va Sonekele Mbimbiliya Vantu va Kele na ku Pangesa Mateve mu ku Tunga Mato Ni?
Mateve
VANTU vavengi va tantekeya ngecize ku Ingito ya laza vantu va kele na ku soneka cikuma ha mapapelo a mateve ni makove. VaNgelengu na vakua Loma navo va kele na ku soneka ha mateve. * Vunoni vantu va vandende lika va tantekeya ngecize muila ua mateve va kele naua na ku u pangesa mato.
Vifua vivali via mato a mateve a va uanene mu imo mbumbo ya ku Ingito
Miaka i tuvakana 2.500 ku nima, kapolofeto Isaya ua sonekele ngueni, Vantu va kele mu “sinia lize lia vandonga va ku Etiopia” va tumine “tunganda ha mema a kalunga mu mato a makove.”—Isaya 18:1, 2; Yele. 51:32.
Mbimbiliya ya pua livulu lia huimina Njambi, ngeci mukemuo vakua ku lilongesa Mbimbiliya ka ci va komouesa ku tantekeya ngecize vakua ku hinda mu vingundu va uana vukaleho vu muesa ngecize ku laza vantu va kele na ku panga mato a mateve. (2 Tim. 3:16) Vukaleho vuka honi va uana vakua ku hinda mu vingundu? Va uana vukaleho vua vuingi vua muesa ngecize mu Ingito ya laza va kele na ku panga mato a mateve.
VATI VA KELE NA KU TUNGA MATO A MATEVE?
Ha vivumbe via vimbumbo via vakua Ingito va sona-sonaho cifua ci va kele na ku tetelemo mateve na ku a panga mato. Vamala va kele na ku teta visati via muila uaco na ku u kuta mu visua. Kaha va kele na ku pandakana visua viaco na ku vi kutila naua hamo lika noho vi na kolo ngo-ngo-ngo. Visati via mateve, via kala na vimbango vitatu. Ngeci mukemuo, nga muntu a vi kutila hamo, vie ku lizika kumo. Kuliya na limo livulu, mato a mu Ingito a hasele ku heta ha 17 m mu vulaha, kaha a kele na vakua ku zavula va heta ku 10 ni 12 nkala sinia.— A Companion to Ancient Egypt.
Civumbe ca ku Ingito ha va sona-sona vantu vali na ku panga mato a mateve
OMO LIA VIKA VAKUA KU TUNGA MATO VA KELE NA KU PANGESA MATEVE?
Va kele na ku lingamo muomu mateve akeo a lanene cikuma mu viana via Nilu. Cikuavo naua, mato a mateve a puile a asi ku a panga. Ambe vene mu va putukile vantu ku pangesa mavaya mu ku panga mato a kama, ci soloka ngecize vakua ku tsiha vantsi na viyambi, kasi va tualeleleho ku pangesa mateve mu ku panga mato a andende na mavombo.
Vantu va pangesele mato a mateve mu miaka ya ingi. Umo mukua ku soneka ua kaNgelengu ua lizina Plutarch ua yoyelele ku ntsimbu ya Vakua Kilistu va katete, ua muesele ngecize, ku sekulu ya ku livanga na ya mu civali, vantu vavengi kasi va kele na ku pangesa mavombo a mateve.
^ cin. 3 Muila ua mateve ni makove, ue ku soka mu viana via mema na mu visali. Vulaha vua muila uaco, vu hasa ku heta ku 5 m kaha mpimo co ha 15 cm ku ntsina.
