1-2. Iya ue ku kuasa ndongesi ua Mbimbiliya a hete ku mbatizimu?

UMO NDUMBUETU ua lizina Amy ua ku Fiji, ngueni: “Nja lemene vi nja kele na ku lilongesa mu Mbimbiliya. Nja tantekeyele nguange vua puile vusunga. Vunoni nja hasele lika ku alulula muono uange na ku kola mu lutsilielo, mu nima ya ku putuka ku likata na vamuanetu mu cikungulukilo.” Muzimbu ua ndumbuetu Amy, ua tsindika hali eci cuma ca seho: Linga ndongesi ua Mbimbiliya a hase ku kola mu lutsilielo na ku heta ku mbatizimu, ue ku hitukila ha vukuasi vua vamuanetu vose mu cikungulukilo.

² Uose mukua ku ambulula, a hasa ku kuasa ku ku kola ca cikungulukilo. (Efe 4:16) Ndumbuetu Leilani ua pua vupioneiro ku Vanuatu, ua handekele ngueni: “Cimo cisimo nguaco, kuatoku na mukueni lika liove ci hongomoka. Mu ku mona cange, cisimo caco ca likuata naua na cipanga ca ku puisa vantu vandongesi. Vintsimbu via vingi, linga muntu eze mu vusunga ua tondeka vukuasi vua cikungulukilo cose.” Linga kanike a kole vuino na ku pua muntu ua cili, ua hitukila ha vukuasi vua vavusoko, vavusamba na valongisi ku sikola. Ava vantu ve ku mu kuasa mu ku mu kaniamesa, na ku mu longesa viuma via seho mu muono. Na vuno vene, vakua ku ambulula, va hasa ku mamuna, ku kaniamesa na ku pua lungano lua cili ku vandongesi va Mbimbiliya linga va kole mu lutsilielo na ku heta ku mbatizimu.—Visi. 15:22.

3. Vika mua lilongesa ku mezi a Ana, Daniel na Leilani?

³ Omo lia vika muanetu ue ku endesa cilongesa ca Mbimbiliya, na pande ku viukilila, nga vamuanetu vakuavo mu cikungulukilo va kuasa ndongesi yeni? Ndumbuetu Ana ua pua pioneiro ua ku lifuila ua ku Moldavia ngueni: “Nga ndongesi ua Mbimbiliya a ci li ku vuputukilo vua ku kola ceni mu lutsilielo, ca pua ca cikalu cikuma ku  muntu umo lika ku puisamo viose via tondeka ndongesi uaco.” Muanetu Daniel ua pua pioneiro ua ku lifuila ku Moldavia neni ua handekele ngueni: “Vintsimbu via vingi, vakuetu vakua ku ambulula ve ku handeka mezi eku kuata ku mutima ua ndongesi ua Mbimbiliya aze kanda nji ci singanieke yange.” Ndumbuetu Ana ua muesa naua vusunga vukuavo ngueni: “Cilemo na ndzandzu ive ku muesa vamuanetu ku ndongesi, vi hasa ku mu kuasa ku nongonona ku lemesa ca vusunga.”—Yoa. 13:35.

4. Vika tu simutuila mu cilongesa cino?

⁴ Vunoni, mu hasa ku lihula nguenu, ‘Vati honi nji hasa ku kuasa ndongesi ua Mbimbiliya ku kola mu lutsilielo nga kati yange nje ku endesa cilongesa ceni?’ Tu hilulenu ha viuma vi tu hasa ku linga nga va na tu lania kuli umo muanetu a ka endesa cilongesa ca Mbimbiliya na vika tu hasa ku linga nga ndongesi na putuka ku kunguluka. Tu hilula naua vati vakuluntu mu cikungulukilo va hasa ku kuasa vandongesi va kole mu lutsilielo na ku heta ku mbatizimu.

5. Mutamba uka mua kala nauo nga va na mi lania ku ka kavangeya cimo cilongesa ca Mbimbiliya?

⁵ Ku tuala ha ku endesa cilongesa ca Mbimbiliya, mulongisi ikeye ua kala na kapandi ka kama ka ku kuasa ndongesi yeni evuisise Lizi lia Njambi. Nga muanetu uaco na mi lania ku ka kavangeya cilongesa ca kendesa, mutamba uenu ua pua ku pua mukuasi. (Ekel. 4:9, 10) Vika honi mu hasa ku linga, linga mu hase ku pua mukuasi ua cili kuli muanoko ali na ku endesa cilongesa?

6. Nga va na mi lania ku ka kavangeya cilongesa ca Mbimbiliya, vati mu hasa ku puisamo citume ca ku Visimo 20:18?

⁶ Nenu liviukisilenu cilongesa caco. Ha katete, hulenu ivene cilongesa a mi lekeko vimo ku tuala hali ndongesi. (Tandenu Visimo 20:18.) Mu hasa ku mu hula nguenu: “Kulihi ua kolela ndongesi kaha vati ua yoya? Ha cilongesa cika mu ka mu longesa lelo? Vutumbe vuka mu tonda ku ka puisamo mu cilongesa ca lelo? Kuli vimo vi nja pandele ku linga ni ku nja pandele ku linga cipue ku handeka mu tu ka lilongesa neni ni? Vika vi hasa ku kaniamesa ndongesi linga a kole mu lutsilielo?” Vutuhu mulongisi ka pandele ku leka muanetu uaco mizimbu ka ya mu pandele, vunoni mizimbu yose ya mu lekako i hasa ku kuasa cikuma. Ndumbuetu Joy ua pua misionaliu, ue ku simutuila viuma via cifua eci nga na lania mukuavo mukua ku ambulula aye neni ku cimo cilongesa. Ndumbuetu Joy ngueni: “Ku simutuila viuma via cifua eci, ce ku kuasa mukuetu u nji nai neni a muese seho kuli ndongesi kaha na ku tantekeya vika a hasa ku linga mu ku kuasa linga cilongesa ci tovale.”

7. Omo lia vika mua pande ku livuahesela nga va na mi lania mu ka kavangeye cimo cilongesa?

⁷ Nga va na mi lania ku kavangeya cimo cilongesa, ci ka pua ca cili nga nenu mu livuahesela vuino cilongesa caco. (Ezela 7:10) Muanetu Daniel u tu na tumbuile laza, ngueni: “Nje ku vuahelela cikuma nga mukuetu u nji ya neni, neni na  livuahesela cilongesa. Muomu ku lingamo, ce ku mu kuasa ku handeka vinguli via cili mu ntsimbu ya cilongesa.” Cikuavo naua ndongesi, a ka hasa ku nongonona ngecize mu vose mu na liviukisila vuino, kaha eci ci ka pua lungano lua cili kuli ikeye. Ngeci mukemuo, ambe nga ka mua hasele ku liviukisila vuino-vuino, vunoni uanenuko ka ntsimbu ka ku hilula ha vintsina via kama via cilongesa.

8. Nga va na mi lania ku vundila, vati mu hasa ku linga mangana civundilo cenu ci kuate ndongesi ku mutima?

⁸ Vivundilo via pua mutamba ua seho mu ku endesa vilongesa. Ngeci mukemuo, nga va na mi lania ku vundila, singaniekenu vua lumo viuma vi mu hasa ku ka kundika mu civundilo. Nga mu lingamo, mu ka hasa ku handeka viuma vitondeka mpundu, mu civundilo. (Visa. 141:2) Ndumbuetu Hanae ua ku Japão, kasi ue ku vuluka vivundilo via kele na ku linga umo ndumbuetu ua kele na kuya na mulongisi ueni mu ku mu endesela cilongesa. Hanae ngueni: “Nja hasele ku nongonona ngecize ndumbuetu uaco ua kele na vusamba vua kama na Yehova, kaha nange nja tondele ku mu tambuluisa. Cikuavo naua, nja livuile naua ngecize ua nji lema cikuma mua kele na ku tumbula lizina liange mu vivundilo.”

9. Kuliya na Tiango 1:19, vika mu hasa ku linga, mangana mu pue mukuasi ua cili nga va na mi lania ku ka kavangeya cimo cilongesa?

⁹ Kuasenu mulongisi mu ntsimbu ya cilongesa. Ndumbuetu Omamuyovbi ua pua pioneiro ua ku lifuila ku Nigeria, ngueni: “Mukuasi ua cili, ua pua uze ue ku tuala mana ku cilongesa. Kaha naua ue ku kuasa na vinguli via seho ku cilongesa, vunoni ke ku handeka mua kama omo lia ku tantekeya ngecize kati ikeye ali na ku tuamenena cilongesa caco.” Vati mu hasa ku tantekeya ntsimbu ika na vika mua pande ku handeka nga muli na ku kavangeya cimo cilongesa? (Visi. 25:11) Halakanenu vuino ku ku simutuila ca mulongisi na ndongesi. (Tandenu Tiango 1:19.) Ku halakana vuino, ci ka mi kuasa ku uana vukovelelo vua cili vua ku kuasa. Vunoni mua pande ku kala na liano. Ca ku muenako, ka ca puile ca cili ku handeka mua kama, ni ku vatuisila mulongisi nga a handeka, cipue ku sangumuna cipande ceka ka ca likuatele na cilongesa. Vunoni nga mu handeka imo nguli ya ihi ni kamo ka cimueso, cipue cihula, mu hasa ku kuasa ku tavulula vuino ntsina ya kama i muli na ku lilongesa. Vintsimbu vimo, mu hasa ku livua ngecize ka kuesi via vingi vi mu tondeka ku vuezelela ku cilongesa. Vunoni, ambe ku sangala lika ndongesi na ku mu muesa seho, ci ka mu kuasa cikuma ku kola mu lutsilielo.

10. Vati viuma vi mua lihita navio mu muono, vi hasa ku kuasa ndongesi?

¹⁰ Va lekenuko vi mua lihita navio mu muono. Nga mua mono ngecize ku ligamo ci hasa ku kuasa ndongesi, mu lekenuko vati mua lilongesele vusunga, vati mua vulile cimo citanga, ni vati Yehova ua mi kuasa mu muono. (Visa. 78:4, 7) Halumo muzimbu uenu, ukeuo mpundu ua na tondekele cikuma ku ivua ndongesi. U hasa ku kaniamesa lutsilielo lieni ni ku mu kuasa ku tualelelaho ku kola mu lutsilielo na ku mbatizimu. Kaha ci hasa naua ku mu kuasa, vati a hasa ku vula cimo ceseko ci ali  na ku lihita naco. (1 Pet. 5:9) Muanetu Gabriel ua ku Brazil, kaha ua pua pioneiro, a vuluka vukuasi vua tambuile mua kele na ku lilongesa Mbimbiliya, ngueni: “Mu nja kele na ku ivua vi va lihitile navio vamuanetu, nja muene ngecize nkuma cili vene Yehova ue ku mona visoti vi tue ku lihita navio. Kaha nja muene ngecize, nga vakevo va hasele ku vi vula, nange nji vi hasa.”

11-12. Omo lia vika tua pande ku tambula na mavoko avali nkala ndongesi ue ku iza mu ku kunguluka?

¹¹ Linga ndongesi a hase ku kola mu lutsilielo na ku mbatizimu, na pande ku kunguluka ntsimbu yose na ku lilongesa via vingi ku viuano. (VaHe. 10:24, 25) Vintsimbu via vingi mulongisi ikeye ue ku lania ndongesi a ku kunguluke netu lua katete. Vunoni nga na putuka ku kunguluka, tu vose tu hasa ku mu kaniamesa linga a tualeleleho ku lingamo. Mu vinjila vika honi tu hasa ku mu kaniamesa?

¹² Puenu na ku tambula vandongesi na mavoko avali. (Loma 15:7) Nga ndongesi a livua ngecize tu na mu tambula na mavoko avali ku ciuano, citava a ka tualelelaho ku kunguluka. Ca ku hona ku hianesamo, tambulenu ndongesi na ndzolela kaha na ku mu lekesa ku vamuanetu vakuavo. Kati mu likanuuele ku mu kuasa ni ku simutuila neni, muomu halumo mulongisi ueni na kotokela ni ali na ku puisamo cimo cipanga ceka mu Ndzivo ya Vuangana. Halakanenu vuino vi ali na ku handeka ndongesi kaha mu hakenu seho. Vika vi hasa ku izamo nga tu tambula ndongesi na mavoko avali? Halakanenu muzimbu ua muanetu Dmitrii u va mbatizile imo miaka ku nima kaha lelo lino ua pua mukua ku kuasa vipanga. Muanetu Dmitrii ngueni: “Litangua lia katete li nja ile ku ciuano, njemanene ha mbandza oku nji na lisosomua. Vunoni umo muanetu uezile mu ku handeka nange na ngozi, na ku kovela nange mu Ndzivo ya Vuangana. Kaha vamuanetu va vengi vezile mu ku nji meneka. Nja komokele cikuma. Ngeci nja tondele nga viuano vi kaleko matangua ose. Na kumo kueka kuahi ku nja muene via cifua cize.”

13. Vati vilinga vienu vi hasa ku kuata kuli ndongesi?

¹³ Puenu lungano lua cili. Vilinga vienu via cili, vi hasa ku hana vusunga kuli ndongesi ngecize na uana vulombelo vua vusunga. (Mat. 5:16) Muanetu Vitalii ua pua pioneiro ku Moldavia ua handekele ngueni: “Ku mona kakesi, visinganieka na vilinga via vakuetu mu cikungulukilo, ca nji hele vusunga ngecize Vakaleho va Yehova va pua mpundu Vakua Kilistu va vusunga.”

14. Vati lungano luenu, lu hasa ku kuasa muntu a tualeleleho ku kola mu lutsilielo?

¹⁴ Linga a puisemo via tondeka mu ku mu mbatiza, ndongesi na pande ku pangesa vize vie ku lilongesa linga a hete ha kuya ku mbatizimu. Ka ce ku pua ca casi ntsimbu yose. Vunoni nga ndongesi a mona vukuasi vu mue ku uana mu ku niunga vitume via mu Mbimbiliya neni a kevua cizango ca ku mi tambuluisa. (1 Kol. 11:1) Tu hilulenu ha lungano lua Hanae u tu na tumbuile laza. Ua handekele ngueni: “Cimo cisimo nguaco, ku  ambulula nkala livindi. Na vuno vene yoyesi ya vamuanetu na vandumbuetu ikeyo ya puile livindi lia seho ya viuma vi nja kele na ku lilongesa. Nja limuenenene vati nji hasa ku kaniamesa vakuetu, ku vecela na ku va muesa cilemo. Ntsimbu yose va kele na ku handeka viuma via cili lika ku tuala ha vakuavo. Ngeci nange nja tondele ku va tambuluisa.”

15. Vati Visimo 27:17, ya tu kuasa ku mona seho ya kala ha ku likata na ndongesi ua Mbimbiliya nga na putuka ku kunguluka?

¹⁵ Likatenu na ndongesi. Omo ndongesi a tualelelaho ku kunguluka nenu tualelelenuho ku mu muesa seho. (Filp. 2:4) Ca ku muenako, citava mu lihakele kapandi ka ku mu tantekeya vuino. Ca ku hona ku likovelesa mu vimpande ka via mi pandele, mu hasa ku mu sangala mu nkala viuma via cili vi ali na ku linga mu ku alulula muono ueni. Na ku mu ihula vati ci li na ku enda cilongesa ceni ca Mbimbiliya, vati vali va vusoko, ni vipanga. Ku simutuila viuma via cifua eci, ci hasa ku mi lingisa ku likata neni. Kaha nga mu likata na ndongesi, mu ka mu kuasa ku kola mu lutsilielo na ku heta ku mbatizimu. (Tandenu Visimo 27:17.) Muanetu Hanae, lelo lino ua pua honi pioneiro ua ntsimbu yose. Ku tuala ha ntsimbu ya putukile ku kunguluka, muanetu Hanae ua vulukile ngueni: “Mu nja putukile ku kala na vavusamba mu cikungulukilo, nja kele na ku lavelela ntsimbu ya viuano na ndzolela, kaha nja kele na ku kunguluka cipue vene nga nji na hono. Ku likata na vavusamba vange va vaha, ca kele na ku njiya cikuma ku mutima, kaha ca nji kuasele ku tsiha vusamba na vaze ka va kele na ku pangela Yehova. Nja tondele ku likata cikuma na vamuanetu kaha na Yehova. Ngeci nja hanguile ku nji mbatiza.”

16. Vika vikuavo vi mu hasa ku linga mu ku lingisa ndongesi a livue ku zituka mu cikungulukilo?

¹⁶ Omo ndongesi a tualelelaho ku kola mu lutsilielo, mu kuasenu a livue ngecize neni ua pua mutamba ua cikungulukilo. Mu hasa ku lingamo, mu ku mu muesa vuhuanga. (VaHe. 13:2) Muanetu Denis ua ku Moldavia, ue ku vuluka mu ntsimbu ya puile ndongesi ua Mbimbiliya ngueni: “Vintsimbu via vingi, nange na mpueyange, va kele na ku tu lania ku vamuanetu mu ku sikama. Vamuanetu va kele na ku tu leka vati Yehova ua va kuasa. Evi via tu kaniamesele na ku tu hana vusunga mpundu ngecize tu tonda ku pangela Yehova, kaha tua lavelela muono ua cili ku lutue.” Nga ndongesi ua Mbimbiliya na pu mukua ku ambulula, mu hasa ku mu lania a tuhuke nenu mu lihia. Muanetu Diego ua ku Brazil, ngueni: “Vamuanetu vavengi va kele na ku nji lania ku tuhuka navo mu lihia. Eyi ikeyo ya puile njila ya cili cikuma ya ku va tantekeya vuino. Ku tuhuka navo ca nji longesele via vingi, na ku nji kuasa ku kolesa vusamba vuange na Yehova na Yesu.”

17. Vati vakuluntu mu cikungulukilo va hasa ku kuasa vandongesi va Mbimbiliya?

¹⁷ Puenu na ku va silako imo ntsimbu. Enu vakuluntu, cilemo na seho i mue ku muesa ku vandongesi va Mbimbiliya, ci hasa ku va kuasa ku kola  mu lutsilielo na ku heta ku mbatizimu. Ngeci mukemuo, puenu na ku uana ntsimbu ya ku simutuila na vandongesi va Mbimbiliya ku viuano. Va ka mona ngecize mua va haka seho nga ka mu suvu lizina liavo, cikuma-kuma mu va ka putuka ku kumbulula ku viuano. Vuno citava mu alulule programa yenu linga mu pue na ku uana ntsimbu ya ku tuhuka na vamo vamuanetu nga vaya mu ku endesa vilongesa ni? Ku linga evi, ci hasa ku ka kuasa ndongesi mu cifua ka mua lavelelele nenu vavene. Ndumbuetu Jackie ua pua pioneiro ku Nigeria ngueni: “Cingi ca vandongesi vange, ve ku komoka mu ve ku tantekeya ngecize muanetu u nji nai neni mu ku endesa cilongesa cavo, ua pua mukuluntu mu cingulukilo. Umo ndongesi ua handekele ngueni: ‘Pastor uetu ka hasa ku vilinga na limo litangua liahi. Ikeye, ue ku meneka lika vampite kaha naua nga va na mu fuete!’” Lelo lino ndongesi uaco ua putuka ku kunguluka.

18. Vati vakuluntu va hasa ku puisamo kapandi ka va va kundika ku Vilinga 20:28?

¹⁸ Puenu na ku kuasa valongisi va Mbimbiliya va pue vatongue na ku va kaniamesa. Vakuluntu, mua kala na kapandi ka kama ka ku kuasa vakua ku ambulula va kale na vutongue mu ku ambulula na mu ku endesa vilongesa via Mbimbiliya. (Tandenu Vilinga 20:28.) Nga umo muanetu, ali na ku likanouela ku endesa cilongesa oku nenu ha muli, citava mu lihane mu ku cendesa yenu. Ndumbuetu Jackie u tu na tumbuile ku nima ngueni: “Vakuluntu ve ku nji hula ku sua kumo via vandongesi vange. Kaha nga ci li na ku nji kaluuila ku endesa vilongesa, ve ku nji hana vimamuna via cili.” Vakuluntu mu cikungulukilo va hasa ku kuasa cikuma, mu ku kaniamesa vamuanetu vakua ku endesa vilongesa via Mbimbiliya va tualeleleho. (1 Tes. 5:11) Ndumbuetu Jackie ua vuezeleko ngueni: “Nje ku ivua ndzolela ya kama nga vakuluntu va nji kaniamesa na ku nji leka ngecize va haka seho ya kama ku vipanga vi nje ku linga. Mezi aco eku nji kuasa cikuma, eku nji vuisa ngue muntu a nua mema a ku tontola nga kuli ntuima. Visangala viavo vie ku nji kaniamesa na ku vueza ku ndzolela yange omo nji tualelelaho ku endesa vilongesa viange via Mbimbiliya.”—Visi. 25:25.

19. Ndzolela ika tu hasa ku kala nayo tu vose?

¹⁹ Ambe nga mu ntsimbu ino ka tuesi na cilongesa ca Mbimbiliya, tu hasa ku kuasa vantu ku kola mu lutsilielo. Ca ku hona ku handeka mua kama, tu hasa ku kuasa muanetu ali na ku endesa cilongesa ca Mbimbiliya mu ku handeka mu vuihi vize vi hasa ku kuasa ndongesi. Tu hasa naua ku likata na vandongesi nga va neza ku Ndzivo ya Vuangana, na ku pua malungano a cili kuli vakevo. Vakuluntu va hasa ku kaniamesa vandongesi, mu ku sezako imo ntsimbu ya ku va kuasa, kaha naua va hasa ku kaniamesa valongisi mu ku va longesa ku kala na vutongue na ku va sangala. Mua vusunga, tue ku ivua ndzolela ya kama mu ku tantekeya ngecize tua lingileko umo mutamba, cipue ua undende mu ku kuasa muntu a pangele Tatetu ua muilu, Yehova.