1. Kuliya Mateo 24:9, omo lia vika ka tua pandele ku komoka nga vakua mavu va tu zinda?

YEHOVA ua tu tangele na vuhasi vua ku lema vakuetu kaha na ku ivua cizango ca ku tu lema. Ngeci mukemuo, nga muntu a tu zinda, tue ku ivua ku vavala ku mutima halumo vene na ku ivua liova. Ca ku muenako, ndumbuetu Georgina ua ku Europa, ngueni: “Mu nja kele na miaka 14, vanana va nji zindile omo lia ku pangela Yehova. Nja livuile ngue citenga ca ku mbila kuti kaha kati nji muntu ua cili. * Muanetu Danylo co ua sonekele ngueni: “Mu va nji tinguile, ku nji tuka, na ku nji zuzuisa ku masualale omo lia ku pua Mukaleho ua Yehova, nja vuile liova na ku livua ngue nji cilinge ca ngoco.” Vizindo via cifua eci vie ku tu vavala ku mutima vunoni ka vie ku tu komouesa. Muomu Yesu ua vi polofetele laza.—Tandenu Mateo 24:9.

2-3. Omo lia vika vandongesi va Yesu va va zinda?

² Vakua mavu va zinda Vakua Kilistu. Omo lia vika? Muomu ngeci mua Yesu ‘kati tu vakua mavu.’ (Yoa. 15:17-19) Ngeci mukemuo, vutuhu tua singimika vanguvulu, tue ku viana ku va lemesa ni ku lemesa vitantekeyeso viavo. Tue ku lemesa lika Yehova. Tue ku hakuila naua mpoko yeni ya ku sika vantu, ize ye ku luisa cikuma Satana na vakua “mbuto” yeni. (Njeni. 3:1-5, 15) Tue ku ambulula ngecize Vuangana vua Njambi vukevuo lika vu ka manusula visoti via vantu, kaha tangua vu ka nongesa vose vakua ku vu luisa. (Ndan. 2:44; Ku-So. 19:19-21) Muzimbu uaco ua pua ua cili kuli Vakua ku konkama vunoni ua ku vihia kuli vakua vupi.—Visa. 37:10, 11.

³ Cikuavo naua va tu zinda omo lia ku yoya muaya vitume via Njambi. Vitume viaco via liseza cikuma-kuma na vitume via ku  vihia via vakua mavu. Ca ku muenako, vavengi ve ku hakuila ku meso a vantu vilinga via niengo vize via lingisile Njambi ku nongesa Sondoma na Ngomola! (Yun. 7) Mu ku linga tue ku hakuila vitume via mu Mbimbiliya vize ka via litombuele na vilinga viaco, vantu vavengi ve ku tu paya na ku tu tumbula ku pua vakua ku kaluuisa muono!—1 Pet. 4:3, 4.

4. Vifua vika vie ku tu kaniamesa nga vantu va tu zinda?

⁴ Vika vi hasa ku tu kolesa nga vantu va tu zinda na ku tu tuka? Tua pande ku kala na lutsilielo lua ku kaniama ngecize Yehova a ka tu kuasa. Ngeci mua ntelo, lutsilielo lue ku tu kuasa ku zima “mivi yose ya tuhia ize ya mukua vupi.” (Efe. 6:16) Vunoni ku tundisako lutsilielo, tua tondeka vikuavo naua. Tua tondeka cilemo. Omo lia vika? Muomu cilemo “ka ce ku tenuka.” Vunoni ce ku fuika na ku likolesa mu viuma viose via ku vihia. (1 Kol. 13:4-7, 13) Tu hilulenu honi vati ku lema Yehova, ku lema vamuanetu, kaha na ku lema vitozi vetu ci hasa ku tu kuasa ku kolesa mu vizindo.

5. Vati ku lema Ise ca kaniamesele Yesu?

⁵ Ku vutsiki vua ku manusuila tele kanda va mu tsihe ku vitozi, Yesu ua lekele vakua ku mu kava, ngueni: “[Nja] lema Tata, kaha ngue omo Tata ua nji sikile mukemuo vene nje ku linga.” (Yoa. 14:31) Ku lema Yehova ca kaniamesele Yesu linga a kolese mu vieseko via mu lavelele ku lutue. Mua vusunga ku lema Yehova, netu ci hasa ku tu kuasa mu njila eyi vene.

6. Kuliya na Loma 5:3-5, vati vangamba va Yehova ve ku livua ku mutima ku tuala ha ku va zinda kuli vakua mavu?

⁶ Ku lema Yehova ce ku kuasa vakua ku mu lemesa ku kolesa, nga vali na ku va luisa. Ca ku muenako, omo vapostolo va va vindikile ku ambulula kuli vakua mpunga ya kama cikuma ya vaYundeya, cilemo cavo kuli Njambi ca va lingisile “ku ononoka kuli Njambi ku hiana ku vantu.” (Vili. 5:29; 1 Yoa. 5:3) Eci cilemo ka ce ku hua, ce ku kaniamesa naua vamuanetu lelo lino. Cingi cavo, vali na ku kolesa vutuhu ve ku va luisa ku vinguvulu via ngolo na vukenia. Ngeci mukemuo, ku tu zinda kuli vakua mavu ka ce ku tu hiluisila mu nima, vunoni ca pua civezikiso kuli yetu.—Vilinga 5:41; tandenu Loma 5:3-5.

7. Vati tua pande ku linga nga vavusoko va tu luisa?

⁷ Cimo ca vieseko via kama vi tu hasa ku lihita navio, ca pua ku tu luisa ku vavusoko vuetu. Mu tue ku putuka ku muesa seho ku vusunga, vamo vavusoko vuetu ve ku singanieka nguavo tuli na ku sevuka. Vakuavo va hasa ku singanieka nguavo tu na zaluka. (Setekesenu na Mako 3:21.) Omo lievi va hasa ku putuka ku tu luisa na vukenia. Vunoni ku luisa caco ka ca pandele ku tu komouesa. Muomu Yesu ua handekele ngueni: “Vakua ndzivo ya muntu vakevo va ka pua vakua nkole yeni.” (Mat. 10:36) Vutuhu ngoco, cipue nga vavusoko vuetu va tu luisa ni ku tu zinda, ka tue ku va puisa vitozi vetu. Vunoni mu ce ku kola cilemo cetu kuli Yehova, cilemo cetu ku vantu naco ca pande ku kola. (Mat. 22:37-39) Vutuhu ngoco, ka tue ku likela ku ononoka masiko na vitume via mu Mbimbiliya, linga tuye vantu ku mitima.

8-9. Vika via kuasele umo ndumbuetu ku kolesa vutuhu va mu luisile cikuma?

⁸ Ndumbuetu Georgina, u tu na tumbuile laza, ua kolesele vutuhu va mu luisile cikuma kuli vanaye. Ndumbuetu Georgina ua lomboluele ngueni: “Nange na vanana tua putukile ku lilongesa Mbimbiliya na Vakaleho va Yehova. Vunoni mu nima ya vingonde 6 mu nja tondele ku putuka ku kunguluka, vanana va alulukile. Mu nima ya ntsimbu nja nongonuene ngecize, va putukile ku likata na vakua ku alulukila vusunga ngeci va kele na ku pangesa vinguli viavo mu ku nji luisa. Kaha va putukile honi ku nji tuka, ku nji niukangeya mu vinkambu, ku nji tekenia ha milivu kaha na ku mbila mikanda yange. Vunoni mu nja puisile miaka 15 va nji mbatizile. Vanana  va setekele ku nji vindika ku pangela Yehova, mu ku nji tuala ku imo ndzivo ku va kele na ku tuala vanike va vampuevo va ku tenguka. Ku ndzivo yaco, kua kele vantu va tenguka na viuma ngeci mua vidroga na vilinga vikuavo vi va vindika ku nguvulu. Ku luisa ce ku pua ca cikalu cikuma nga ci li na ku tundilila ku muntu uze tele nga na pande ku tu lema na ku tu niunga.”

⁹ Vika via kuasele ndumbuetu Georgina ku kolesa? Ivene ngueni: “Litangua li va putukile ku nji luisa vanana likelio li nja manusuile ku tanda Mbimbiliya mu vutuntu. Kaha nja tavele na mutima uange uose ngecize nji na uana vusunga. Cikuavo naua, nja likuatele vusamba vua kama na Yehova. Nja kele na ku vundila ku sua kumo kuli Yehova kaha ua kele na ku kumbulula vivundilo viange. Mu nja ka kele ku ndzivo yaco, omo ndumbuetu ua nji laniene ku ndzivo yeni tu ka lilongese Mbimbiliya. Vunoni mu ntsimbu yose eyi, vamuanetu na vandumbuetu va kele na ku nji kaniamesa ku Ndzivo ya Vuangana. Va nji puisile mutamba ua masoko avo, kaha nja limuenenene ha toma ngecize Yehova ua kala na ngolo ku hiana vitozi vetu, va pue veya ni veya.”

10. Lukulahelo luka tua pande ku kala naluo muli Yehova Njambi?

¹⁰ Kapostolo Paulu ua sonekele ngueni, ka kuesi cuma na cimo cahi “ci hasa ku tu hangununa ku cilemo ca Njambi, cize ci li muli Kilistu Yesu muangana uetu.” (Loma 8:38, 39) Cipue nga tu yanda mu ntsimbu imo, vunoni Yehova kasi a ka kala ku mukulo uetu mu ku tu lembezieka na ku tu kaniamesa. Muzimbu ua ndumbuetu Georgina ua muesa ngecize, Yehova ue ku tu kuasa naua ku hitila mu vusoko vuetu vua mu lutsilielo.

11. Vati cilemo ca lomboluele Yesu ku Yoano 15:12, 13, ca kuasele vandongesi veni? Hanenu cimueso.

¹¹ Ku vutsiki vua ku manusuila tele kanda a ci tse Yesu ua vuluisile vandongesi veni via ku lilema umo na mukuavo. (Tandenu Yoano 15:12, 13.) Ua tantekeyele ngecize cilemo ca ku lihana ce ku va kuasele ku likuata kumo na ku kolesa, ambe nga vakua mavu va va zinda. Tu hilulenu ha muzimbu ua vakua cikungulukilo ca ku Tesalonika. Vakua Kilistu va mu cikungulukilo caco, va putukile ku va luisa tunde vene ha ca putukilile ku pua cikungulukilo. Vunoni vamuanetu va mu cikungulukilo caco, va sile lungano lua cili lua lukakatela na cilemo. (1 Tes. 1:3, 6, 7) Paulu ua va kaniamesele va tualeleleho ku muesa cilemo mu ‘ku lana cikumakuma.’ (1 Tes. 4:9, 10) Cilemo ce ku va vuisile cizango ca ku lembezieka vaze va li mu vusiua na ku kuasa vakua  ku zeya. (1 Tes. 5:14) Va kavele vimamuna via va hele Paulu mu mukanda ua mu civali ua va tumine, mu nima ya umo muaka. Ua va lekele ngueni: ‘Cilemo cavo kuli umo na mukuavo ca kele na ku likulisa’ ni nguetu ku sumpuoka. (2 Tes. 1:3-5) Cilemo cavo ca va kuasele ku kolesa mu visoti na ku luisa.

12. Vati vamuanetu va limuesele cilemo umo na mukuavo mu cimo cifuti ca hitile ndzita?

¹² Tu hilulenu lungano lua muanetu Danylo u tu na tumbuile laza na mpueyeni. Mu ya katukile ndzita mu mbonge yavo va tualeleleho ku likungulula, ku tonda vinjila via ku ambuluilamo, na ku lipukuila na vamuanaye tu via-ku-lia tu va kele na ku uana. Kaha tangua limo, masualale vezile ku ndzivo ya muanetu Danylo na mata. Ivene ngueni: “Kaha va nji kakateyele nji viane ku pua Mukaleho ua Yehova. Mu nja vianene ku lingamo, va nji tinguile, na ku nji piluila. Vunoni ka va tondele ku nji loya mpundu, ku nji zuzuisa lika, ngeci cilianga ca nji hitile ha mutue. Mu va ile va nji sikile nguavo, tangua lieka mu va keza va ku limona ku mivila na mpueyange. Vunoni vamuanetu va tu londekele mu imo kumboyo tua tinina ku mbonge yeka. Na limo litangua liahi, nji ka suva cilemo ci va nji muesele vaze vamuanetu. Kaha vamuanetu va ku mbonge i tua ile, va tu tambuile na mavoko avali. Va tu hanene via-ku-lia na ku nji kuasa ku uana ndzivo ya ku kala na vipanga! Ngeci mu nima ya ntsimbu, netu tua hasele ku tambula vamo Vamuanetu va kele na ku tina kuze ku mbonge ya ndzita.” Eyi mizimbu, ya muesa ngecize ku lema vamuanetu ce ku tu kuasa ku kolesa mu vizindo.

13. Vati sipilitu santu ye ku tu kuasa ku kolesa mu ku pangela Yehova, cipue nga vantu va tu zinda?

¹³ Yesu ua lekele vakua ku mu kava va leme vitozi vavo. (Mat. 5:44, 45) Vuno ca casi ku lingamo ni? Na limo litangua liahi! Vutuhu ngoco, citava tu lingemo na vukuasi vua sipilitu santu ya Njambi. Sipilitu santu ye ku ima muli yetu, cilemo, lukakatela, ngozi, ku konkama, na ku lipokuesa. (Ngal. 5:22, 23) Evi vifua vie ku tu kuasa ku kolesa mu vizindo. Cingi ca vantu, ve ku likela ku tu luisa, muomu yaliavo, mpueyavo, muana ni muntu u va lihata neni ua va muesele evi vifua. Kaha cingi cavo ve ku heta ha ku pua vamuanetu. Ngeci mukemuo, nga ce ku mi kaluuila ku lema vaze va mi zinda omo lia ku pangela Yehova, vundilenu sipilitu santu. (Luka 11:13) Kaha kalenu na vusunga vuose ngecize, ku ononoka Yehova ca pua ca cili kuli yetu ntsimbu yose.—Visi. 3:5-7.

14-15. Vati Loma 12:17-21, ya kuasele ndumbuetu Yasmeen ku muesa cilemo kuli yalieni vutuhu ua kele na ku mu luisa cikuma?

 ¹⁴ Tu hilulenu lungano lua ndumbuetu Yasmeen. Mua putukile ku lilongesa vusunga na ku pua Mukaleho, yalieni ua singaniekele ngueni va na mu sevuisa, ngeci ua setekele ku mu vindika ku pangela Njambi. Ua lingilemo mu ku mu tuka na ku mu sendela vavusoko, vakuluntu va igreja na umo cilozi, linga va ku mu zuzuise na ku mu vangeya nguavo ali na ku tepesa vusoko. Tangua limo, yalieni ua ile na ku Ndzivo ya Vuangana mu ku ka hembelela vituka vamuanetu va kele mu ciuano! Ndumbuetu Yasmeen ua kele na ku lila cikuma ku sua kumo, omo lia ku mu yandesa.

¹⁵ Ku Ndzivo ya Vuangana, Ndumbuetu Yasmeen va kele na ku mu lembezieka na ku mu kaniamesa ku vavusoko vueni va mu lutsilielo. Kaha vakuluntu va mu mamuine ku kava vi ya handeka Loma 12:17-21. (Tandenu.) Ndumbuetu Yasmeen ngueni: “Ca puile ca cikalu ku lingamo. Vunoni nja vundilile vukuasi vua Yehova, kaha nja lihakelele kapandi ka kama ka ku puisamo vitume viaco. Ca ku muenako, omo yaliange ua kele na ku mbila-mbila mazilo mu kuzinia ku cizango, nja kele na ku a komba. Nga a nji tuka nji mu kumbulula vuino, kaha nga a vavala, nja kele na ku mu niunga na ngozi.

16-17. Vika mua lilongesa ku lungano lua Yasmeen?

¹⁶ Yehova ua lunguisile kapandi ka Yasmeen ka ku muesa cilemo kuli yalieni. Ivene ngueni: “Yaliange ua putukile ku nji kulahela cikuma, muomu ua tantekeyele ngecize nja kele na ku handeka vusunga ntsimbu yose. Ngeci ua putukile ku nji halakana na kasingimiko nga tu simutuila via vulombelo na ku tava ku lihamba nange ha ndzivo. Lelo lino, ikeye honi ue ku nji kaniamesa kuya mu ku kunguluka. Muono uetu mu vusoko, u nai cikuma ku lutue, kaha tua yoya honi mu ciyulo. Nja lavelela ngecize, yaliange tangua a ka fukula mutima ueni ku vusunga, na ku lipandakana nange mu ku pangela Yehova.”

¹⁷ Lungano lua ndumbuetu Yasmeen lua muesa ngecize cilemo “ci tsiliela ku viuma viose, ci lavelela viuma viose, ci likolesa ku viuma viose.” (1 Kol. 13:4, 7) Vizindo vi hasa ku pua via kama, kaha naua vie ku vavala ku mutima, vunoni cilemo cikeco ca vi hiana ku ngolo. Muomu ce ku vula mitima ya vantu na ku vuisa Yehova ndzolela. Ngeci mukemuo, cipue nga vitozi va tu zinda tu hasa ku yoya mu ndzolela. Mu njila ika?

18. Omo lia vika tue ku yoya mu ndzolela ci pue nga va tu zinda?

¹⁸ Yesu ua lekele vandongesi veni mu Cimpande ca ha Muncinda ngueni: “Mua vezika, omo  vantu va ka mi zinda.” (Luka 6:22) Ka tue ku hangula ku tu zinda. Kaha ka tua lemene ku tu luisa omo lia lutsilielo luetu. Amba vika honi tue ku vuila ndzolela nga vantu va tu zinda? Talenu vusunga vutatu. Vua katete, ku kolesa cetu ce kuya Njambi ku mutima. (1 Pet. 4:13, 14) Vua mu civali, ku tu luisa ce ku hotola lutsilielo luetu kaha lue ku kaniama. (1 Pet. 1:7) Kaha vua mu citatu, tangua tu ka tambula cilunguiso ca ku hiana ca muono ka ue ku hua.—Loma 2:6, 7.

19. Omo lia vika vapostolo va vuile ndzolela mu va va vetele makote?

¹⁹ Mu nima ya ku sanguka ca Yesu, vapostolo veni va vuile ndzolela ya va lekele ha muncinda. Va va kuatele, ku va veta makote na ku va vindika ku ambulula. Vunoni va vuile ndzolela. Omo lia vika? “Muomu va na viukile ku yanda na ku sahuka omo lizina [lia Yesu].” (Vili. 5:40-42) Va lemene mua kama ntuamena yavo, ku hiana liova li va kele na ku vuila vitozi. Kaha va muesele cilemo cavo, mu ku ambulula muzimbu ua cili ‘ca ku hona ku likela.’ Cingi ca vamuanetu lelo lino, ve ku tualelelaho ku pangela Yehova na lukakatela vutuhu ve ku hita mu visoti via kama. Muomu va tantekeya ngecize Yehova na limo litangua liahi a ka suva vipanga viavo na cilemo ci ve ku muesa ku lizina lieni.—VaHe. 6:10.

20. Vika tu ka simutuila mu cilongesa ci na hatako?

²⁰ Vakua mavu va ka tualelelaho ku tu zinda na ha ku kotoka ca ano mavu. (Yoa. 15:19) Vunoni ka tua pandele ku ivua liova. Ngue mu tu ka mona mu cilongesa ci na hatako, Yehova ‘a ka kolesa, na ku niunga’ vangamba veni va ku ononoka. (2 Tes. 3:3) Ngeci mukemuo, tu tualeleho ku lema Yehova, ku lema vamuanetu, kaha na ku lema vene vitozi vetu. Nga tu kava eci cimamuna tu ka tualelelaho ku likuata kumo, ku kaniamesa lutsilielo luetu, ku hana vumpahu kuli Yehova na ku muesa ha toma ngecize cilemo ca kala na ngolo ku hiana vizindo.