1. Vieseko via cifua cika ve ku lihita navio vangamba va Yehova?

MU LI na ku hita mu ceseko ca cikalu ni? Halumo umo muanetu mu cikungulukilo na mi vulumuina. (Tia. 3:2) Ni halumo vakuenu ku vipanga ni ku sikola ve ku mi tsopa omo lia ku pangela Yehova. (1 Pet. 4:3, 4) Ni halumo vavusoko va li na ku linga cose mu ku mi vindika ku kunguluka, cipue ku lekako vakuenu via lutsilielo luenu. (Mat. 10:35, 36) Nga mu li na ku hita mu ceseko ca kama cikuma, mu hasa ku livua ngecize cili ku lutue ku likela ku pangela Yehova. Vunoni kalenu na vusunga ngecize, ambe mu hite mu ceseko ca ku fua vati Yehova a ka mi hana mana na ngolo i mua tondeka, mu ku kolesa mu cisoti caco.

2. Kuliya na Loma 15:4, vati Lizi lia Njambi li hasa ku tu kuasa?

² Yehova ua lingile cose linga mu Mbimbiliya, mu kale malungano a vati vantu va ku hona ku tantuluka va luile na vieseko. Omo lia vika? Linga tu tambuluise malungano avo. Evi vikevio via tumine Yehova kuli kapostolo Paulu ku vi soneka. (Tandenu Loma 15:4.) Ku tanda mizimbu yaco ci hasa ku tu lembezieka na ku tu hana lulavelelo. Vunoni linga vi tu kuase, ka tua pandele ku lengela lika ha ku tanda Mbimbiliya. Tua pande ku tavesa Mbimbiliya i munge visinganieka vietu na ku tu kuata ku mitima. Ca ku muenako, vati tue ku linga nga tu tonda vukuasi vua ku lua na cimo citanga? Tu hasa ku pangesa evi vinanga viuana: (1) Ku vundila, (2) Ku seteka ku mona, (3) Ku hilula, kaha (4) Ku pangesa vize vi tue ku lilongesa. Tu simutuilenu honi mua ku puisilamo nkala cinanga. * Kaha tu pangesa eci cifua ca ku lilongeselamo mu ku hilula muono ua Muangana Ndaviti na ua kapostolo Paulu.

3. Ntsimbu kanda mu putuke ku tanda Mbimbiliya vika mua pande ku linga, kaha omo lia vika?

 ³ (1) Ku vundila. Ntsimbu kanda mu putuke ku tanda Mbimbiliya, vundilenu Yehova a mi kuase ku lilongesa vimo mu ku tanda cenu. Ca ku muenako, nga mu li na ku tonda vimamuna ku tuala ha cimo citanga, vundilenu Yehova a mi kuase ku uana vitume mu Lizi lieni, vize vi hasa ku mi tuamenena.—Filp. 4:6, 7; Tia. 1:5.

4. Vika vi hasa ku mi kuasa ku mona muzimbu u mu li na ku tanda ku pua ua vusunga mpundu kati visimo via ngoco?

⁴ (2) Setekenu ku mona. Yehova ua tu hana vuana vua ku komouesa vua ku seteka ku mona viuma mu visinganieka vietu lika. Linga muzimbu u mu li na ku tanda mu Mbimbiliya u pue ua vusunga kuli yenu, setekenu ku puisa muntu u mu li na ku tanda ngue yenu mpundu na ku linga ngue mu li ku cihela caco. Setekenu ku mona viuma via muene na ku seteka ku livua ngue mua livuile ikeye ku mutima.

5. Ku hilula ca pua vika kaha vati mu hasa ku lingamo?

⁵ (3) Ku hilula. Ku hilula ca pua ku singanieka vuino ha viuma vi mu li na ku tanda, na ku mona vati viuma viaco via likuata nenu. Ce ku kuasa muntu ku noneka vuino viuma mu visinganieka na ku mu kuasa a vi ivuisise vuino. Ku tanda Mbimbiliya ca ku hona ku i hilula ci na pu ngue ku kala na via ku lia via ku hona ku teleka. Vunoni ku hilula ca pua ngue ku vi teleka amba tu hase ku vi ziva ku tovala. Mu ku mi kuasa ku hilula, mu hasa ku pangesa vihula ngeci muevi: ‘Vika muntu u va tumbula mu muzimbu ou ua lingile mu ku vula citanga ceni? Vati Yehova ua mu kuasele? Vati nji hasa ku pangesa viuma vi nja lilongesaho vi nji kuase ku kolesa mu vieseko?’

6. Omo lia vika tua pande ku pangesa vi tue ku lilongesa?

⁶ (4) Ku pangesa vi tue ku lilongesa. Yesu ua handekele ngueni nga ka tu pangesa vize vi tue ku lilongesa, tu napu ngue yala ua tungile ndzivo yeni ha museke. Vutuhu ua fuitanganene, ndzili yeni ya ile mu ngoco. Omo lia vika? Muomu mu kuezile niondzi na luhundzi, ndzivo yeni ya lundumukile. (Mat. 7:24-27) Na vuno vene, nga tu vundila, tu seteka ku mona na ku hilula ha vize vi tua lilongesa vunoni ka tu vi pangesa, tu li na ku lipakesa ngoco. Muomu nga tu ka hita mu vieseko ni ku tu luisa, ka tu ka hasa ku kolesa. Vunoni mu tue ku lilongesa viuma na ku vi pangesa, tue ku linga vihangula via cili, tue ku kala na ciyulo mu mutima, kaha tue ku kaniamesa lutsilielo luetu. (Isaya 48:17, 18) Tu pangesenu honi evi vinanga viuana vi tua lilongesa mu ku hilula ha muono ua Muangana Ndaviti.

7. Muzimbu uka ua mu Mbimbiliya tu hilula vuovuno?

⁷ Vuno va mi endaho laza vungungu kuli umo kavusoko ni kavusamba ni? Nga mukemuo, ku hilula muono ua Avisalome muana Muangana Ndaviti ci hasa ku mi kuasa. Avisalome uendele ise Ndaviti vungungu na ku tonda ku mu punda vuangana.—2 Sam. 15:5-14, 31; 18:6-14.

8. Vika mu hasa ku linga mangana mu tambule vukuasi vua Yehova?

⁸ (1) Ku vundila. Oku mu singanieka ha muzimbu u mu na tanda, lekenu Yehova vati mu li na ku livua ku mutima ku tuala ha viuma via ku vihia vi va na mi lingi. (Visa. 6:6-9) Mu lekenu mpundu vize vi muli na ku ivua ku mutima. Kaha vundilenu Yehova, a mi kuase ku mona vitume vi hasa ku mi tuamenena mu ku lua na citanga caco.

9. Vati mu hasa ku lombolola mu vuihi viuma via solokele ha kati ka Avisalome na Ndaviti?

⁹ (2) Setekenu ku mona. Setekenu ku mona via lihitile navio Muangana Ndaviti na vati ua livuile ku mutima. Avisalome muana Muangana Ndaviti, a seteka ku linga cose mu miaka ya ingi linga a lingise vantu va mu leme ikeye. (2 Sam. 15:7) Kaha mua na uana vukovelelo vua cili,  Avisalome na tumu vandondzi mu Isaleli yose, linga va ka suangeleye vantu va mu tave ku pua muangana. Avisalome na hasa ku suangeleya Ahitofele umo ua vavusamba va kama va Ndaviti uze ua puile naua mukua ku mu mamuna. Kaha mu nima ya ku lipuisa muangana, Avisalome a tonda ku kuata Ndaviti na ku mu tsiha. Ndaviti oho tele ali na ku vavala. (Visa. 41:1-9) Vunoni Ndaviti va na mu ndemuinako via vungungu vuaco kaha na tina mu Yelusalema. Mu nima ya ntsimbu masualale va Avisalome, va na litulukua na masualale va Ndaviti, Ngeci va na putuka kulua. Kaha masualale va Ndaviti va na vulu na ku tsihila kumo lika Avisalome.

10. Vati ue ku livuile Ndaviti ku mutima?

¹⁰ Aci setekenu honi ku singanieka vati ua livuile Ndaviti mua kele na ku hita mu visoti viose evi. Ndaviti ua lemene Avisalome kaha ua kulahelele muli Ahitofele. Vunoni vose vavali va mu endele vungungu. Va mu vuisile ku vavala ca kama ku mutima kaha naua va tondele ku mu tsiha. Ndaviti nga ua likelele ku kulahela mu vavusamba va lisupile navo, mu ku va singaniekela ngecize navo va na putuka ku kuasa Avisalome mu vusueke. Citava halumo ua singaniekele hali ivene lika kaha ua tondele ku tina mu cifuti lika lieni. Ni nga ua zeyele na ku liecelela. Vutuhu ngoco Ndaviti ka lingile viose evi. Vunoni ua vulile cize citanga ceni. Vika via mu kuasele ku ci vula?

11. Vati Ndaviti ua lingile mu cize cisoti ca cikalu?

¹¹ (3) Ku hilula. Vitume vika mua lilongesa ku muzimbu uaco? Kumbululenu cihula, “Vika ua lingile Ndaviti mu ku likuasa ivene?” Ndaviti ka lekukile mutima na ku putuka ku hava-hava ngoco. Cikuavo naua ka tsile cintsima mu cifua ca ku linga nevi via linga honi viahi, houe. Vunoni ua vundilile vukuasi kuli Yehova na vukuasi vua vavusamba veni. Kaha naua ua puisilemo vuasi vutumbe vua lingile. Vutuhu va mu endele vungungu, vunoni Ndaviti ka likelele ku kulahela vakuavo ni ku kala na nkulundundu. Ua tualeleleho ku kulahela muli Yehova na mu vavusamba veni.

12. Vika ua lingile Yehova mu ku kuasa Ndaviti?

¹² Vati Yehova ua kuasele Ndaviti? Mu ku tondesesaho vuino, mu ka mona ngecize, Yehova ua hele ngolo kuli Ndaviti ya ku kolesa mu cize citanga. (Visa. 3:1-8 na mezi a helu) Yehova ua vezikisile vihangula via Ndaviti. Kaha naua ua kuasele vavusamba va Ndaviti mu va kele na ku lua linga va niunge muangana uavo.

13. Vati mu hasa ku tambuluisa Ndaviti nga umo muntu na mi vulumuina? (Mateo 18:15-17)

¹³ (4) Ku pangesa vi mue ku lilongesa. Lihulenu nguenu, ‘Vati nji hasa ku tambuluisa Ndaviti?’ Mua pande ku kala na vuasi mu ku seteka ku manusula citanga caco. Kaha kuliya na cifua ci vili na ku endelamo viuma, mu hasa ku pangesa cimamuna ca hele Yesu ku Mateo kapitulu 18, cipue ngue mu va ci soneka mpundu ni ku kava lika citume caco. (Tandenu Mateo 18:15-17.) Vutuhu ngoco, kati mu tavese matoto a mi lingise ku linga vihangula via vuasi-vuasi ca ku hona ku vi hilula vuino. Vunoni mua pande ku vundila Yehova a mi kuase ku lembama mutima na ku mi hana mana a mua tondeka mu ku manusula vuino citanga caco. Kati mu likele ku kulahela mu vavusamba venu. Vunoni tavenu vukuasi vuavo. (Visi. 17:17) Kaha ca seho ya kama, kavenu vimamuna via mi hana Yehova ku hitila mu lizi lieni.—Visi. 3:5, 6.

14. 2 Timoteo 1:12-16; 4:6-11, 17-22, i hasa ku mi kaniamesa mu vitanga vika?

¹⁴ Vuno vavusoko vali na ku mi luisa ni? Vuno mua kala mu cifuti ci va vindika cipanga cetu ni? Nga mukemuo ku tanda 2 Timoteo 1:12-16 na 4:6-11, 17-22, ci hasa ku mi kaniamesa. * Paulu ua sonekele ou mutamba ua visoneka tele ali mu kamenga.

15. Vika mu hasa ku vundila kuli Yehova?

 ¹⁵ (1) Ku vundila. Ntsimbu kanda mu putuke ku tanda evi vinimbu, lekenu Yehova cisoti cenu na vati mpundu ci li na ku mi vuisa ku mutima. Vundilenu Yehova a mi kuase ku nongonona vitume vi va tumbula mu muzimbu ua visoti via lihitile navio Paulu. Kaha na ku mu vundila naua a mi kuase ku mona vati mu hasa ku pangesa vitume viaco mu ku lua na citanga cenu.

16. Mu vuihi, vati mu hasa ku lombolola citanga ca Paulu?

¹⁶ (2) Setekenu ku mona. Setekenu ku mona ngue yenu mu li na ku hita mu citanga ca Paulu. Paulu ali mu malienge mu kamenga ka ku Loma. Vutuhu ua hitaho laza mu kamenga, vunoni hano ali na vusunga ngueni vuovuno va mu tsiha. Vamo vakuavo va kele na ku enda neni va na mu sevunuka, kaha ikeye naua na zeye.—2 Tim. 1:15.

17. Vati ue ku lingile Paulu?

¹⁷ Paulu nga ue ku talele ku nima na ku singanieka ngueni, nga ka puile Mukua Kilistu ua ntuima halumo nga ka va mu tualele mu kamenga. Cikuavo naua, nga ue ku vuililile nkulundundu vamala va ku muhato ua Asia muomu va mu tinine. Ni vene ku likela ku kulahela muli vavusamba veni. Vunoni Paulu ka lingile viose evi. Omo lia vika ua tualeleleho ku kulahela mu vavusamba veni na ku lavelela ngecize Yehova a ka mu lunguisa?

18. Vati Paulu ua luile na citanga ca kele naco?

¹⁸ (3) Ku hilula. Kumbululenu eci cihula, “Vika ua lingile Paulu mu ku likuasa ivene?” Vutuhu tele na tantekeya ngueni vuovuno va mu tsiha, Paulu ka suvile cuma ca seho ya kama, ni nguetu ku hana vumpahu kuli Yehova, kaha ua tualeleleho ku tonda mana a ku kaniameselamo vakuavo. Ua kulahelele muli Yehova na ku vundila ku sua kumo. (2 Tim. 1:3) Kaha ka tualele cikuma mana kuli vaze va mu sezele, vunoni ua muesele ku santsela ca kama ku vukuasi vua kele na ku tambula kuli vavusamba vueni vaze va tualeleleho ku mu kuasa. Cikuavo naua Paulu ua tualeleho ku lilongesa Lizi lia Njambi. (2 Tim. 3:16, 17; 4:13) Kaha ca seho ya kama, ua kele na vusunga vua ku sula ngandza ngecize, Yehova na Yesu va mu lema. Ka va mu sile, kaha ve ku mu lunguisile naua omo lia lukakatela lueni mu vipanga vi va mu kundikile.

19. Vati Yehova ua kuasele Paulu?

¹⁹ Yehova ua lunguile vua lumo Paulu ngecize, tangua va ka mu luisa omo lia ku pua Mukua Kilistu. (Vili. 21:11-13) Vati Yehova ua mu kuasele? Ua kumbuluile vivundilo via Paulu, kaha mu nima ya ntsimbu ua mu hanene ngolo. (2 Tim. 4:17) Paulu ua kele na vusunga ngecize, tangua a ka tambula cilunguiso cize ca fuitanganenene. Yehova ua lingisile naua vavusamba va Paulu linga va mu kuase.

20. Vati tu hasa ku tambuluisa lutsilielo lua muesele Paulu ku Loma 8:38, 39?

²⁰ (4) Ku pangesa vi mua lilongesa. Lihulenu nguenu, ‘Vati nji hasa ku tambuluisa Paulu?’ Ngeci mua Paulu, tua pande ku lavelela ngecize tangua va ka tu luisa omo lia lutsilielo luetu. (Mako 10:29, 30) Linga tu hase ku kolesa mu ku tu luisa tua pande ku kulahela muli Yehova, ku vundila kuli ikeye na ku lilongesa Mbimbiliya ku sua kumo. Kaha tua pande ku vuluka ntsimbu yose ngecize cimo ca viuma via seho ya kama vi tu hasa ku linga, ca pua ku lingisa vantu va hane vumpahu kuli Yehova. Kaha tu kalenu na vusunga ngecize Yehova ka ka tu mbila kuti na limo litangua liahi. Cikuavo naua, ka kuesi na vimo viahi via hasa ku linga uose ouo, mu ku tu tundisa ku cilemo ca Njambi.—Tandenu Loma 8:38, 39; VaHe. 13:5, 6.

21. Vika via kuasele va Aya na Hector ku vula cimo cisoti?

²¹ Cipue nga tu hita mu visoti via ku fua vati, malungano a mu Mbimbiliya a hasa ku tu kuasa.  Ndumbuetu Aya ua pua pioneiro ku Japão ua handekele ngueni, muzimbu ua Yona ua mu kuasele ku vula liova lia kele na ku ivua mu ku ambuluila ku mbunga. Kaha umo muanetu ua mukuendze ku Indonesia ua lizina Hector, visemi veni ka ve ku pangela Yehova, ua lilongesele via vingi ku lungano lua Lute u va tumbula mu Mbimbiliya.

22. Vati mu hasa ku lilongesa via vingi ku vidrama via mu Mbimbiliya na mu livulu “Imite sua Fé”?

²² Vati mu hasa ku uana mizimbu ya mu Mbimbiliya ize i mi kaniamesa? Vidrama vietu via mu vivideo na via ku halakana, kaha na vimpande “Imite sua Fé” via mu saiti, vie ku tu kuasa ku ivuisisa vuino visoti vi va li hitile navio vantu va va tumbula mu Mbimbiliya. * Ntsimbu kanda mu tale, ku halakana ni ku tanda eyi mizimbu, vundilenu Yehova a mi kuase ku nongonona vintsina vi mu hasa ku pangesa mu muono. Setekenu ku lipuisa ngue yenu mu li na ku hita mu cisoti ca muntu u mu li na ku tanda. Hilulenu ha viuma vi va lingile ava vangamba va Yehova na vati ua va kuasele ku vula visoti viavo. Kaha pangesenu vi mua lilongesaho mu ku lua na cisoti cenu. Cikuavo naua santselenu Yehova ku vukuasi vua na putuka laza ku mi hana. Kaha muesenu naua ngecize mua haka seho ku vukuasi vuaco mu ku tonda vukovelelo vua ku kaniamesa na ku kuasa vakuenu.

23. Kuliya na Isaya 41:10, 13, vika Yehova ua kulahesa ku tu lingila?

²³ Ku yoyela mu mavu ano ali ku ngolo ya Satana ca cikalu cikuma. (2 Tim. 3:1) Kaha vintsimbu vimo nga tuli mu visoti ka tu tantekeya mua ku vi lingila, ka tua pandele ku lisosomua cikuma cipue ku ivua liova. Yehova a tantekeya vi tuli na ku lihita navio. Nga tu ua, Yehova ua kulahesa ku tu kuata na livoko lieni lia cilio. (Tandenu Isaya 41:10, 13.) Ngeci mukemuo, nga tu kulahela mu vutuntu mu vukuasi vueni tu hasa ku uana ngolo ya mu visoneka na ku vula nkala cisoti ci tu lihita naco.