Vamo Vakaleho ve ku pangesa Tekinologia, ku pua njila ya ku tualelelaho ku likata na vavusoko ni na vakuavo Vakaleho. Tuli na vusunga ngecize Mukua Kilistu ua ku-hia, ke ku suva eci cimamuna: “Mukua ku zangama a mona vupi, na ku vanda; vunoni visiname va pitako, na ku ciyandela.”—Visi. 27:12.

Tu tantekeya ngecize Yehova ua tonda ku tu niunga. Ngeci ka tue ku likata na vaze ve ku koka matepeso, vaze va ua mu cikungulukilo, ni vakua ku pesula vilongesa. (Loma 16:17; 1 Kol. 5:11; 2 Yoa. 10, 11) Vamo mu cikungulukilo, ka ve ku niunga masiko a mu Mbimbiliya. (2 Tim. 2:20, 21) Ngeci mukemuo ka tue ku suva evi, mu ku hangula vavusamba. Vunoni ca cikalu ku hangula vantu va cili va ku likata navo mu internete.

Ku hangula vuino vavusamba mu viprograma via kama via ku simutuila mu internete, ca pua ca seho ya kama. Vamo Vakua Kilistu, va lituva ku visoti omo lia ku lihaka mu vivunga via kama via ku simutuila mu internete. Vati honi muanetu cipue ndumbuetu a hasa ku zangama ku tuala ha viprograma via kala na vihita ni vene makulukazi a vantu? Ka citava ku tantekeya vuntu na cifua ca lutsilielo lua vose va kala mu civunga caco. Visamo 26:4, nguayo: “Ka nja tumamene hamo na vamala vakua makuli; cipue ka nji ka kovela hamo na vakua civembulu.” Nkuma eci cinimbu ka ca muesele ngecize tua pande ku pangesa viprograma viaco mu ku likata lika na vaze va tu tantekeya mpundu ni?

Vunoni cipue mu vivunga via vindende, Mukua Kilistu na pande ku tala ntsimbu ingahi ue ku kalamo na viuma vi ve ku simutuila vantu va kalamo. Ka tua pandele ku livua ngecize tua kala na kapandi ka ku handekaho ha vimpande viose-ovio vi va handekamo, ni ku kalamo mu ntsimbu yose-oyo i va kalamo vakevo, houe. Paulu ua mamuine Timoteo ku liniunga kuli ‘vakua visaki na vakua ku lihaka ku vize via vakuavo.’ (1 Tim. 5:13) Na lelo lino, citava ku pangesa aa mezi ku tuala ha viprograma via mu internete.

Muomu na umo Mukua Kilistu ua ku-hia uahi a hasa ku payela mukuavo Mukua Kilistu ha mbunga, cipue ku solola mizimbu ya mukuavo ni vene ku halakana ku viuma viaco. (Visa. 15:3; Visi. 20:19) Mukua Kilistu ua ku-hia ke ku tela lituitui ku mizimbu ye ku zivika ngue ya ku hianesamo ni ka yesi na ntsongo na ntsina. (Efe. 4:25) Mua vusunga, tue ku tambula mizimbu ya yingi ya cili na via-ku-lia via mu lutsilielo ku hitila mu site yetu jw.org na viprograma via Broadcasting nkala ngonde.

Vamo Vakaleho ve ku pangesa viprograma via mu internete mu ku landesa ni ku landa viuma ni vene ku hana vipanga ku vantu. Vivunga via cifua eci via pua via mingoso, kaha na hamo hahi ha via likuatela na viuma via mu lutsilielo. Vakua Kilistu va tonda ku sambua “ku cilemo ca zimbongo,” ka ve ku pangesa vamuanaye mu ku lilaho vimbongo.—VaHe. 13:5.

Kuli naua cihula cikuavo: Vuno citava ku pangesa viprograma via mu internete mu ku vundila vukuasi vua ku ka hana vamuanetu va na kalekeya ni va na hiti mu ciyovo ca mavu ni? Mu ku linga tua lema vamuanetu tue ku linga cose mu ku likuasa na ku likaniamesa umo na mukuavo. (Tia. 2:15, 16) Vunoni ku pangesa vivunga via mu internete mu ku lingamo, ci hasa ku tanganesa kapandi ka cili ka i hasa ku lihakela Mbetele ni cikungulukilo mu ku va kuasa. (1 Tim. 5:3, 4, 9, 10, 16) Kaha na umo uahi ha kati ketu, ua tonda ku lingisa vantu va singanieke ngecize va mu hangula mu cifua ca ku lifuila linga a kuase vamuanaye.

Tua lema ku linga vize vi hana vumpahu kuli Njambi. (1 Kol. 10:31) Ngeci mukemuo, nga mu tonda ku pangesa imo programa ya ku lituma vimesaje mu internete ni nkala tekinologia yeka, puenu na ku hilula ha vusonde vu hasa ku izamo na ku zangama.