1. Omo lia vika Yesu ua vundilile Yehova a niunge vandongesi veni?

KU VUTSIKI vua ku manusuila vua muono ueni ha mavu, Yesu ua kele na ku singanieka ha visoti vi ve ku lihitile navio vandongesi veni. Kaha ku lema vaze vavusamba veni, ca mu lingisile ku vundila kuli Ise a “va niunge kuli uze mukua vupi.” (Yoa. 17:14, 15) Yesu ua tantekeyele ngecize, mu nima ya ku hiluka ceni muilu, Satana a ka tualelelaho ku luisa vose va ka tonda ku pangela Yehova. Ngeci mukemuo vangamba va Yehova va ka tondeka ku va niunga.

2. Vusunga vuka tu hasa ku kala navuo ngecize Yehova a ka kumbulula vivundilo vietu?

² Yehova ua kumbuluile vivundilo via Yesu, muomu ua mu lemene mu ku pua Muaneni. Na vuno vene, nga tu lihakela kapandi ka kuya Yehova ku mutima, netu a ka tu lema kaha a ka tuala mana na ku vivundilo vietu mu ku tu kuasa na ku tu niunga. Mu ku pua Mutue ua vusoko ua cilemo, Yehova a ka tualelelaho ku niunga vuino vana veni. Muomu nga ka lingimo, ci hasa ku sahula lizina lieni!

3. Omo lia vika tua tondeka ku tu niunga kuli Yehova lelo lino?

³ Satana va mu tuntisa muilu ngeci “a li na vutenu vua kama.” (Ku-So. 12:12) Kaha na hasa ku lingisa vamo vantu ku tsiliela ngecize ku tu luisa ca pua ku “panga vipanga via Njambi.” (Yoa. 16:2) Kaha co vaze ka va tsilielele, ve ku tu luisa muomu nguavo, ka tue ku tava ku lifuisa na ano mavu. Vunoni viose-ovio vi lingisa vantu ku tu luisa, ka tue ku ivua liova. Omo lia vika? Muomu Lizi lia Njambi ngualio: “Muangana ikeye mukua cili, a ka mi kolesa, na ku mi niunga kuli uze mukua  vipi.” (2 Tes. 3:3) Vati Yehova ue ku tu niunga? Tu simutuilenu ha vinjila vivali.

4. Kuliya na Efeso 6:13-17, vika Yehova ua tu hana mu ku liniunga navio?

⁴ Yehova ua tu hana vitua via ku liniunga navio kuli Satana. (Tandenu Efeso 6:13-17.) Evi vitua via mu lutsilielo, via pua via kola kaha vie ku kuasa! Vunoni linga vi tu niunge, tua pande ku tualelelaho ku vi zala. Vika cemanena nkala citua? Tu vi hilulenu cimo ku cimo.

5. Vika via pua muiva ua vusunga, kaha omo lia vika tua pande ku u zala?

⁵ Muiva ua vusunga, uemanena vusunga vua mu Lizi lia Njambi, Mbimbiliya. Omo lia vika tua pande ku u zala? Muomu Satana ‘ikeye ise ya makuli.’ (Yoa. 8:44) Kaha ue ku linga cose, mu ku vuezelela ku vutongue vueni vua ku kuisa, ngeci ua hasa “ku onga mavu ose”! (Ku-So. 12:9) Vunoni vusunga vua mu Mbimbiliya vu hasa ku tu niunga ku makuli eni ose. Vati honi tu hasa ku zala ou muiva ua cimueso? Tue ku lingamo, mu ku lilongesa vusunga ku tuala hali Yehova, ‘ku mu lemesa mu sipilitu na mu vusunga’ kaha na ku yoya na vusunga mu viuma viose.—Yoa. 4:24; Efe. 4:25; VaHe. 13:18.

6. Ntelo ya ku ntulo ya pua ika, kaha omo lia vika tua pande ku i zala?

⁶ Ntelo ya ku ntulo ya vuviuke, yemanena vitume via vuviuke via Yehova. Omo lia vika tua pande ku i zala? Ntelo ye ku niunga lisualale linga vitua kati vi kovele na ku heta ku mutima ueni. Na vuno vene, ntelo ya vuviuke, ye ku niunga mutima uetu ua cimueso ni nguetu vuntu vuetu vua mu kati, linga kati tu tanguke na ano mavu. (Visi. 4:23) Yehova ua tonda tu mu leme na ku mu pangela na mutima uetu uose. (Mat. 22:36, 37) Ngeci Satana, ue ku seteka ku tu puisa vakua mitima ivali mu ku tu suangeleya tu leme viuma via ha mavu, vize via zinda Yehova. (Tia. 4:4; 1 Yoa. 2:15, 16) Kaha nga na hono ku tu suangeleya, ue ku tu luisa honi citona meso, linga tu tsihe masiko a Yehova.

7. Vati tue ku zala ntelo ya ku ntulo?

⁷ Tue ku zala eyi ntelo ya ku ntulo ya vuviuke mu ku tava vitume via Yehova ku tuala ha via cili na via vipi, kaha na ku yoya muaya vitume viaco. (Visa. 97:10) Vamo ve ku singanieka nguavo, masiko a Yehova eku zikiliya cikuma vizango vietu. Vunoni nga tu likela ku niunga vitume via mu Mbimbiliya, tu ka pua ngue lisualale ali mu ndzita, vunoni a zula ntelo ya ku ntulo muomu ngueni ili na ku lema. Ku lingamo ci ka pua vuheve vua kama! Muomu kuli vakua ku lema Yehova, masiko eni kati a akalu, vunoni eku ohiela.—1 Yoa. 5:3.

8. Vika ca lomboloka ku zala muzimbu ua cili ku viliato vietu?

⁸ Paulu ua tu mamuna ku zala muzimbu ua cili ua ciyulo ku viliato. Eci ca lomboloka, ku liviukisila ntsimbu yose mu ku ambulula muzimbu ua cili ua Vuangana. Mu tue ku lekako vakuetu muzimbu ua mu Mbimbiliya, lutsilielo luetu lue ku kaniama. Mua vusunga, ce ku tu kaniamesa cikuma ku mona kapandi ka ve ku lihakela vangamba va Yehova mu mavu ose, ka ku tonda vukovelelo vua ku ambulula. Ca ku muenako, vamo ve ku linga cose mu ku ambuluilako vakuavo ku vipanga, ku sikola, ku mingoso, ku ndzivo na ndzivo, ku vivenda, ku vavusoko, ku vandambo kaha ve ku ambulula ambe nga ka ve ku hasa ku tunda ha ndzivo. Cili vene, ku likela ku ambulula, ci ka tu puisa ngue lisualale ue ku zula sapato na ku enda mikono-kono mu ndzita. Mua  vusunga, ka ka hasa ku liohiela ni ku kava vuino masiko a kapitau.

9. Omo lia vika tua pande ku ambata ntelo ya ku tsiliela?

⁹ Ntelo ya ku tsiliela, yemanena lutsilielo lu tua kala naluo muli Yehova. Tua tsiliela ngecize Yehova a ka puisamo vikulaheso vieni viose. Kaha nga tuli neyi ntelo ya mu lutsilielo, tu ka hasa “ku zima nayo mivi yose ya tuhia ize ya mukua vupi.” Omo lia vika tua pande ku ambata ntelo yaco? Muomu ye ku tu niunga ku vilongesa via vakua ku alulukila vusunga, kaha ye ku tu kuasa naua ku litundisa liova lia vakua ku tu paya. Ngeci mukemuo ca ku hona lutsilielo, ka tu hasa ku viana ntsindiye ya vakuetu ya ku tu lingisa tu tsihe masiko a Yehova. Kaha nkala ntsimbu i tue ku hakuila viuma vi tua tsiliela, cipue ku vipanga ni ku sikola, ci na pu ngue tu na ambata ntelo yetu. (1 Pet. 3:15) Kaha nkala ntsimbu i tue ku viana vipanga vi liluisa na ntsimbu i tue ku linga viuma via mu lutsilielo, ci na pu ngue tu na amba ntelo yetu. (VaHe. 13:5, 6) Cikuavo naua, nkala ntsimbu i tue ku tualelelaho ku pangela Yehova vutuhu va li na ku tu luisa, kaha ntelo ya mu lutsilielo ikeyo ili na ku tu niunga.—1 Tes. 2:2.

10. Sapeu ni nguetu cikoko ca vuovoke ca pua cika, kaha omo lia vika tua pande ku ci zala?

 ¹⁰ Cikoko ca vuovoke, ca pua lulavelelo lua tu hana Yehova ngecize tangua a kovola ku ku-tsa na ku lunguisa vose vaze ve ku linga cizango ceni. (1 Tes. 5:8; 1 Tim. 4:10; Tito 1:1, 2) Cikoko ce ku niunga mutue ua lisualale. Na vuno vene lulavelelo lua kuovoka, lue ku niunga visinganieka vietu. Mu njila ika? Lulavelelo luaco, lue ku tu lingisa tu tuale mana ku vikulaheso via Njambi na ku tu kuasa ku mona visoti mu njila i tua pande ku vimuenamo. Vati tue ku ci zala? Tue ku zala cikoko ca vuovoke, mu ku tombuesa visinganieka vietu ku visinganieka via Njambi. Ca ku muenako, ka tue ku tavesa lulavelelo luetu lu hitukile ha vupite vue ku nonga, vunoni hali Njambi.—Visa. 26:2; 104:34; 1 Tim. 6:17.

11. Mukuale ua sipilitu ua pua uka, kaha omo lia vika tua pande ku u pangesa?

¹¹ Mukuale ua sipilitu, ua pua Lizi lia Njambi, Mbimbiliya. Mukuale uaco ua kala na ngolo ya ku puliasana makuli ose na ku ovuola vantu ku vundungo vua vilongesa via makuli na vilinga via ku vihia. (2 Kol. 10:4, 5; 2 Tim. 3:16, 17; VaHe. 4:12) Tue ku lilongesa mua ku pangesela vuino mukuale uaco, mu ku lilongesa mu vulika, kaha na mu vilongesa vi tue ku tambula ku lukungulukilo lua Yehova. (2 Tim. 2:15) Mu ku vueza ku vitua via mu lutsilielo, Yehova ua tu hana naua cuma cikuavo ce ku tu niunga mua kama. Cuma cika?

12. Vika vikuavo vi tua tondeka kaha omo lia vika?

¹² Lisualale ua mana a tantekeya ngueni munie umo ka ue ku nona nkena, muomu na umo uahi ua vula ndzita lika lieni. Na vuno vene, lika lietu, ka tu hasa ku vula Satana na mbunga yeni. Tua tondeka vukuasi vua vamuanetu. Ngeci Yehova ua tu hana civunga ca vamuanetu mu mavu ose linga va tu kuase.—1 Pet. 2:17.

13. Kuliya na VaHevelu 10:24, 25, vukuasi vuka vua kala ha ku kunguluka?

¹³ Imo njila i tue ku tambuilamo vukuasi vuaco ya pua mu ku kunguluka (Tandenu VaHevelu 10:24, 25.) Tu vose tue ku ivua vusiua vintsimbu vimo, kaha mu ntsimbu yaco viuano vie ku tu kolesa. Vikumbululo via vamuanetu vie ku tu kaniamesa. Kaha vimpande na vimueso vi ve ku linga, vie ku kaniamesa kapandi ketu ka ku pangela Yehova. Vikuavo naua vie ku tu kaniamesa, via pua ku simutuila ntsimbu kanda na mu nima ya viuano. (1 Tes. 5:14) Cikuavo naua, viuano vie ku tu hana vukovelelo vua ku ivua ndzolela ya kala ha ku hana. (Vili. 20:35; Loma 1:11, 12) Vuno vikevio lika evi ni? Houe, kuli vikuavo naua. Viuano vie ku vueza ku vutongue vuetu vua ku lua ni nguetu vua ku ambulula. Ca ku muenako, tue ku lilongesa mua ku pangesela Vikuata vi tue ku Longesa Navio. Ngeci mukemuo, tu puenu na ku liviukisila vuino viuano na ku halakana vuino. Kaha mu nima ya viuano, tu puenu na ku pangesa vi tua lilongesa. Uose a lingamo, a ka pua “lisualale ua cili ua Kilistu Yesu.”—2 Tim. 2:3.

14. Vukuasi vukuavo vuka tua kala navuo?

¹⁴ Tua kala naua na vukuasi vua makulukazi a makulukazi a tungelo. Aci singaniekenu lika ha viuma via hasa ku linga kangelo umo lika! (Isaya 37:36) Kaha singaniekenu honi ha viuma vi va hasa ku linga makulukazi a tungelo. Mua vusunga, ka kuesi muntu cipue ndemone, a hasa ku vula ava masualale va Yehova. Vamo vamuanetu ve ku handeka nguavo, Mukaleho ambe nga ali lika lieni, ue ku pua va vengi ku hiana vitozi veni, muomu ali na Yehova. (Vang. 6:16) Cili vene, aa mezi a vusunga! Ngeci mukemuo, puenu na ku  vuluka aa mezi, nga muli na liova omo lia vilinga ni vihandeka via umo mukuenu ku vipanga, ku sikola ni kavusoko. Kati mu suve ngecize, ka muesi lika lienu kaha muli na ku kava ku tuamenena ca Yehova.

15. Kuliya na Isaya 54:15, 17, omo lia vika na umo uahi ue ku hasa ku vindika cipanga ca ku ambulula?

¹⁵ Mavu a Satana, ali na vusunga vua vuingi vua ku tu zinda. Ka tue ku tava ku lihaka mu via mavu ni kuya ku ndzita. Tue ku ambulula lizina lia Njambi na ku hakuila Vuangana vueni. Tue ku hakuila vitume vieni. Cikuavo naua, tue ku aneka ha mutana vukenia na makuli a muangana ua mavu. (Yoa. 8:44) Cikuavo naua, tue ku ambulula ngecize mavu a Satana vuovuno va a nongesa. Vutuhu ngoco, Satana na mbunga yeni na limo litangua liahi va ka hasa ku tu holuesa. Vunoni tu ka tualelelaho ku sangala Yehova mu njila yose i tu hasa! Vutuhu Satana mukua ngolo, ka hasele ku vindika muzimbu ua Vuangana u hete ku mitamba yose ya mavu. Viose evi, tue ku vi hasa lika, muomu Yehova ue ku tu niunga.—Tandenu Isaya 54:15, 17.

16. Vati Yehova a kovola vantu veni mu lamba ya kama?

¹⁶ Vika tua lavelela ku lutue? Mu lamba ya kama, Yehova a ka tu ohiela mu vinjila vivali via ku komouesa. Ha katete, Yehova a ka tu ohiela mua ka lingisa vamiangana va mavu ku nongesa Mbambilone ya Kama ni nguetu civunga cose ca malombelo a makuli. (Ku-So. 17:16-18; 18:2, 4) Kaha ca mu civali, a ka tu ohiela mua ka nongesa visupo via mavu a Satana ku Alemangendo.—Ku-So. 7:9, 10; 16:14, 16.

17. Vati ku likata cikuma na Yehova ce ku tu niunga?

¹⁷ Nga tu tualelelaho ku likata cikuma na Yehova, Satana ka hasa ku tu nongesa. Vunoni ikeye i va ka nongesa. (Loma 16:20) Ngeci mukemuo, zalenu vitua via mu lutsilielo, kaha kati mu vi zule! Cikuavo naua, kati mu eseke ku lua ndzita lika lienu. Kaha puenu na ku kuasa vamuanoko na ku kava ku tuamenena ca Yehova. Nga mu lingamo, kalenu na vusunga ngecize Isuenu ua muilu, a ka mi kaniamesa na ku mi niunga.—Isaya 41:10.