Vuno tu hasa ku tsiliela mpundu nguetu vikulaheso via Njambi viose vi ka lipuisamo ni? Yesu ua kele na vusunga vuaco, kaha viuma via kele na ku longesa via kaniamesele lutsilielo lua vakua ku mu halakana. Aci singaniekenu ha cisimo ca tele mu Cimpande ceni ca ha Muncinda, ci tu hasa ku uana ku Mateo 5:18: “Muomu cili nji mi leka nguange, Ku vanga lilu na mavu vi ka hita, ku mezi a lisiko ka ku ka fuma kalilaka ka kandende cipue ponto, ku vanga viuma viose vi ka puamo.”

Kalilaka ka kandende cikuma mu masona a ciHevelu ka pua י (yod), kakeko ka ku livanga mu Tetragrama, ni nguetu lizina lia ku lela lia Yehova. * Mu ku vueza ku mezi a lisiko lia Njambi, vakua ku soneka na vaFaliseo va puisile nkala ‘ponto ya ku masiko’ ku pua ya seho ya kama cikuma.

Yesu ua handekele ngueni ci li ku lutue melu na mavu ku hita, vunoni kalilaka kandende ka mu Masiko ka ka pandele ku hita ca ku hona ku lipuisemo. Ambe ngoco, Visoneka kasi via muesa ngecize melu mpundu na mavu vi ka kalako ku miaka yose. (Visamo 78:69) Ngeci mukemuo, aa mezi a ngolo a muesa ngecize ambe kalilaka ka kandende ka mu Masiko ka ka pandele ku lisupaho ca ku hona ku lipuisamo.

Vuno Yehova Njambi ua haka seho ku viuma via vindende ni? Eyo, cikuma vene. Aci hilulenu hali eci: VaIsaleli va laza va va lekele nguavo ka va pandele ku pokola citsiha na cimo cahi ca mpanga ua Pasovala. (Ezundu 12:46) Ka citume kaco ka solokele ngue kakandende. Vuno vaIsaleli vevuisile omo lia vika ka va pandele ku pokola vitsiha via mpanga ni? Halumo kuahi. Vunoni Yehova Njambi ua tantekeyele ngecize kacitume kaco ka puile ka vupolofeto vua muesele ngecize Mesiya ka va ka mu pokola na cimo citsiha cahi, omo va ka mu sukika ha citi.​—Visamo 34:20; Yoano 19:31-33, 36.

Mezi a Yesu a tu longesa vika? Netu tu hasa ku tsiliela ngecize vikulaheso via Yehova Njambi vi ka lipuisamo, mu viose. Mua vusunga aka kalilaka kakandende ka mu ciHevelu ka tu hana lulavelelo lua kama!