“Vuana vuose vua ku viuka na vuana vuose vua ku tantuluka vukevuo vua muilu, vu fuma kuli ise ya vieke.” (Tiango 1:17) Mbimbiliya ya handeka via vuhuanga vua Tatetu ua muilu, Yehova Njambi. Ha vuana vuose vua hana Njambi ku vantu, kua kala vuana vua hiana seho ya kama cikuma. Vuana vuka? Va vu tumbula ku mezi a Yesu a tsimana cikuma ku Yoano 3:16, “Muomu Njambi ua lemene vakua mavu cikuma, ngecize ua hele Muaneni umo lika, linga uose a mu tsiliela kati a ka nonge, vunoni a kale na muono ka ue ku hua ua ya-ye.”

Vuana vua Muana Njambi umo lika​—Mua vusunga ka kuesi vuana vua hiana ovu vuana vu tua pande ku tambula, muomu vu hasa ku tu patula ku vundungo vua vupi, ku kulupa na ku-tsa. (Visamo 51:5; Yoano 8:34) Ambe tu linge muose omo, ka tu hasa ku patuka ku vundungo vuaco. Vunoni Njambi ku cilemo ceni, ua lingile cose a tu patule. Mu ku tu hana muaneni umo lika Yesu Kilistu a ku tu ku-le, Yehova Njambi ua hele ku vantu lulavelelo lua ku ka yoya muono ua ya-ye. Ku ku-la ca pua vika? Omo lia vika ca tondekele? Kaha vukuasi vuka tu hasa ku uanaho?

Ku ku-la capua ku fueta ndando ya ku landa lueka cuma ca zimbalele ni ku patula umo mu vundungo. Mbimbiliya nguayo visemi vetu va ku livanga, Andama na Eva, ha katete ka va kele na vupi, tele nga ve ku yoyele muono ua cili miaka yose mu citungu ha mavu na vana va ve ku semene. (Njenisisi 1:26-28) Vunoni va zimbalesele viose muomu va hanguile ku sahula Njambi​—Ngeci va himpukile vakua vupi. Vika viezilemo? Mbimbiliya nguayo: “Hali yala umo lika, vupi vua kovelele hano ha mavu, na ku-tsa ha vupi; kaha ngecize vene ku-tsa ci na hete ku vantu vose muomu va na lingi vupi.” (Loma 5:12) Andama na Eva ka va hasele naua ku tambuisa vana vavo muono ua ku tantuluka, ngeci vana vavo va suana vupi na ku-tsa.

Ku ku-la ci hasa lika ku kalako nga ndando yaco ya litombola na cize ca zimbalele. Omo Andama kononokele Njambi ku cizango, ua vulumuine ngeci ua zimbalesele muono ua muntu ua ku tantuluka​—Muono ua Andama. Ngeci Mbimbiliya ya muesa ngecize, Andama ua kovelesa vana veni mu vandungo vua vupi na ku-tsa. Kaha mukemuo kua tondekele naua muono ueka ua ku tantuluka​—Muono ua Yesu​—linga u patule vantu ku vundungo vua vupi na ku-tsa. (Loma 5:19; Efeso 1:7) Mu ku linga Njambi ku cizango ceni ua fuetele ndando ya ku tu ku-la, citava tu ka suane vuana vu va zimbalesa Andama na Eva​—Muono ua yaye ha mavu mu citungu.​—Ku-Solola 21:3-5.

Mua vusunga ka kuesi vuana vua seho ku hiana ovu vua tu hana Njambi, vua ku tu ku-la linga tu ka yoye miaka yose. Vuana vuaco vua puisamo viuma via vingi. Linga ovu vuana vuaco vua ku “tantuluka” vu tu lumbunuke vuino, tu ci talenu vati vuana vuaco vua hiana seho mu vinjila via ku lise-seza ngue mu tua muene mu cilongesa ci na hiti.

Vua puisamo cizango cetu. Etu vantu tua kala na cizango ca kama ca ku yoya miaka yose. (Ekelesiaste 3:11) Vutuhu ku ndzili yetu ka tu hasa ku puisamo cizango ca ku yoya miaka yose, vunoni nkombelo ya sokolola njila linga tu ka hase ku  yoya miaka yose. Mbimbiliya nguayo: “Muomu fueto ya vupi, ku-tsa; vunoni vuana vua Njambi, muono ua miaka yose ua ya-ye muli Kilistu Yesu muangana uetu.”​—Loma 6:23.

Vua puisamo vi tu tonda. Vantu ka va hasa cipue kavundende ku hana nkombelo. Mbimbiliya nguayo: “Muomu ku kula muono uavo ca cikalu cikuma, Kaha va ci honoua ku miaka yose ya ya-ye.” (Visamo 49:8) Ngeci mukemuo, tua tondekele vukuasi vua Njambi linga tu hase ku patuka ku vupi na ku-tsa. Vunoni “ha ku-kuka cize ci li hali Kilistu Yesu,” Njambi na hana vuana vua tondeka.​—Loma 3:23, 24.

Vua soloka ha ntsimbu ya cili. Mbimbiliya nguayo: “Muomu muze te tu vakua vipi, Kilistu ua tu tsilile.” (Loma 5:8) Vuana vuaco va vu hele “te tu vakua vipi,” ku ku-la ca tu kuasa ku ivuisisa vukama vua cilemo ca Njambi kuli yetu vutuhu tu vakua vupi. Kaha ce ku tu kuasa ku tsiliela vi tua lavelela ku lutue, vutuhu tue ku pinda na vupi.

Ua vu hanene na vutumbe vua cili. Mbimbiliya ya lombolola vika via lingisile Njambi ku hana Muaneni mu ku tu ku-la: “Mukemuo cilemo ca Njambi ca solokele muli etu, omo Njambi na tumu Muaneni umo lika ha mavu linga tu yoye hali ikeye. Mukemuo mu li cilemo, kati omo etu tua lemene Njambi vunoni omo ikeye ua tu lemene.”​—1 Yoano 4:9, 10.

Vati mu hasa ku muesa ngecize mua haka seho ku vuana ovu vua hiana seho? Mu vuluka mezi a Yesu ku Yoano 3:16 ngueni ‘uose a muesa lutsilielo’ muli ikeye a kovoka. Kuli ya na Mbimbiliya lutsilielo lua pua “ciye [ni vusunga vua] ca viuma via ku lavelela.” (VaHevelu 11:1) Linga lutsilielo lu pue lua vusunga ca tondeka ku lilongesa. Ngeci mukemuo, tua mi lania mu lilongese via Yehova Njambi, ua tu hana ovu “vuana vua ku tantuluka,” mu tantekeye vi mua pande ku linga mu ka suane muono ka ue ku hua, ua mi vuahesela Njambi omo lia cikombelo ca Yesu.

Mu hasa ku tantekeya evi viose mu ku hilula ha vilongesa via kala mu saiti www.pr418.com. Vakaleho va Yehova va ka viukilila ku mi kuasa. Tuli na vusunga nguetu nga mu ka tantekeya vivezikiso vi mu ka suana omo lia vuana vua hiana seho, mu ka handeka ngueni: “Nji santsela kuli Njambi hali Yesu Kilistu muangana uetu.”​—Loma 7:25.