Aa mezi va a handekele kuli umo muana mpuevo ua miaka 13 mu va mu hele muana katali. Umo mpuevo mukua mingoso ua handekele ngueni komputador ya mu hele ise tele a lingila ku manusula sikola ya kama, vua puile vuana vua aluluile muono ueni. Kaha umo mukuendze mua puisile muaka mu vulo, mpueyeni ua mu sonekelele kamukanda. Ua handekele ngueni, ka puile vuana vua ku hiana viose.

Muaka ku muaka vantu ve ku linga cose mu ku tonda vuana vua “seho ya kama” va hane kavusamba ni kavusoko ha vintsimbu via seho ya kama. Vavengi va lema ku va santsela na ku va sangala ngue mu tua mono helu. Amba yeni co? Nenu mu tonda ku hana ni ku tambula vuana vua mi ya ku mutima ni?

Mua vusunga vantu vose va tondamo, muomu ku hana ka ce ku vuisa lika ndzolela ku mukua ku tambula, vunoni ce ku vuisa vuino mukua ku hana. Ngeci Mbimbiliya nguayo: “Ku-hana ca hiana ku tambula mu ku vezika.” (Vilinga 20:35) Ndzolela ye ku iza mu ku hana, ye ku livuezelela cikuma nga vuana vuaco vunayi muntu ku mutima.

Vati ku hana cenu ci hasa ku mi vuisa ndzolela na ku uze avu tambula? Kaha cipue nga ka mu hasa ku hana vuana vua “seho ya kama,” vati mu hasa ku hana vuana vu ya muntu ku mutima?