Cingi ca vantu mu mavu ose va tsiliela nguavo Natale cilika ca ku semuka ca Yesu Kilistu. Vutuhu ngoco, mua ci singaniekaho laza nga Vakua Kilistu va katete, vaze va kele na ku enda na Yesu mpundu, va kele na ku lia Natale ni? Mua tantekeya vika ya handeka Mbimbiliya ku tuala ha vilika via ku semuka ca muntu ni? Vikumbululo via vihula evi, vi hasa ku tu kuasa ku ivuisisa nga Vakua Kilistu va pande ku lia Natale ni kuahi.

Ca ku livanga, mu Mbimbiliya na hamo hahi ha va soneka via cilika ca ku semuka ca Yesu cipue ca vamo vangamba va Njambi va ku laza. Vunoni va sonekamo lika via vantu vavali va lingile vilika via ku semuka cavo. Kavali kavo ka va puile vakua ku lemesa Yehova Njambi ivenia Mbimbiliya, kaha ha vilika via ku semuka cavo ha solokele viuma via ku pihia. (Njenisisi 40:20; Mako 6:21) Imo Encyclopædia Britannica nguayo, Vakua Kilistu va katete “ka va tavele ku linga vilika via ku semuka ca vantu vi va kele na ku linga vakua mavu.”

Mbimbiliya ka ya handekele tangua lika mpundu Yesu ua semukile. Imo Cyclopedia nguayo, “Ca cikalu ku nongonona litangua lia semukile Yesu mu testamentu ya iha ni mu nkala mukanda.”

Ca mu civali, mu Mbimbiliya hahi ha va soneka via Yesu ni vandongesi veni ku linga cilika ca Natale. Imo New Catholic Encyclopedia nguayo, cilika ca Natale va ci tumbula ha katete mu “cikota ca Philocaulus, ua ku Loma ua yoyele mu miaka 336 [T.K.N.].” Mua vusunga, ku ntsimbu eyi Mbimbiliya tele ya hua laza ku i soneka, kaha tele mua hiti vihita via miaka tunde ha kelele Yesu ha mavu. Ngeci Encyclopedia nguayo “cilika ca Natale kati Njambi ua ci tumine kaha ka va ci sonekele mu Testamentu ya iha.” *

Yesu Mulongisi ua Kama, ua hele vitume vi va pandele ku kava vandongesi veni, kaha viose va vi soneka mu Mbimbiliya. Yesu na limo litangua liahi ua tumine vandongesi veni ku lia Natale. Ngeci mua mulongesi ua ku sikola ka tondo vandongesi veni va vueze vieka ku vilongesa via va tuma, Yesu neni ka tondo vandongesi veni ku “pulakana viuma vi va na soneka;” mu Mbimbiliya.​—1 Kolintu 4:6.

Vutuhu ngoco, kua kala cilika ca seho ya kama ci va kele na ku linga Vakua Kilistu va katete​—Mulalelo ua Muangana ni cilika ca ku vuluka ku-tsa ca Yesu. Eci cilika caco, Yesu mpundu ikeye ua sikile vandongesi veni va pue na ku ci linga kaha ua va muesele vati va pande ku ci linga. Evi vitume viaco, na litangua li va mu tsihile viose va vi soneka mu Mbimbiliya.​—Luka 22:19; 1 Kolintu 11:25.

Ngue mu tua mono, Natale ca pua cilika ca ku semuka, kaha Vakua Kilistu va katete ka va kele na ku linga vilika via vakua mavu. Cikuavo naua, mu Mbimbiliya ka va sonekelemo na hamo hahi ngecize Yesu ni vandongesi veni va lingile Natale. Ngeci mukemuo, Vakua Kilistu vavengi mu mavu ose ka ve ku lia Natale.