Rose ua handekele ngueni: “Nja suana vuvezi vue ku nji vuisa ku vavala ca kama ntsimbu yose. Muono uange ua kaluuile cikuma.” Vintsimbu vimo ka kele na ku hasa ku tuala mana ku cilongesa ceni ca Mbimbiliya na viuma via mu lutsilielo, citanga caco ca mu lingisile ku lisosomua cikuma. Vunoni mezi a Yesu a ku Mateo 19:26 a mu kuasele cikuma, Yesu ngueni: “Kuli Njambi viuma viose vi tava.” Rose ua lilongesele ngecize kua kala vinjila vikuavo via ku lilongeselamo. Mu ku linga ku vavala ca kele na ku ivua ca kele na ku mu lingisa ku honoua ku tanda vintsimbu vimo, ua putukile ku halakana ku tanda ca Mbimbiliya na mikanda via ku ngalavala. * Kaha ua handekele ngueni: “Nga via ku ngalavala ka via keleko, yanini vati nje ku kaniamesele lutsilielo luange.”

Rose mue ku ivua vusiua omo lia ku honoua ku linga viuma via hasele ku linga laza, ue ku uana ku lembezieka ku mezi a ku 2 Kolintu 8:12, ku va soneka nguavo: “Nga ku li laza cizango, ca tava ngue omo muntu a li naco, kati ngue neci kesi naco.” Aa mezi a vuluisa Rose ngecize viose vie ku linga vie ku ya Njambi ku mutima, muomu ue ku linga cose ku liya na haze ha ca mu tavesela cihindu ceni.

Delphine, u tu na tumbula laza, ua handekele ngueni: “Mu nima ya ku-tsa ca muanange ua mpuevo ua  kele na miaka 18, ku vavala ci nja vuile ku mutima nja muene ngecize ka nji hasa ku tualelaho ku yoya. Viuma ka via fuile naua ngue muze mua laza na limo litangua liahi.” Delphine ua uanene ku lembezieka, mu mezi a ku Visamo 94:19, kua handekele mukua visamo kuli Njambi ngueni: “Mu ku lana ca visinganieka viange ha kati kange, ku-lembezieka cove ci zolesa muono uange.” Kaha ngueni, “Nja vundilile Njambi a nji kuase ku uana viuma vi nji hasa ku linga mangana nji tepulule ku vavala caco.”

Ua kovelele mu cipanga ca ku lihana. Mu ku hita ca ntsimbu, ua setekesele muono ueni ku cisonekeso ca mulongisi (giz)​—ambe nga ca pokoka citava ku ci pangesa. Na vuno vene, vutuhu ua vuile vusiua vua kama cikuma, vunoni ua lilongesele ngecize citava a tualeleho ku kuasa vakuavo. A vuluka ngueni: “Nja nongonuene ngecize ku pangesa vitume na mizimbu ya mu Mbimbiliya mu ku kuasa vandongisi vange, ya puile njila ya kele na ku nji kuaselamo Yehova na ku nji lembezieka.” Kaha ua sonekele mazina a vantu va va tumbula mu Mbimbiliya vaze va hitile mu visoti via kama. Mu nima ya ku lingamo, ngueni, “Vose va nja tandele mu Mbimbiliya va hitile mu visoti via kama, va kele na ku vundila, na umo ka lingilemo uahi.” Ua lilongesele naua ngecize “muntu a hasa lika ku kolesa mu visoti nga a tanda Mbimbiliya.”

Delphine ua lilongesa naua cuma cikuavo mu ku lilongesa Mbimbiliya​—ku tuala mana eni ku viuma via ku lutue kati via ku nima. Lulavelelo lu va tumbula ku Vilinga 24:15 lue ku mu lembezieka. Mbimbiliya nguayo: “Ku ka kala cisangukilo ca vakua vuviuke na vakua vuhenge.” Vusunga vuka vu a li navuo Delphine ngecize Yehova a ka sangula muaneni? Ivene ua kumbuluile ngueni: “Nje ku singanieka mu nji ka mona muanange ku lutue. Litangua li tu ka liuana na muanange Tatetu ua muilu ua li hangula laza. Nje ku lisinganieka nji li hamo lika neni mu citungu ngue vene mu nja mu muene na ku mu lema litangua lia semukile.”