Umo mpuevo ua lizina Rosie ngueni: “Nja kele na ku lisosomua cikuma na vimo viuma kaha na ku vi singanieka ngue via vikalu cikuma, nkuma kuahi.” Vinimbu vika via mu kuasele? Cimo cavio Mateo 6:34 nguaco: “Kati mu umine mitima ku litangua lia mene: muomu litangua lia mene li komina mutima likelio livene.” ‘Nkala litangua lia kala na visoti vialio.’ Vuovuno honi Rosie ngueni, aa mezi a Yesu a mu kuasele ku likela ku lisosomua na visoti via mene. Kaha ua vuezeleko ngueni: “Na laza nja kele na visoti via vingi, ngeci ka ca tondekele nji vuezeko ku lisosomua na visoti vize kanda vi ci soloke ni vene ka vi ka soloka.”

Mpuevo mukuavo ua lizina Yasmine neni ua vuile ngecize ku lisosomua ceni ci li na ku mu vula. Ngueni, “Nja kele na ku lila amo matangua mu simano, kaha amo matsiki ka nja hasele ku kosa. Nja vuile ngecize ku singanieka viuma mu njila ya ku henga ci li na ku nji lia.” Mukanda uka ua mu kuasele? Ngueni mukanda 1 Petulu 5:7 uze ua handeka nguauo: “Mbilenu cisoti cenu cose kuli [Njambi], muomu ikeye a mi lela.” Yasmine ngueni: “Mu ku hita ca ntsimbu, nja tualeleleho ku vundila kuli Yehova, kaha ikeye ua kumbuluile vivundilo viange. Ngeci nja vuile ngue va na nji tulu citeli ca kama. Vintsimbu vimo visinganieka via ku pihia vie ku nji hilukila, vunoni nji tantekeya honi mua ku luila navio.”

Umo muana mpuevo ua lizina Isabella ngueni: “Mu ku mona cange, vulenda ve ku vu suana muomu na vatate  navo mu va fua. Vintsimbu vimo nje ku nakuila ku lutue viuma via seho, vunoni mu ntsimbu oyo nevi vi nji linga vieka viahi—nji tonda lika ku tumama ngoco ni ku tala TV. Ca pua ciizilila ca ku pihia muomu ce ku kokela muntu cikela kaha ke ku hasa ku linga cipanga mu njila ya ku lumbunuka.” Citume ca mu kuasele ca kala ku 2 Timoteo 2:15, nguauo: “Takamesa linga u sololoke mukua ku viuka kuli Njambi, ngamba uze kesi na vimo via ku mu vuisa ntsoni.” Kaha Isabella ua handekele ngueni, “Ka nja tondele Yehova a vuile vipanga viange ntsoni omo lia malanga ni vulenda vuange.” Isabella ua hasa ku vula citanga ceni.

Kelsey neni ua handekele ngueni: “Hamo nja kele na ntsimbu ya ku linga cimo cipanga vunoni nja kele na ku ci nakuila ku lutue noho kua lisupu kantsimbu ka kandende lika. Kaha nja kele na ku lila, ku kosa cilavulavu na ku lisosomua omo liaco. Mua vusunga, vulenda vua kele na ku nji yandesa.” Kelsey ua uanene vukuasi ku livulu lia Visimo 13:16 ua handeka nguauo: “Muntu uose mukua liano a ci panga na mana; vunoni ciheve a tembesa vuheve vueni.” Mu ku lombolola via lilongesele ku cinimbu eci, ua handekele ngueni: “Ca pua ca cili ku kala na vukatuisi kaha na ku lingila vua lumo vutumbe. Lelo lino nja kala na lipapelo ha mesa lie ku nji vuluisa vipanga via ku lutue, kaha eci ce ku nji kuasa ku endesa viuma muze mu nai programa, linga kati nji sile viuma ku ntsongo-ntsongo, na ku linga via ku tunta.”

Umo mpuevo ua lizina Kirsten ngueni, “Yaliange ua tsiha vulo na ku nji sila vana vavandende vauana.” Citume cika ca mu kuasele? Visimo 17:17, kuze ku tue ku tanda ngecize: “Kavusamba a lema ntsimbu yose; na muanetu na semuuila mu ku kuasa ku lamba.” Kirsten ua lihakelele kapandi ka ku likata na vakuavo vakua ku lemesa Yehova. Vika viezilemo? Ikeye ngueni: “Vavusamba va lingile ua kamo ua kamo na ku nji kuasa mu vinjila via vingi! Vamo va ka nji landelele via ku lia na ku nji sila ha mbelo, vakuavo va nji silile vintemo. Lutatu luose civunga ca vamuanetu va nji kuasele hamo lika na vana vange mu ku nungulukila ku ndzivo ikuavo. Umo ua nji kuasele ku uana cipanga. Mua vusunga, ntsimbu yose vavusamba vange va kele na ku nji kuasa.”

Delphine u tu na tumbuile mu vimpande via ku nima, neni ue ku lua na vulika. Mu nima ya ku zimbalesa viose, a vuluka ngueni: “Nja vuile ngue nji li ha mbandza ya ndzivo ya muono, na ku talela ha katuntu vakuetu va li na ku yoya hamo lika muono ua ndzolela mu kati. Nja kele na ku livua vulika vua kama.” Mukanda ua nji kuasele ua Visamo 68:6 ku va soneka nguavo: “Njambi a hia ndzivo kuli uze ua kala mu tango-tango.” Kaha ua lomboluele ngueni: “Nja tantekeyele ngecize eci cinimbu ka ca lombolokele ku kala lika na ndzivo mpundu mu ntsimbu ino. Vunoni njevuisisile ngecize Njambi ue ku hana ndzivo ya mu lutsilielo, cihela ca cili cize ce ku vuisa muntu ku lembama na ku likata na vakuavo va lema Yehova. Vutuhu ngoco, nja tantekeyele ngecize ka citava nji suene kuli vakevo, nga ha katete ka nja suenene kuli Yehova. Ngeci Visamo 37:4 ya nji kuasele mu cifua eci, nguayo: ‘Viukilila naua muli Yehova; Kaha a ka ku hia vizango via mutima uove.’”

Mu ku manusula, ua handekele ngueni: “Nja nongonuene ngecize nja pandele ku kakatela cikuma kuli Yehova. Muomu ikeye mukua vucili ku hiana vose. Kaha nja sonekele mukana ua viuma vi nji hasa ku linga na vakuetu na ndzolela, linga nji hase ku likata navo mu lutsilielo. Nja lilongesele ku tonda vifua via cili mu vakuetu na ku yoya navo mu njila i muesa ngue vifua viavo via cili vikevio lika vi nje ku mona.”

Vavusamba ve ku pangela Njambi kasi ka va tantulukile. Vakaleho va Yehova navo ve ku pinda na visoti via vingi ngeci mua vantu vose. Vunoni vimamuna via mu Mbimbiliya vie ku va longesa ku kuasa vakuavo mu nkala vukovelelo vu va uana. Ngeci ca pua ca cili ku kala na vavusamba ngeci muavo. Vuno, vitume via Mbimbiliya vi hasa ku tu kuasa mpundu ambe mu visoti vize vintsa ka citava ku vi manusula matangua ano, ngeci mua vuvezi ka vue ku kanguka na ku tsisa ni?