Lizina lia Njambi iya? Ivene Njambi ngueni: “Ange nji Yehova, likelio lizina liange.” (Isaya 42:8) Lizina lia Njambi lia soloka vintsimbu via ku pua 7.000 mu Mbimbiliya. Vakua ku langulula viMbimbiliya vavengi ve ku sevuka mu ku tundisamo lizina lieni na ku hakamo vinkumbu lika ngeci mua “Muangana” ni “Sukulu.” Njambi a tonda mu pue kavusamba keni, ngeci ua mi lania mu pue na ku mu sana ha “lizina lieni.”—Visamo 105:1.

Vinkumbu via Yehova. Mbimbiliya ya tumbula vinkumbu via vingi via Yehova ngeci mua “Njambi,” “Mukua Ngolo yose,” “Sakatanga,” “Tatetu,” “Muangana,” na “Sukulu.” Kaha vivundilo via vingi vi va sonekamo, ka via pangesele lika lizina mpundu, Yehova, vunoni na vinkumbu vieni vikuavo.—Ndaniele 9:4.

 Muvila ua Kala Nauo Njambi. Njambi ua pua sipilitu, ka citava ku mu mona. (Yoano 4:24) Mbimbiliya nayo ya muesa mpundu ngecize “na umo uahi” ua monaho laza Njambi. (Yoano 1:18) Kaha ya muesa naua ngecize neni ue ku ivua ndzolela na vusiua. Ca ku muenako, vantu va hasa ku mu vuisa vusiua ni “ndzolela.”—Visimo 11:20; Visamo 78:40, 41.

Vifua via ku Komouesa via Njambi. Njambi ua lema vantu va ku vifuti na visemua viose. Ka kele na kahangu. (Vilinga 10:34, 35) Kaha naua ua pua “mukua cikeketima na kavumbi, a livandeka ku vutenu, ua lana ngozi na vusunga.” (Ezundu 34:6, 7) Vunoni ha vifua viose via kala navio Njambi, ha kala viuana vie ku tuya cikuma ku mutima.

Ngolo. Njambi ikeye ua pua “Mukua Ngolo yose”. Kaha mu ku linga ua hiana ngolo a hasa ku puisamo viose vie ku likuminia.—Njenisisi 17:1.

Mana. Njambi ua hiana vose ku mana. Ngeci Mbimbiliya ya handeka nguayo ikeye lika “mukua mangana.”​—Loma 16:27.

Vuoloke. Njambi ue ku linga vuoloke ntsimbu yose. Vilinga vieni viose via “tantuluka” kaha “kesi na vupi.”​—Ndeutelonomi 32:4.

Cilemo. Mbimbiliya nguayo “Njambi ikeye cilemo.” (1 Yoano 4:8) Njambi ke ku muesa lika cilemo, vunoni vutuntu vueni vuose vua pua cilemo. Eci ca lomboloka ngecize viose vie ku linga, ue ku vi linga omo lia cilemo, kaha eci ce ku tu kuasa mu vinjila via vingi.

Vusamba vua Njambi na Vantu. Njambi ua pua Tatetu ua muilu. (Mateo 6:9) Nga tu mu tsiliela, tu hasa ku likuata vusamba neni. (Visamo 25:14) Ngeci Njambi ua mi lania mu pue na ku suena kuli ikeye mu ku vundila na ku mu leka “cisoti cenu cose kuli ikeye, muomu ikeye a mi lela.”​—1 Petulu 5:7; Tiango 4:8.

Yesu Kati Ikeye Njambi. Yesu ua lifuila, muomu ikeye lika ya tangele Njambi tele Njambi a ci li lika lieni. Ngeci Mbimbiliya ya tumbula Yesu nguayo Muana Njambi. (Yoano 1:14) Mu nima ya ku tanga Yesu, Yehova ua pangesele ou muaneni ua katete ku pua “mesele” mu ku tanga viuma vikuavo viose.​—Visimo 8:30, 31; Kolose 1:15, 16.

 Na limo litangua liahi Yesu ua handekele ngueni ua pua Njambi. Vunoni, ua handekele ngueni “Ange  . . . nja fumu kuli [Njambi], kaha ikeye ua nji tumine.” (Yoano 7:29) Mua handekele na umo ndongesi yeni, Yesu ua sanene Yehova ngueni ‘Tata na Isuenu’ kaha “Njambi yange na Njambi yenu.” (Yoano 20:17) Mua tsile Yesu, Yehova ua mu sanguile a ka yoyele muilu na ku mu hana ngolo ya kama ku livoko Lieni lia cilio.​—Mateo 28:18; Vilinga 2:32, 33.

Yesu Kilistu a Hasa ku mi Kuasa ku Suena Kuli Njambi

Yesu uezile ha mavu mu tu longesa via Ise. Yehova ua handekele ku tuala hali Yesu ngueni: “Ou muanange i nja lema: mu halakanienu.” (Mako 9:7) Yesu ikeye a tantekeya Njambi ku tuvakana vose. Ivene ua handekele ngueni: “Na umo uahi a tantekeya  . . . iya na pu ise, ku vanga muana lika, no uze uose muana na zange ku mu soluelaye.”​—Luka 10:22.

Yesu ue ku tambuluisa vifua via Njambi mu vutantuluke. Yesu ua tambuluisile vifua via Ise mu vutantuluke, ngeci ua handekele ngueni: “Ou na nji mono ange, na mono Tata.” (Yoano 14:9) Yesu ua lingisile vantu va leme Njambi mu ku muesa cilemo ca Njambi ku hitila mu mezi na vilinga vieni. Ua handekele ngueni: “Yange njila, na vusunga, na muono: na umo uahi eza kuli Tata, ku vanga hali ange.” (Yoano 14:6) Ua handekele naua ngueni: “Vaze va lemesa mua vusunga va ka lemesa Ise mu vimbembesi na mu vusunga: muomu Ise a lengeya vakua ku mu lemesa ngecize vene.” (Yoano 4:23) Aci singaniekenu ha civezikiso eci! Yehova ali na ku tonda vantu ngeci muenu, vaze va tonda ku tantekeya vusunga ku tuala hali ikeye.