1. Fumeko vipanga via Njambi via kala na citantekeyeso cika?

YEHOVA na Yesu va likuatasana fume ha ku tanga ca viuma ha katete. Yehova ua tangele Yesu tele kanda a tange nkala viuma. Kaha Yesu ua pangele neni “ngue mesele ua ku hiana.” (Visimo 8:30) Vangamba va Yehova navo va pangelele hamo mu vipanga vi va kele navio. Ca ku muenako, Noa na vakua ndzivo yeni va tungile vuato hamo. Kaha ntsimbu ya va Isaleli va pangele hamo mu ku tunga tavenakulu, kaha va kele na ku i ambata cihela ku ya cihela. Ku tembele, vembile hamo miaso na ku sika mu ku lemesa Yehova na miaso ya cili. Vantu va Yehova va hasele ku linga viuma viose evi muomu va kele na ku pangela hamo.​—Njenisisi 6:14-16, 22; Numelu 4:4-32; 1 Mizimbu 25:1-8.

2. (a) Cuma cika ca tsimana cikuma ku tuala ha Vakua Kilistu va ku livanga? (b) Vihula vika tu ka lilongesa?

 ² Vakua Kilistu ku sekulu ya ku livanga navo va pangelele hamo. Kapostolo Paulu ua lomboluele ngueni vutuhu va kele na vu hasi vua ku liseza-seza, na vipanga via ku liseza-seza, kasi va pangelele hamo. Vose va kavele Ntuamena yavo Yesu Kilistu. Paulu ua va setekesele ku muvila ua kala na vilio via ku liseza-seza, vunoni via pangelele hamo. (Tandenu 1 Kolintu 12:4-6, 12.) Amba yetu co lelo lino? Vati tu hasa ku pangela hamo mu ku ambulula, mu cikungulukilo, na mu vusoko?

3. Cimona cika kapostolo Yoano ua muene?

³ Ku sekulu ya ku livanga, kapostolo Yoano ua kele na cimona ca tungelo 7 va kele na ku sika ma luneta. Omu kangelo ua mu 5 ua sikile luneta, Yoano ua muene “ntangantanga ya muilu ya ku ua ha mavu: kaha va mu hele sapi ya cina cize ka cesi na masima. Kaha ikeye ua sokoluele ku cina cize ka cesi na masima; kaha muisi ua fumine ku cina, ngue muisi ua lutengo lua kama-kama; kaha litangua na lilu lia lavele omo muisi ua cina. Kaha ku muisi kua tuhukile vambimba ha mavu; kaha va va hele ngolo, ngue manieue a mavu vali na ngolo. Kaha va va lekele ngecize kati va pihise muila ua mavu, cipue cuma cimosi ca ku tontola, cipue umosi muti, vunoni vantu vaze lika ka vesi na citantekeyeso ca ku maholo avo.” (Ku-Solola 9:1-4) Yoano ua tantekeyele ngecize vambimba va hasa ku pihisa viuma via seho, kaha va lingilemo mu Ingito ku matangua a Mosesa. (Ezundu 10:12-15) Vambimba va muene Yoano vemanena Vakua Kilistu va ku Vuavesa ve ku ambulula muzimbu ua ngolo ku tuala ha vulombelo vua makuli. Kaha kuli naua makulukazi na makulukazi a vaze va ka yoya ha mavu navo vali na ku likuatesa navo. Vose ve ku pangela hamo mu ku ambulula. Eci cipanga caco ca kuasa vantu va vengi ku patuka ku vilongesa via malombelo a makuli na ku ngolo ya Satana.

4. Cipanga cika va na pande ku linga vantu va Njambi, kaha mu njila ika imo lika va hasa ku linga?

⁴ Va tu hana cipanga ca ku ambulula “muzimbu ua cili” ku vantu mu mavu ose ntsimbu kanda ku kotoka ci hete. Ca pua cipanga ca kama mpundu! (Mateo 24:14; 28:19, 20) Tua pande ku lania vose vali na “mpuila” va ku nue “mema a muono;” eci ca lomboloka ngecize tua pande ku longesa vusunga vua Mbimbiliya ku vose va vu tonda. (Ku-Solola 22:17) Vunoni tu hasa lika ku linga eci cipanga, nga tu “litokakana mua cili” na ku pangela hamo na vakuetu mu cikungulukilo.​—Efeso 4:16.

5, 6. Vati tue ku pangela hamo omo tu ambulula muzimbu ua cili?

⁵ Tua pande ku liviukisila vuino mu cipanga cetu ca ku ambulula, linga tu hete ku vantu vose. Vitume vi tue ku tambula mu cikungulukilo vie ku tu kuasa ku lingamo. Mu tue ku likungulula mu ku ya mu ku ambulula, tue ku ya na ku handeka na vantu via muzimbu ua cili ua Vuangana. Kaha naua tue ku hana mikanda ya vilongesa via Mbimbiliya. Mua vusunga tu na hana makulukazi na makulukazi a mikanda yaco mu mavu ose. Vintsimbu vimo ve ku tu lania ku ya mu ku ambulula ca ku lifuila. Nga mu linga eci cipanga, muli na ku pangela hamo na makulukazi a vamuanetu mu mavu ose vaze vali na ku ambulula muzimbu ua cili! Kaha naua muli na ku pangela hamo na tungelo vali na ku kuasa vantu va Njambi ku ambulula muzimbu ua cili.​—Ku-Solola 14:6.

⁶ Tue ku viukilila cikuma mu tue ku tanda mizimbu ya mu Anuário, ku tuala ha cipanga cetu ca ku ambulula mu mavu ose. Aci singaniekenu ku likata cetu mu mavu ose mu tue ku lania vantu ku ya ku viuano vietu via mihato. Ku viuano viaco tue ku halakana muzimbu umo lika. Vimpande, vueho na vimueso vie ku tu kolesa ku pangela Yehova na ndzili yetu yose. Kaha naua tue litokakana kumo na vamuanetu mu mavu ose ha ntsimbu ya Mulalelo nkala muaka. (1 Kolintu 11:23-26) Tue ku likungulula ha litangua limo lika ku cinguezi 14 ya Nisane, mu ku muesa ku santsela cetu ku viuma via tu lingila Yehova na ku kava lisiko lia Yesu. Ntsimbu kanda litangua lia Mulalelo li ci hete,  mu vimo visimano tue ku panga hamo mu ku lania vantu va vengi ve ku lipandakana netu ha cilika ca seho ya kama.

7. Vika tu na hasa ku linga mu ku pangela hamo?

⁷ Mbimba umo, ka hasa ku pihisa via vingi. Netu nga lika lietu ka tu hasa ku ambuluila ku vantu vose. Omo lia ku pangela hamo lika, tu na hasa ku lekako makulukazi a vantu via Yehova na ku va kuasa va mu singimike na ku mu sangaziala.

8, 9. (a) Cimueso cika Paulu ua pangesele linga a longese Vakua Kilistu ku pangela hamo lika? (b) Vati tu hasa ku pangela hamo mu cikungulukilo?

⁸ Paulu ua lomboluelele vakua Efeso vati va tumbika cikungulukilo, kaha ua handekele ngueni vose mu cikungulukilo citondeka va “kole mu viuma viose.” (Tandenu Efeso 4:15, 16.) Paulu ua setekesele vilio via muvila mu ku lombolola ngecize nkala Mukua Kilistu a hasa ku kuasa ku pangela hamo na ku kava lungano lua Yesu, Ntuamena ua cikungulukilo. Ua handekele ngueni vilio via muvila viose vie ku pangela ha ‘manunga ose, ku ciseteko ca vipanga via vilio viauo.’ Ngeci mukemuo, ambe nga tua pua tu vanike ni tua kolo, tuli na cihindu ca cili ni kuahi, vika tua pande ku linga tu vose?

⁹ Yesu ua hangula vakuluntu linga va tuamenene cikungulukilo, kaha a tonda tu va singimike na ku kava vitume vi ve ku tu hana. (VaHevelu 13:7, 17) Vutuhu ka ca puile ca casi, vunoni tu hasa ku vundila Yehova a tu kuase ku ononoka. sipilitu santu yeni i ka tu kuasa ku ononoka nkala citume ci va tu hana vakuluntu. Singaniekenu naua ha vukuasi vu tu hasa ku hana mu cikungulukilo, nga tu likehesa na ku pangela hamo na vakuluntu. Ku ka kala ku litavasiana mu cikungulukilo cetu, kaha cilemo cetu ku umo na mukuavo ci ka kola na ku kaniama.

10. Vati vakua ku kuasa vipanga ve ku kuasa cikungulukilo ku pangela hamo? (Talenu cikupulo ca ku vuputukilo.)

¹⁰ Vakua ku kuasa vipanga navo ve ku kuasa cikungulukilo ku pangela hamo. Ve ku panga na ngolo yose mu ku kuasa vakuluntu, tu va santsela ku vipanga viavo. Ca ku muenako, vakua ku kuasa vipanga ve ku lihakela kapandi ka ku tu hana mikanda i tue ku tuala mu ku ambulula, kaha ve ku tambula vakua ku iza ku viuano vietu. Ve ku panga na ndzili yose mu ku viukisa Ndzivo ya Vuangana na ku i komba. Nga tu pangela hamo na va vamuanetu, tu ka lipandakana mu ku pangela Yehova mu njila ya mu ya ku mutima.​—Talenu Vilinga 6:3-6.

11. Vika vakuendze va hasa ku linga va kuase cikungulukilo ku pangela hamo?

¹¹ Vamo vakuluntu va cikungulukilo, va pangele cikuma ku miaka ya ku nima. Vunoni halumo ka va hasa ku panga ngue laza omo lia ku kola. Vamuanetu va vakuendze va hasa ku va kuasa. Nga va va longesa, va hasa ku tala via vingi mu cikungulukilo. Kaha nga vakua ku kuasa vipanga va panga na ndzili yose, mu ku hita ca ntsimbu va hasa ku pua vakuluntu va mu cikungulukilo. (1 Timoteo 3:1, 10) Vamo vakuluntu va cikungulukilo va pua vakuendze, kaha kasi va li na ku tualelelaho ku ya ku lutue. Vamo va na pu honi tuniungi va ku zinguluka, kaha vali na ku kuasa vamuanaye mu vikungulukilo. Ce ku tu vuisa ndzolela ku mona vakuendze vali na cizango ca ku pangela vamuanaye.​—Tandenu Visamo 110:3; Ekelesiaste 12:1.

12, 13. Viuma vika vi hasa ku kuasa vose ku litavasiana mu vusoko?

¹² Vati tu hasa ku kuasa vakuetu mu vusoko linga tu pangele hamo? Ku lemesa mu vusoko ci hasa ku tu kuasa. Nga visemi na vana va kala hamo ntsimbu ya kama mu ku lilongesa via Yehova, cilemo ha kati kavo ci ka kola. Mu ntsimbu yaco va hasa ku tantekeya vi va ka handeka  mu ku ambulula, eci ci ka kuasa vose ku liviukisila. Kaha omo vose va simutuila hamo via vusunga vu va lilongesa, cilemo cavo kuli Yehova ci ka kola na cizango ca ku tonda ku mu ononoka, kaha eci ci ka va suenesa mu hiehi vose.

¹³ Vati yala na mpuevo va liambata va hasa ku litavasiana umo na mukuavo? (Mateo 19:6) Nga vose va lema Yehova na ku mu pangela hamo, va kevua ndzolela mu vulo. Va na pande naua ku muesa cilemo ku umo na mukuavo, ngue mua lingile Avilahama na Sala, Isake na Lembeka, na Elekana na Hana. (Njenisisi 26:8; 1 Samuele 1:5, 8; 1 Petulu 3:5, 6) Nga yala na mpueyeni va lingamo, va hasa ku pangela hamo na ku suena mu hiehi na Yehova.—Tandenu Ekelesiaste 4:12.

14. Nga yalieni ni mpueyenu ke ku pangela Yehova, vika mua pande ku linga mu kolese vulo vuenu?

¹⁴ Mbimbiliya nguayo ka tua pandele ku liambata na muntu ke ku pangela Yehova. (2 Kolintu 6:14) Vunoni kuli vamuanetu va liambata na vamo ka va puile Vakaleho va Yehova. Vamo va lilongesele vusunga tele vali laza mu vulo, kaha mukua ndzivo yavo ka puile Mukaleho. Vamo co halumo va li ambatele na umo ngamba ya Yehova, vunoni mpueyavo ni yaliavo ua tunda mu cikungulukilo. Ha vintsimbu via cifua eci Vakua Kilistu ve ku lihakela kapandi ka ku kaniamesa vulo vuavo mu ku kava vinguli via Mbimbiliya. Mua vusunga kati ca casi. Ca ku muenako, muanetu Mary na yalieni David, va kele na ku pangela Yehova hamo lika. Kaha David ua likelele ku ya mu ku kunguluka. Vunoni Mary ua likolesele ku pua mpuevo ua cili mu ku lekesa vifua via Mukua Kilistu. Ua longesele naua vana veni 6 via Yehova kaha ua tualeleleho ku ya mu ku kunguluka na ku viuano. Kaha omo vana va kolele va mu sezelele naua, Mary ua tualeleleho ku pangela Yehova vutuhu ca mu kaluuilile. Vunoni David ua putukile ku tanda mikanda ya kele na ku mu sezela Mary. Mu ku hita ca ntsimbu, ua putukile ku kunguluka naua. Mutekulueni ua miaka 6 ntsimbu yose ua kele na ku mu vuahesela citumamo, kaha nga David ka solokele mu ku kunguluka, ua kele na ku handeka ngueni, “Kuku ka nja ku muene lelo mu ku kunguluka.” David ua hilukile kuli Yehova mu nima ya miaka 25. Vuovuno neni na mpueyeni vali na ndzolela ngecize vali na kupangela Yehova hamo lika naua.

15. Vati vaze vali na miaka ya yingi mu vulo va hasa ku kuasa vaze va na liambata vuovuno?

 ¹⁵ Satana ua lema ku luisa vusoko matangua ano. Ngeci mukemuo yala na mpuevo ve ku pangela Yehova, va pande ku pangela hamo. Cipue nga mua liambata laza, puenu na ku singanieka ha vika mu hasa ku handeka ni ku linga mu kaniamese vulo vuenu. Nga mua liambata laza, mu hasa ku muesa lungano kuli vaze va na liambata vuovuno. Hamo mu hasa ku lania vaze va na liambata vuovuno ku ndzivo yenu mu ku lemesa hamo navo mu vusoko. Va ka mona ngecize, ambe nga mua hiti miaka ya ingi fume ha mua liambatela, kasi mua pande ku muesa cilemo ku umo na mukuavo.​—Tito 2:3-7.

16, 17. Vika va lavelela va ngamba va Njambi mu ku pua vakua ku litavasiana?

¹⁶ Omo vaIsaleli va ile mu ku ka hitisa cilika ku Yelusalema, va pangelele hamo. Va liviukisilile viose via tondekele mu vungendzi. Kaha, vendele hamo na ku likuasa umo na mukuavo. Ku tembele, vose va sangazialele na ku lemesa Yehova hamo lika.(Luka 2:41-44) Lelo lino, omo tu liviukisila ku ka yoyela mu mavu a aha, tua pande ku litokakana kumo lika na ku pangela hamo lika. Mu hasa ku singanieka ha vinjila vi mu hasa ku ka linga evi.

¹⁷ Vantu mu mavu ano ka ve ku litavasiana, kaha ve ku liluisa ha nkala viuma. Vunoni etu tu santsela kuli Yehova mu ku tu hana ciyulo na ku ivuisisa vusunga! Vantu veni mu mavu ose vali na ku mu lemesa mu njila ya mu ya ku mutima. Kaha cikumakuma ku matangua ano a ku kotokela, vantu va Yehova vali na ku pangela hamo. Ngue mu va polofetele va Isaya na Mika, tu li na ku ya hamo ku “muncinda ua Yehova.” (Isaya 2:2-4; tandenu Mika 4:2-4.) Tangua tu ka viukilila cikuma ku lutue, omo vantu vose ha mavu “va ka litokakana” na ku ka pangela hamo mu ku lemesa Yehova!