CITUME CA MBIMBILIYA: “Kati mu ume mutima omo muono uenu.”​—Mateo 6:25.

Aa mezi a lomboloka vika? Yesu ua handekele aa mezi mu Cimpande ceni ca ha Muncinda. Limo livulu lia lombolola mezi a Mbimbiliya mu ciNgelengu, ngualio “ku uma mutima” ca pua “ku linienieta ce ku linga muntu omo lia vuhutu, ndzala na visoti vikuavo vie ku lihita navio tangua na tangua.” Ku uma mutima ca ambatela kumo na ku lisosomua viuma vi hasa ku soloka ku lutue. Ka ca puile vuhenge ku uma mutima ku viuma via tu kambela na via vantu va tua lema. (Filipu 2:20) Vunoni Yesu mua handekele ngueni, “kati mu kome mitima,” ua kele na ku mamuna vakua ku mu kava ngueni kati vome cikuma mutima, ku lisosomua cikuma via mene ci hasa ku vuisa muntu vusiua ku litangua lia lelo.—Mateo 6:31, 34.

Eci cimpande caco ci hasa ku kuasa lelo? Ca pua ku zangama nga tu niunga eci cimamuna ca Yesu. Omo lia vika? Amo mavulu a muesa ngecize ku uma cikuma mutima ce ku zeyesa vantu mu visinganieka, kaha ce ku neha “visoti via cihindu ngeci mua vimbandu muzimo, ku vavala mbunge na vuvezi vua cihuihui.”

Yesu ua tumbuile vusunga vua pande ku tu lingisa ku likela ku uma ngoco mutima: ka ce ku kuasa. Yesu ue huile ngueni: “Iya ha kati kenu, ha ku uma mutima, a hasa ku vuezelela kamukeya ku vulahe vua muono ueni?” (Mateo 6:27) Ku lisosomua cikuma via muono uetu, ka ci hasa ku vueza ku ntsimbu ya ku yoya cetu cipue kavundende lika. Cikuavo naua viuma ka vie ku soloka ngue muze mu tua vi singanieka. Umo mulongisi ua sonekele ngueni: “Ku uma mutima ku viuma via ku lutue, ca pua ku lisina ngoco, kaha naua viuma ka vie ku soloka ngue mu tue ku vi singanieka.”

Vika vi hasa ku tu kuasa ku tepulula ku uma mutima? Ca katete, tsilielenu muli Njambi. Nga Njambi ue ku suka tuzila na ku zika vintsani, vuno a ka honoua ku suka vaze va tuameka via ku mu lemesa mu muono uavo ni? (Mateo 6:25, 26, 28-30) Ca mu civali, viukililenu na vize vi muli navio mu ntsimbu yaco. Yesu ua handekele ngueni, “Kati mu umine mitima ku litangua lia mene: muomu litangua lia mene li komina mutima likelio livene.” Nenu mue ku mona ngecize nkala ‘kayando ke ku soloka mu litangua liako’ ni vati?—Mateo 6:34.

Ku niunga cimamuna ca Yesu ci hasa ku tu kuasa ku liniunga ku visoti vikuavo. Tu ka hasa ku ivua ciyulo ca mu ntima, ci va tumbula mu Mbimbiliya “ciyulo ca Njambi.”​—Filipu 4:6, 7.