1, 2. (a) Lombololenu omo lia vika mbatizimu ya pua cinanga ca ntsindo ya kama. (b) Vusunga vuka na pande ku kala navuo muntu ntsimbu kanda va mu mbatize, kaha omo lia vika?

Mua pua umo ua vanike va li na cizango ca ku va mbatiza ni? Nga mukemuo, ci ka pua ku vezika ca kama. Ngue mu tua muene mu cilongesa ci na hiti, mbatizimu ya pua cinanga ca seho ya kama. Ye ku muesa ngecize mua lihana kuli Yehova, kaha mua likuminia ku mu pangela miaka yose, kaha mu ka tuameka ku lutue cizango ca Njambi mu muono uenu. Mu ku linga eci ku likuminia caco ca pua ca seho ya kama kuli Njambi, mua pande lika ku ya ku mbatizimu nga mua kolo kavundende mu lutsilielo, muli mpundu na cizango ca ku lingamo, kaha mua tantekeya vika ca lomboloka ku lihana kuli Njambi.

² Halumo, mu hasa ku livua ngue mu na puho ha ku ya ku mbatizimu. Ni halumo mu singanieka nguenu mu na puho, vunoni visemi nguavo nga mu ci lavelelako kavundende. Vati mua pande ku linga? Kati mu hilukile mu nima. Mu hasa ku pangesa ntsimbu ya lisupuko mu kole mu lutsilielo linga mu puisemo mu ku ya ku  mbatizimu. Ntsimbu mu ci liviukisila mu hasa ku pangela ha vinanga evi vitatu: (1) Vi mua tsiliela, (2) Vilinga vienu na (3) ku santsela cenu.

3, 4. Vika vanike va hasa ku lilongesa ku lungano lua Timoteo?

³ Aci singaniekenu vati mu hasa ku kumbulula evi vihula: Vusunga vuka vua nji lingisa ku tsiliela ngecize Njambi kua kala? Vika vi nji lingisa ku tsiliela ngecize Mbimbiliya ya tunda kuli Njambi? Vika nje ku niungila masiko a Njambi ku hiana ku temunuina cifua ca mavu? Evi vihula vi hasa ku mi kuasa ku kava cimamuna ca kapostolo Paulu ngueni: “mu eseke ngue omo mua kala na cizango ca Njambi, cikeco ca cili, ca mu leme, ca ku tantuluka.” (Loma 12:2) Vika mua pande ku lingilamo?

⁴ Lungano lua Timoteo lu hasa ku mi kuasa. Ikeye ua tantekeyele vuino Visoneka, muomu va naye na va kukueni va mu longeselevio. Ngeci Paulu ua lekele Timoteo ngueni: “Kalamo mu viuma ovio viu na lilongesa, novio viu na tantekeya cili-cili.” (2 Timoteo 3:14, 15) Aa mezi “viu na tantekeya cili-cili” a na lomboloka ngecize “ku kala mpundu na vusunga vua cimo cuma.” Timoteo ua tantekeyele mpundu ngecize vusunga a hasa ku vu uana mu Visoneka. Ua vu tavele kati muomu va naye na va kukueni va mu sindiyile ku lingamo, houe, vunoni ua konkele ha viuma via lilongesele, ngeci ua kakatelele vize via cili.​—Tandenu 1 Tesalonika 5:21.

5, 6. Omo lia vika ca pua ca seho ku lilongesa ku “singanieka vuino” mu vunike?

⁵ Amba yenu co? Halumo laza mua sua ku lilongesa vusunga. Nga mukemuo, kaha mu hasa ku lihakela kapandi ka ku singanieka ha vusunga vua viuma vi mua tsiliela. Ku lingamo ci ka mi kuasa ku kaniamesa lutsilielo luenu na ku mi ohiela mu ku linga viuma via vipi, omo lia ntsindiye ya vakua mavu ni cipue visinganieka vienu.

⁶ Nga mu lilongesa ku “singanieka vuino” ku vunike, mu ka hasa ku kumbulula vakuenu mu va ka mi linga vihula ngeci mua: ‘Vati ua tantekeya nguove Njambi kua kala? Nga Njambi ua tu lema omo lia vika uecelela tuyando? Nga Njambi ua tangele viose, iya ua mu tangele?’ Nga mua lilongesa Mbimbiliya ntsimbu yose, vihula via cifua eci ka vi ka katula vimpata mu mutima, vunoni vi ka mi lingisa ku hilula vuino Mbimbiliya.

7-9. Vati site jw.org i hasa ku mi kuasa ku kala na vusunga vua viuma vi mua tsiliela?

⁷ Ku lilongesa vuino Mbibmiliya mu vulika nkala litangua ci hasa ku mi kuasa ku kumbulula vihula, ku fumisa vimpata na ku kaniamesa lutsilielo luenu. (Vilinga 17:11) Tua kala na vikuata via vingi vize vi hasa ku mi kuasa ku lingamo, ngeci mua mikanda, mavulu, vivideo na vikuavo vi tu hasa ku uana mu jw.org. Evi viose va vi pangela ku mi kuasa ku kaniamesa lutsilielo luenu na mu viuma vi mua tsilela.

⁸ Nga mue ku lilongesa Mbimbiliya, citava halumo mu tantekeya laza vikumbululo via vimo vihula via Mbimbiliya. Vika via mi lingisa ku tsiliela ngecize vikumbululo vienu via pua via vusunga? Vikuata vi mu hasa ku uana mu jw.org vi ka mi kuasa ku singanieka vuino ha imo mikanda ya Mbimbiliya i ka mi kuasa ku lombololuela vakuenu vi mua tsiliela. Nga mue ku pangesa internete, vika ka mu vi puisila ku pua mutamba ua cilongesa cenu mu vulika?

⁹ Mua pande ku limuena ngecize mua uana vusunga. Muomu ci ka mi kuasa ku liviukisila mbatizimu. Umo muanetu ua kanike ua handekele ngueni: “Ntsimbu kanda va nji mbatize, nja lilongesele Mbimbiliya, na ku mona ngecize ovu vukevuo vulombelo vua vusunga. Kaha tangua na tangua ovu vusunga vuaco vua livuezelelele.”

10. Vika tu handekela nguetu Mukua Kilistu ua ku mbatiza na pande muesa vilinga via litombola na viuma via tsiliela?

¹⁰ The Bible says: “Faith by itself, without works, is dead.” (James 2:17) If you have strong conviction, you will show it by your actions. You will have what the Bible calls “holy acts of conduct and deeds of godly devotion.”​—Read 2 Peter 3:11.

11. Lombololenu mezi “vilinga via ku lela.”

 ¹¹ “Vilinga via ku lela” via pua vika? Muntu mukua vilinga via ku lela ua kala na kakesi ka cili. Ca ku muenako, aci singaniekenu ha vingonde 6 vi na hiti. Mu mua hitile mu ceseko, mua singaniekele vuino ha vika via cili na via vipi ni? (VaHevelu 5:14) Mu vuluka ntsimbu imo mua likolesele mu ceseko ca ku tonda ku linga vizango via vavusamba venu ni? Mue ku muesa vilinga via cili ku sikola ni? Mue ku ononoka Yehova ni mue ku seteka ku lifuisa na vakuenu linga kati va mi yengule? (1 Petulu 4:3, 4) Tua tantekeya nguetu ka tua tantulukile. Cipue vaze va sua laza ku pangela Yehova, ntsimbu imo ve ku ivua ntsoni ya ku ambuluila ku vakuavo. Vunoni muntu ua lihana kuli Njambi na pande ku ivua ndzolela ya ku pua Mukaleho ua Yehova, kaha a hasa ku muesa ngoco mu vilinga vieni via ku lela.

12. Tumbulenu vimo “vilinga via ku lemesa Njambi,” kaha vati tua pande ku vi muenamo?

¹² “Vilinga via ku lemesa Njambi” via pua vika? Via ambatela kumo na vipanga vi mue ku linga mu cikungulukilo, ngeci mua ku ya mu ku lemesa na ku ambulula. Vunoni via ambatela naua kumo na vipanga vi tue ku linga, kua lika lietu, ngeci mua ku vundila Yehova na cilongesa ca vulika. Muntu ua lihana kuli Yehova ke ku singanieka ngueni evi vipanga via pua citeli. Vunoni ue ku livua ngue  Muangana Ndaviti ua handekele ngueni: “Nji zolela mu ku linga cizango cove a Njambi yange cili, lisiko liove li li mu kati ka mutima uange.”​—Visamo 40:8.

13, 14. Vika vi hasa ku mi kuasa “ku muesa vilinga via ku lemesa Njambi,” kaha vati vamo vanike va na hasa ku uana vukuasi mu ku lingamo?

¹³ Mu ku mi kuasa ku puisamo vinanga vi mua likuminia, kuli vimo vihula vi mua pande ku hilula, kaha citava mu soneke vikumbululo vienu ku vihula evi: “Vati via fua vivundilo vienu, vie ku solola cilemo cenu kuli Yehova ni?” “Vika mue ku tumbula mu vivundilo vienu?” “Mue ku ya mu ku ambulula cipue nga visemi venu ka va yi ni?” Mu hasa naua ku soneka nkala vutumbe vu mu tonda ku puisamo, ngeci mua ku vueza ku vutongue vua vivundilo, ku lilongesa mu vulika, na mu ku ambulula.

¹⁴ Cingi ca vanike ve ku ya ku mbatizimu va na limuena ngecize ku soneka vutumbe vu vali navuo ci hasa ku kuasa cikuma. Umo muanetu ua mpuevo ua lizina Tilda ngueni ua kele na ku soneka vutumbe vueni, kaha ua vu puisilemo vumo ku vumo. Kaha mu nima ya muaka ua hasele ku ya ku mbatizimu. Muanetu mukuavo ua kanike ua lizina Patrick neni ua lingilemo naua. Ikeye ngueni: “Ange nja tantekeyele laza vutumbe vuange, vunoni ku vu soneka ca nji hele ndzili ya ku panga linga nji vu puisemo.”

15. Lombololenu omo lia vika ku lihana ca pande ku pua ku cizango ca muntu.

¹⁵ Mu hasa ku lihula nguenu: “Nji ka tualelelaho ku pangela Yehova cipue nga visemi na vavusamba vange va likela ni?” Mu mua lihanene kuli Yehova na ku mi mbatiza, nenu mu ka kala na vusamba vuenu na Njambi. Ngeci ka mua pandele ku pangela Yehova omo lia visemi ni nkala muntu. Vilinga vienu via ku lela na vilinga vienu via ku lemesa Njambi vi solole ngecize mua uana vusunga, mua vu tsiliela kaha mu tonda ku kava vitume via Njambi. Eci ci ka muesa ngecize mua puisamo ku mi mbatiza.

16, 17. (a) Vika via pande ku sindiya muntu ku pua Mukua Kilistu? (b) Vati ku santsela cetu ku cikombelo va na cimuesa?

¹⁶ Umo yala ua tantekeyele vuino Lisiko lia Mosesa, tangua limo ue huile Yesu ngueni: “Lizi lika lia kama ku mezi a lisiko?” Yesu ua mu tavele ngueni: “U ka lema muangana Njambi yove na mutima uove uose, na muono uove uose, na mana ove ose.” (Mateo 22:35-37) Yesu ua lomboluele ngueni, ku lema Yehova cikeco ca pande ku lingisa muntu va mu mbatize na ku pua mukua Kilistu. Njila ya ku koleselamo cilemo cenu kuli Yehova ya pua ku singanieka vuino ha cikombelo ca ku-kula, vuana vua hiana seho vua hele Njambi ku vantu. (Tandenu 2 Kolintu 5:14, 15; 1 Yoano 4:9, 19.) Nga mu lingamo, mu kevua ntsindiye ya ku santsela ku vuana vua seho ya kama.

¹⁷ Mu hasa ku muesa ku santsela cenu ku cikombelo, nga mu singanieka mu cifua eci: Aci singaniekenu, nga tele mu tse mu ndonga, ngeci ku na soloka umo na mi zavulula, vuno mu kanduka lika na ku ya mu suva muntu na mi zavula ni? Houe! Mu ka muesa ku santsela ku muntu ua mi ovuele ntsimbu yose mu muono uenu! Na vuno vuene, tua pande ku muesa ku santsela kuli Yehova na Yesu omo lia cikombelo. Va tu hele muono! Va tu patula ku vupi na kutsa. Lelo lino tuli na lulavelelo lua muono ua yaye mu Palandaizi ha mavu, omo lia cilemo cavo kuli etu!

18, 19. (a) Vika ka mua pandele ku ivua vuoma vua ku lihana kuli Yehova? (b) Vati ku pangela Yehova ci hasa ku mi kuasa ku yoya muono ua cili?

¹⁸ Mue ku santsela ku viuma via mi lingila  Yehova ni? Nga mukemuo, ku lihana kuli Yehova na ku mi mbatiza ci ka pua cuma ca cili ku ci linga. Ku lihana cenu kuli Njambi ca muesa ngecize mua likuminia ku linga cizango ceni miaka yose. Vuno mua pande ku ivua vuoma vua ku lingamo ni? Houe! Yehova ua tonda mu yoye vuino, kaha a ka mi vezikisa omo lia ku linga cizango ceni. (VaHevelu 11:6) Nga mu lihana kuli Njambi na ku mi mbatiza, ka mu ka yoya muono ua kayando kuahi, vunoni mu ka yoya muono ua ndzolela! Umo muanetu ali na miaka 24 va mu mbatizile tele a cili ua mundende ua handekele ngueni, “Nga mu vukuluntu, halumo nga nja tantekeyele vuino visoneka, vunoni ku hangula ku lihana kuli Yehova mu vunike ca nji niungile ku via mavu.”

¹⁹ Yehova ua tonda ngueni mu kale vuino. Vunoni Satana mukua vusa ka mi lemene. Ka kele na viuma via cili via hasa ku mi hana nga mu mu kava. Vati a hasa ku mi hana viuma vintsa kesi navio? Ikeye kesi na muzimbu ua cili, kaha kesi na lulavelelo. A hasa lika ku mi hana lulavelelo lua ku pihia, muomu lukeluo lua na lavelela!—Ku-Solola 20:10.

20. Viuma vika kanike na pande ku linga a lihane na ku mu mbatiza? (Talenu naua cikasa “Vimpande vi mi Kuasa ku Kola mu Lutsilielo.”)

²⁰ Ka kuesi vutumbe vua hiana seho ngue ku lihana kuli Yehova. Mua liviukisila ku lingamo ni? Nga mukemuo kati mu ivue vuoma vua ku likuminia. Vunoni nga mu ivua ngueni kanda, kavenu vimamuna vili mu cilongesa cino, kaha tualelelenuho ku kola mu lutsilielo. Paulu ua lekele vamuanaye ku Filipu va tualeleleho ku kola mu lutsilielo. (Filipu 3:16) Nga mu kava eci cimamuna vuovuno mu ka lihana kuli Yehova na ku mi mbatiza.