VUANA vua kama vua pande ku tu sindiya ku muesa ku santsela. Yesu ua tsindikile vi tu lilongesa ku tuala ha ku santsela, mua kanguisile vamala likumi ku vuvezi vua kama. Umo ua vaze vamala likumi “ua hilukile na ku zumbangeya Njambi na lizi lia kama.” Kaha Yesu ua hulile ngueni: “Ka va kangukile vose likumi, ni? Vunoni vakuavo vatanu na vuana va li kulihi?” (Luka 17:12-17) Vika tu lilongesaho? Ca casi ku suva ngozi i ve ku tu muesa vakuetu!

Ka kuesi vuana vueka vua lifua na cikombelo ca Yesu. Ca pua vuana vua seho ku hiana vuana vuose vua kalako. Kaha vati honi mua pande ku linga ku tuala ha viuma via mi lingila Njambi?

• Tantekeyenu uze ua vu hana. Cikombelo ca Yesu ka ci ka lingisa vantu vose ku ka uana ngoco muono ka ue ku hua. Vunoni Yesu ua vundilile ngueni: “Muono ka ue ku hua ukeuo ou, ku ku tantekeya ove Njambi umo lika ua vusunga, na uze i ua tumine, ikeye Yesu Kilistu vene.” (Yoano 17:3) Nga muntu a mi leka ngueni umo yala uovuele muono uenu tele mu vanike, ka mu kevu cizango ca ku tantekeya yala uaco na vika ua mi ovuelele ni? Yehova Njambi, uze ua tu hana cikombelo covola muono  uetu, a tonda mu mu tantekeye na ku pua kavusamba keni. Mbimbiliya ya tu mamuna nguayo: “Suenenu kuli Njambi, kaha ikeye a ka suena kuli enu.”—Tiango 4:8.

• Muesenu lutsilielo mu cikombelo. “Uze a tsiliela Muana, a li na muono ka ue ku hua ua ya-ye.” (Yoano 3:36) Vika ca lomboloka ku muesa lutsilielo? Ca lomboloka ku muesa mu vilinga ngecize tua tsiliela mu cikombelo. (Tiango 2:17) Vilinga vika? Linga vuana vua na mi hana muntu vu pue vuenu mua pande ku vu tava na ku vu tambula. Na vuno vene mua pande ku tava cikombelo. Mu njila ika? Lilongesenu vati Njambi ua tonda linga mu yoye, kaha yoyenu mu cifua caco. * Vundilenu Njambi a mi ecele ku vipi na ku mi hana mutima ua ku lela. Suenenu kuli Njambi na vusunga vua mutuntu, ngecize cikombelo ca hana ca sokoluela njila vose va muesa lutsilielo mu cikeco, linga va ka yoye muono ua cili mu ciyulo na ndzolela!—VaHevelu 11:1.

• Puenu na kuya ku Mulalelo ua Ku-tsa ca Yesu. Yesu ua tumbikile cilika ca ku linga nkala muaka, cize ce ku tu vuluisa vuana vua cikombelo. Ku tuala ha ku linga cilika caco, Yesu ua handekele ngueni: “Lingenu ngecize mu ku nji vulukilaho ange.” (Luka 22:19) Vakaleho va Yehova va ka linga cilika caco Lia mu Civali 11 ya Abril, 2017 mu nima ya ku toka ca litangua. Programa yaco i ka ambata ola imo. Ku ka kala cimpande ci ka lombolola ku-tsa ca Yesu na vivezikiso vi tu hasa ku uanamo ntsimbu ino na ku lutue. Muaka uali ku cilika caco kua kungulukile vantu va heta ku 20 milhões. Tua mi lania mua ku likungulule netu cilika ku eci ce ku muesa ku santsela cetu ku vuana vua ku hiana vua tu hana Njambi.