CISONGESO ca cisonekeso ca manungu ca ali na ku tambula Jordan ci soloka ngue ka cesi na seho. Vunoni, kuli ikeye ca pua ca seho ya kama. Jordan ua handekele ngueni: “VaRussel, umo kavusamba ua vusoko vuetu mu va nji hanene vuana vuaco tele nji kanike.” Mu nima ya kutsa ca Russel, Jordan ua tantekeyele ngecize Russel ua kuasele cikuma vakuku yeni na visemi veni na ku va kuasa mu vintsimbu via ku kaluua. Kaha Jordan ngueni “mu nji na tantekeya vikuavo ku tuala hali vaRussel, ovu vuana vua cisongeso vua livuezelela seho kuli ange.”

Ngue mu u na muesa muzimbu ua Jordan, vuana vu hasa ku kala na seho kuli vamo vantu vakuavo kuahi. Kuli vakua ku santsela, vuana vua kala na seho ya kama-kama. Mbimbiliya ya lombolola vuana vua hiana seho, na aa mezi a ku tsimana cikuma: “Muomu Njambi ua lemene vakua mavu cikuma, ngecize ua hele Muaneni umo lika, linga uose a mu tsiliela kati a ka nonge, vunoni a kale na muono ka ue ku hua ua ya-ye.”—Yoano 3:16.

Nga muntu a tambula vuana vu mu lingisa a ka kale na muono ka ue ku hua! Kuli vuana vueka vua hiana ovu ni? Vutuhu vamo ve ku sembulula vuana vuaco, kuli Vakua Kilistu vuana vuaco vua “seho ya kama.” (Visamo 49:8; 1 Petulu 1:18, 19) Omo lia vika Njambi ua hanene muono ua muaneni ku pua vuana kuli vakua mavu?

Kapostolo Paulu ua kumbulula eci cihula ngueni: “Hali yala umo lika, vupi vua kovelele hano ha mavu, na ku-tsa ha vupi; kaha ngecize vene ku-tsa ci na hete ku vantu vose.” (Loma 5:12) Yala ua katete Andama, ua vulumuine mu ku muesa lisino kuli Njambi ku cizango, kaha va mu hele kasitiku ka ku-tsa. Ku hitila muli Andama, ku-tsa cezile ha mbuto yeni yose—ni nguetu vantu.

 “Muomu fueto ya vupi, ku-tsa; vunoni vuana vua Njambi, muono ua miaka yose ua ya-ye muli Kilistu Yesu muangana uetu.” (Loma 6:23) Linga ovole vantu ku ku-tsa, Njambi ua tumine muaneni Yesu Kilistu ha mavu mu ku hana muono ueni ua ku tantuluka. Ku hitila mu cikombelo caco ci va luka nguavo “ku-kuka,” vose ve ku muesa lutsilielo muli Yesu va ka tambula muono ua ya ye.—Loma 3:24.

Ku tuala ha vivezikiso via hana Njambi kuli vakua ku mu lemesa ku hitila muli Yesu, Paulu ua handekele ngueni: “Tu na santela kuli Njambi omo vuana vueni vukevuo ka vu tava ku vu tumbula.” (2 Kolintu 9:15) Mua vusunga, cikombelo ca Yesu ca komouesa cikuma, ka tu hasa ku ci lombolola mu vutuntu. Vunoni omo lia vika vuana vua cikombelo vua hiana vuana vukuavo vuose vua tu hana Njambi? Mu njila ika vua litepa na nkala vuana vukuavo vua tu hana Njambi? * Kaha vika tua pande ku linga ku tuala ha vuana vuaco? Tua mi lania mu tande vikumbululo via Mbimbiliya ku vihula evi, mu vimpande vivali vi na hatako..