“LIKALU citava li ye, vunoni ou Chinês a sala!” Akeo mezi a vuile Alexandra tele ali mu likalu, lia lavelelele ku zavuka ngamba ya vimo vifuti vivali via ku Amerika do Sul. Ngeci ua sulukile a tantekeye citanga ca kele naco mukuendze ua Chinês tele a seteka ku lomboluela pulisia mukua ku niunga ngamba ya cifuti, mu spanhole ya ku lisuma-suma. Kaha mu ku linga Alexandra ua kele na ku kungulukila mu cimo cikungulukilo ca Chinês ca Vakaleho va Yehova, ua lihanene mu ku kuasa uze Chinês.

Uze mukuendze ua lomboluele ngueni ua puile mukua vusunga vunoni va mu pundile mikanda ya vumbangi na vimbongo. Ha katete, pulisia ka tevele via mu lekele Chinês kaha ua singaniekele ngueni Alexandra ua pua mukua ku landesa vantu. Mu nima ya ntsimbu, ua tavele via handekele uze Chinês kaha na ku mu fuetesa muomu ka kele na mikanda ya vumbangi. Mu ku linga ka kele na vimbongo, Alexandra ua tavele ku mu kumuisa 20 ndolale. Uze Chinês ua santselele cikuma na ku likuminia ku fueta vimbongo vi tuvakana 20 ndolale kuli Alexandra. Vunoni Alexandra ua lomboluele ngueni ka tondele ku mu fueta; ua tondele lika ku kuasa muomu nkala muntu na pande ku kuasa mukuavo. Ngeci ua mu hele imo mikanda ya handeka via Mbimbiliya na ku mu kaniamesa a ka lilongese Mbimbiliya na Vakaleho va Yehova.

Ce ku vuisa ndzolela, ku ivua mizimbu ya vantu vakua ku muesa vuhuanga kuli vantu ka va tantekeya. Vuhuanga ve ku vu muesa ku vantu va mu malombelo ose kaha na vaze ka va tsilielele. Nga yenu mua keleko nga mua hasele ku lihana mu ku kuasa ni? Eci cihula ca seho muomu Yesu ua handekele ngueni: “Ku-hana ca hiana ku tambula mu ku vezika.” (Vilinga 20:35) Kaha ca seho naua kuli vakua siensia muomu nguavo ku hana ce ku kuasa. Mu vinjila vika? Tu vi hilulenu.

Ku yoya ca vantu ca muesa ngecize vuhuanga na ndzolela vie ku endela hamo. Kapostolo Paulu ua handekele ngueni ‘Njambi ua lema uze ue ku hana na ndzolela.’ Ua kele na ku handeka via Vakua Kilistu va hanene vuana mu ku kuasa vamuanaye mu lutsilielo va kele mu visoti. (2 Kolintu 8:4; 9:7) Paulu ka muesele ngecize va puile vihuanga muomu va vuile ndzolela houe. Vunoni ngueni, va vuile ndzolela muomu va puile vihuanga.

Umo muzimbu ua vakua ku tondesesa nguauo “ku hana ce ku hindula imo mitamba ya vuongo ize ye ku tu vuisa ndzolela, ku tu lingisa ku likata na vakuetu na ku likulahela umo na mukuavo, kaha eci ce ku kuasa muvila.” Muzimbu ukuavo nguauo “nga muntu a hana vimbongo ku mukuavo ue ku ivua ndzolela cikuma ku hiana nga vimbongo viaco a vi pangesa ivene.”

Vuno muevuaho laza ngecize ka mu hasa ku kuasa muntu omo lia vuhutu ni visoti vieka ni? Vunoni ku handeka vusunga, nkala  muntu a hasa ku ivua ndzolela ya kala mu “ku hana.” Nga muntu na hana na mutima ua cili, ka ci tondeka vuana vueni vu pue vua ndando ya kama. Umo Mukaleho ua Yehova ua tumine umo muzimbu hamo lika na vuana kuli vakua ku tuhula uno mukanda, ngueni: “Mu miaka yose eyi, nje ku hana lika tu milambu tua tundende mu Ndzivo ya Vuangana. Vunoni ua vuezeleko ngueni: “Yehova Njambi na nji hiluisila via vingi ku hiana na vize vi nje ku mu hana. . . . Nja santselako mu ku nji tavesa ku hana ovu vuana muomu ku lingamo ce ku nji vuisa ndzolela.”

Mua vusunga vantu ve ku hana vuana vua ku liseza-seza, kati vimbongo lika.

Mbimbiliya nguayo: “Mukua cikeketima a linga mua cili na muono ueni ivene; vunoni uze ua keniuka a yandesa ntsitu yeni ivene.” (Visimo 11:17) Vakua cikeketima va pua vihuanga, kaha ve ku tava ku hana ntsimbu yavo, ngolo na mana avo mu ku kuasa vakuavo. Eci ce ku va kuasa mu vinjila via ku liseza-seza, ha kati kavio, ku kuasa ku cihindu.

Vakua ku lilongesa via muvila, nguavo vaze ve ku lihana mu ku kuasa vakuavo, ka ve ku vavala-vavala cikuma. Vakua ku vavala mavezi ka eku kanguka ngeci mua kalongolo (HIV) na mavezi akuavo, ve ku uana vukuasi ku cihindu nga va kuasa vakuavo. Muzimbu ukuavo nguauo vaze va tonda ku seza ku nua vuala kaha ve ku lihakela kapandi ka ku muesa vuhuanga, ka ve ku uila ku-sua kumo mu citanga cavo kaha ve ku ci seza vuasi.

Kaha eci ce ku soloka, muomu nguavo “cikeketima, vuhuanga na ngozi vie ku tepulula visinganieka via ku henga mu mutima.” Vuhuanga vu hasa ku tepulula cikela na litima. Kaha vantu ve ku tsisa mpuevo ni yaliavo, ve ku kanguka ku litima nga va lihana mu ku kuasa vakuavo.

Ka kuesi vimpata ngecize vuhuanga vue ku kuasa mpundu.

Yesu ua mamuine vandongesi veni, ngueni: “Hanenu, nenu va ka mi hia; cisetekeso ca cili, ca ku konkena, ca ku nikumuna. Muomu na ciseteko ci mue ku seteka naco enu, va ka mi seteka naua.” (Luka 6:38) Nga mu hana cuma ku muntu, citava a ka tambula vuana vuenu na ndzolela kaha neni a ka pua cihuanga. Ngeci mukemuo ku hana ce ku sambeya vusamba na ku likata ha kati ka vantu.

Vakua ku lilongesa via vusamba ha kati ka vantu, va handekele nguavo “vantu vakua ku muesa ngozi ntsimbu yose, ve ku lingisa vakuavo ku kava lungano luavo.” Mua vusunga ambe ku tanda lika muzimbu ua muntu ua muesele ngozi, ce ku lingisa vantu ku pua vakua ngozi.” Ngeci mukemuo umo muzimbu nguauo “nkala muntu a hasa ku lingisa vakuavo ku mu temunuina, ambe nga vavengi cikuma, vamo halumo na ku va tantekeya ka va tantekeya.” Ni nguetu nga muntu a linga cimo cilinga ca ngozi, a hasa ku lingisa vakuavo va putuke ku limuesa ngozi umo ku mukuavo mu limbo liose. Nga mu uana limbo lia cifua oco, mu ivua ndzolela ya ku  yoyelamo ni vati? Mua vusunga nga vantu va vengi va pua vihuanga mu hasa ku-iza vukuasi vua vuingi.

Umo muzimbu u tundilila ku Florida, E.U.A ua muesa vukuasi vuaco. Cimo civunga ca Vakaleho va Yehova ca lihanene mu ku kuasa ku tungulula vimo vindzivo via lundumukile ku mpuendza. Mu va kele na ku lavelela vitenga via ku tunguluisa imo ndzivo, va muene ngecize citali ca imo ndzivo ya kele sinia lize ca papukile kaha va lihanene mu ku ci viukisa. Mu nima ya ntsimbu, iveneco ua tumine mukanda ku cikota ca mu mavu ose ca Vakaleho va Yehova, ngueni: “Nji ka mi santsela ku miaka yose. Kanda nji uane vantu va mitima ya cili ngeci mua vaze.” Mutima ua ku santsela ua mu lingisile ku hana mulambu u ka kuase ku cipanga ca Vakaleho va Yehova ca sangalele cikuma ngueni ca komouesa.

Vakua siensia va uana mu ku tondesesa cavo ngecize “vantu ve ku semuka na cizango ca ku kuasa.” Kaha naua nguavo “vanike ve ku muesa vuhuanga ambe nga kanda va putuke ku handeka.” Omo lia vika? Mbimbiliya ya kumbulula nguayo muomu vantu va va tanga mu “ciseteko ca Njambi” ni nguetu va kala na vifua via cili via kala navio Njambi.—Njenesisi 1:27.

Cimo ca vifua via ku komouesa via Sakatanga ca pua vuhuanga. Muomu ua tu hana muono na viose via tondeka, linga tu yoye mu ndzolela. (Vilinga 14:17; 17:26-28) Tu hasa ku tantekeya Tatetu ua muilu na vutumbe vueni mu ku lilongesa Lizi lieni. Mbimbiliya ya muesa naua ngecize Njambi na tu viukisila muono ua cili ku lutue. * (1 Yoano 4:9, 10) Mu ku linga Yehova Njambi ikeye Ndundzi ua vuhuanga kaha va mi tanga mu cifua ceni, ka ca pandele ku mi komouesa ngecize vuhuanga vu hasa ku mi kuasa na ku lingisa Njambi a mi leme.—VaHevelu 13:16.

Mu ci vuluka Alexandra u tu na tumbuile ku vuputukilo ni? Vati ua huile uze muzimbu ueni? Vutuhu umo mukuavo mu vendelele ua mu payele ngueni na pihisa vimbongo vieni, vunoni uze yala ya kuasele ua sanene vavusamba va mu mbonge i va kele na kuya, kaha ua hiluisile ize 20 ndolale. Cikuavo naua uze yala ua kavele cimamuna ca Alexandra ua putikile ku lilongesa Mbimbiliya. Kaha mu nima ya vingonde vitatu Alexandra ua viukilile ku liuana neni ku ciuano ca limbo ca Vakaleho va Yehova ku Peru mu lilimi lia Chinês. Linga a muese ku santsela ceni kuli Alexandra vose va ile neni ku ciuano, uze yala ua va laniene ku imo ndzivo ya vulilo.

Vuhuanga na ku kuasa vakuetu ce ku neha ndzolela ya kama. Cikuma-kuma, nga tu kuasa vakuetu ku tantekeya vuino Ndundzi ya vuana vua cili vuose, Yehova Njambi! (Tiango 1:17) Nenu mue ku tambula vivezikiso via kala mu ku hana ni?