Vumo vuana vue ku pua vua seho nga va na mi hanavuo kuli mukua vukama ni muntu u mua singimika cikuma. Vuana vukuavo, ambe nga vua ndando ya indende, vunoni vantu ve ku vu haka seho muomu va va hanavuo kuli kavusoko ni kavusamba ua ha mutima. Mukemuo mu vua fuile vuana vua hanene Russel kuli Jordan, va tu na tumbuile mu cimpande ci na hiti. Vati evi via likuata na vuana vua cikombelo?

Ca katete, Mbimbiliya nguayo “Njambi na tumu Muaneni umo lika ha mavu linga tu yoye hali ikeye.” (1 Yoano 4:9) Ovu vusunga vua lingisa vuana vua vikombelo ku pua vua seho. Ka kuesi na umo uahi ua hiana Njambi ku vukama. Ku tuala hali ikeye, umo mukua visamo ua kaHevelu ua sonekele ngueni: “Yove lika, lizina liove Yehova, Yove Mukua ku Hiana viose hose ha mavu.” (Visamo 83:18) Ka kuesi Ndundzi yeka ya kama i tu hasa ku tambula vuana ku hiana Yehova.

Ca mu civali, Njambi ua pua “Tatetu.” (Isaya 63:16) Vati omuo? Ua tu hana muono. Kaha ue ku tu niunga na lukakatela ngue cisemi a niunga vana veni. Mua handekele na vantu veni va tumbuile ngueni Efalimi, Njambi ua va hulile ngueni: “Efalimi ikeye muanange i nja lema ni? . .  mutima uange u mu vuila vusona; mua vusunga nji ka mu vuila cikeketima.” (Yelemiya 31:20) Na lelo lino, Njambi mukemuo mue ku ivua ku tuala ha vangamba veni. Ka puile lika Sakatanga uetu ua Ngolo vunoni ua pua naua Tatetu ua lukakatela na Kavusamba ketu. Nkuma evi ka via pandele ku lingisa nkala vuana vua tu hana ku pua vua seho ya kama ni?

Vumo vuana vua kala na seho, kati muomu va tu hanavuo ku ntsindiye, vunoni omo lia cilemo. Cihuanga ua vusunga ke ku tonda ku mu fueta omo lia ngozi ye ku muesa.

Njambi ua tu hele muaneni muomu ua tu lema. Mbimbiliya nguayo “mukemuo cilemo ca Njambi ca solokele muli etu, omo Njambi na tumu Muaneni umo lika ha mavu.” Omo lia vika? “Linga tu yoye hali ikeye.” (1 Yoano 4:9) Vuno Njambi va mu kakateyele ku lingamo ni? Houe! Cikombelo ni nguetu “ku-kuka cize ci li hali Kilistu Yesu” ca pua vuana vua “ku kavumbi” ka Njambi.—Loma 3:24.

Omo lia vika cikombelo ca Njambi ca muesa “kavumbi” keni? Mbimbiliya nguayo: “Njambi a muesa cilemo ceni kuli etu, muomu muze te tu vakua vipi, Kilistu ua tu tsilile.” (Loma 5:8) Cilemo ca Njambi ca ku hona vunkondi ca mu lingisile ku kuasa vantu vutuhu vakua ku zeya kaha vakua vupi. Ka tua nganialele cilemo caco, kaha ka tu hasa ku ci fueta. Ovu vuana vueni vukevuo cimueso ca cilemo ca hiana mu mavu ose.

Vumo vuana vua kala na seho muomu uze ua vu hana ua lihakelele kapandi ka kama ka ku vu puisamo. Nga muntu a tava ku hana ni ku landesa cuma ca seho ya kama kuli ikeye linga a tu hane vuana, tue ku vu haka seho ya kama omo lia viuma via ileho mu ku vu puisamo.

Njambi “ua hele Muaneni umo lika.” (Yoano 3:16) Ka kuesi ueka ua seho ya kama ya pandele ku tu hana Njambi ku hiana muaneni. Mu ku hita ca makulukazi na makulukazi a miaka omo Njambi ua tangele melu na mavu, Yesu ua pangele hamo na ise kaha ua “puile ndzolela yeni.” (Visimo 8:30) Yesu ikeye “Muana uze ua cilemo” ca Njambi kaha “Ikeye cifua vene ca Njambi.” (Kolose 1:13-15) Mua vusunga vusamba vuavo vua hiana vusamba vuose mu melu na ha mavu.

Vunoni Yehova “ka tetelele” “cipue muaneni ivene.” (Loma 8:32) Ua tu hanene vuana vua kama cikuma vua kala navuo. Ka kele na vuana vueka vua ku hiana hali muaneni.

Vumo vuana vua kala na seho muomu vue ku puisamo cuma ca tondeka cikuma mu muono, ni ci tondeka vuasi-vuasi. Ca ku muenako, singaniekenu nga muli na vuvezi vu tuala ku ku-tsa vunoni ku soloka muntu a mi fuetela ku saka cize ci ohiela muono uenu! Vuana vuaco vu ka pua vua seho ya ku hiana kuli enu, ni vati?

“Ngue muli Andama vose va li na ku tsa, mukemuo naua muli Kilistu vose va ka va yoyesa.” (1 Kolintu 15:22) Mu ku pua mbuto ya Andama, tu vose tue “ku tsa” kaha ka tu hasa ku tina ku vusungu vua mavezi na ku-tsa ni ku lihamba na Njambi. Tu vantu va ngoco ka tu hasa ku li “yoyesa” etu vavene ni vakuetu. Kaha Mbimbiliya nguayo: “Na umo uahi uavo a hasa ku kula muanaye na hamo hahi, cipue ku hana evi via ku mu kula kuli Njambi . . . Kaha va ci honoua ku miaka yose ya ya-ye” (Visamo 49:7, 8) Tua tondeka vukuasi vua kama muomu ka tu hasa ku lifuetela cikombelo etu vavene. Lika lietu ka tuesi na ku tinina.

Omo lia vukama vua cilemo ceni, Yehova ua tu fuetela “ku saka” cohiela muono uetu, linga ku hitila muli Yesu ‘tu vose va ka tu yoyese.’ Vati cikombelo ca vi puisamo? Ku hitila mu “maninga a Yesu Muaneni a tu vukisa ku vipi viose.” (1 Yoano 1:7; 5:13) Kaha vika ci ka puisamo cikombelo ku tuala ha vavusoko  vuetu va tsa? Mbimbiliya nguayo “ngue omo ku-tsa cezile hali muntu umo, mukemuo vene hali muntu umo [Yesu] ha neza ku-sanguka ku vatsi.”—1 Kolintu 15:21. *

Ka kuesi vuana vua tunda ku muntu ua seho ya kama cikuma ni vu va hana omo lia cilemo ca kama ku hiana cikombelo ca Yesu. Ka kuesi ueka ua hana via vingi hali etu ku hiana via hana Yehova. Kaha ka kuesi vuana vua puisamo cuma ca tondeka cikuma mu muono uetu, ku hiana vuana vua ku tu kula ku vupi na ku ku-tsa. Mua vusunga ka kuesi vuana vueka vua ku komouesa ku hiana cikombelo.