NGA NENU mua tsisaho laza muntu u mua lema, nenu citava mua vuile mua ku liseza-seza, ngeci mua: vusiua, vu lika na ku livua ku paya. Ni mua vuile citaku-taku, vutenu na vuoma. Halumo mua hetele vene na ha ku lihula nga kasi ku yoya ca pua ca seho ni ci li ku lutue ku tsa.

Vunoni tantekeyenu ngecize ku linienga ka ca puile ku zeya. Vunoni ce ku muesa ngecize uze na tsi ua kele na seho ya kama kuli yenu. Vutuhu ngoco, kuli cimo cihula ca seho: Vuno kuli vimo vi hasa ku mi kuasa ku tepulula vusiua vuenu ni?

Vutuhu mu hasa ku livua ngecize ku vavala ci muli na ku ivua ku mutima ka ci ka hua, vunoni ku linga evi ci hasa ku mi kuasa:

LINIENGENU MU NKALA NTSIMBU I TONDEKA

Vantu va liseza-seza, ngeci mukemuo cifua ci tue ku liniengelamo na ntsimbu i ce ku ambata ku linienga caco, ya liseza-seza. Vunoni ku lila ca pua ngue vutuhukilo vua viuma via ku liseza-seza vi tue ku ivua ku mutima. Vanessa u tu na tumbuile ha katete ngueni: “Vintsimbu vimo nja kele na ku lila lika, muomu nja tondekele ku tundisa ku vavala ci nja kele na ku ivua ku mutima. Sofía ua tsisile ntsongo yeni, ua handekele ngueni: “Ku singanieka ha ku-tsa ca ntsongo yange ce ku nji vavala cikuma ku mutima. Ca pua ngue ku fukula na ku kusa ha mbandu. Vutuhu, muntu ue ku ivua ku vavala ngue a tsa, vunoni ce ku kuasa mbandu ku kanguka.”

 PUENU NA KU LEKAKO VAKUENU VISINGANIEKAVIENU NA VATI MULI NA KU LIVUA

Mua vusunga, vintsimbu vimo mu hasa ku ivua cizango ca ku kala lika lienu. Vunoni vusiua vua pua citeli ca kama cikuma, kati mu ci ambate lika lienu. Jared umo kankavala ua miaka 17, ua tsisile ise, a vuluka ngueni: “Nja kele na ku lekako vakuetu vati nja kele na ku livua. Omo lia ku zeya, nji mona vakuetu ka va vuile vuino vi nja kele na ku handeka, vunoni ku vi handeka ca nji kuasele cikuma.” Janice u tu na tumbuile mu cimpande ca katete, ua muesa vukuasi vukuavo ngueni: “Ku lekako vakuetu ca nji lembeziekele cikuma. Nja vuile nguange nkuma kuli vamo va li na ku nji ivuisisa, kaha eci ca tepuluile ku vulika vuange.”

AVENU VUKUASI VU VA MI HANA

Umo ndotolo ngueni: “Vakua ku tsisa ve ku tavesa vavusamba na vavusoko va va kuase mu matangua a katete mu nima ya ku tsisa, ve ku hasa ku tualelelaho ku kolesa ambe mu miaka ye ku hatako.” Lekenu vakuenu vika mpundu va hasa ku linga mu ku mi kuasa; muomu vamo halumo ve ku tonda ku kuasa, vunoni ka va tantekeya vukuasi vuka mpundu va hana.—Visimo 17:17.

SUENENU KULI NJAMBI

Tina ngueni: “Mua tsile yaliange ku cancer, ka nja hasele ku simutuila neni, ngeci honi nja kele na ku leka viose kuli Njambi! Nkala cimene nja kele na ku mu vundila linga a nji kuase ku hita vuino litangua liaco. Njambi ua nji kuasa mu vinjila ka nji hasa ku tandanga.” Mu va tsile vanaye ya Tarsha, va mu sile na miaka 22. Vika vie ku mu kuasa? Ivene ngueni: “Ndundzi ya vukuasi vuange ya puile ku tanda Mbimbiliya nkala litangua. Nja kele na ku uanamo mezi a ku kaniamesa cikuma a nja kele na ku singanieka litangua liose.”

SINGANIEKENU HA LITANGUA LIA KA SANGUKA KAVUSOKO KENU

Tina ua vuezeleko naua ngueni: “Ha katete lulavelelo lua cisangukilo ka lua kele na ku nji lembezieka muomu nja tondele yaliange, kaha vana vange va tondele ise mu ntsimbu ize vene. Vunoni lelo lino, mu nima ya miaka 4, nja likuatelela honi ku lulavelelo luaco. Lua pua honi ngue mpango yange. Ku singanieka ha litangua li nji ka mu mona lueka ce ku nji hana ciyulo na ndzolela!”

Vusiua vuenu ka vu ka tepuluka mu litangua lia ngongo. Vunoni via lihitile navio Vanessa vi hasa ku tu kaniamesa. Ikeye ngueni: “U hasa ku singanieka nguove ka vi ka hita, vunoni matangua a cili tangua a keza ku lutue.”

Vulukenu ngecize, vutuhu vusona ka vu hu mu mutima uenu, kasi ci li ku lutue ku yoya. Na vukuasi vua Njambi, mu hasa ku kala na vavusamba va cili na ku kala na vutumbe mu muono. Kaha vuovuno Njambi a ka sangula vatsi. A tonda naua tangua mu ka livumbatele lueka na kavusoko kenu. Kaha ku vavala ci mue ku ivua mu mutima ci ka kanguka ku miaka yose!