NENU muevuaho laza cizango ca ku-tsa omo lia visoti vienu ni? Nga mukemuo, kaha vi va na handeka vaAdriana vi na mi lomboloka vuino. Va kele na ku lisosomua cikuma na ku ivua vusiua na vungoco. VaAdriana va va uanene na vuvezi vua litima.

Kaoru, umo yala mukua Japão, ua niunga visemi veni ku vusinakazi vuavo ngueni: “Ha ntsimbu yaco tele vikuama vi na nji lundama ku vipanga, kaha nja zimbalesele cizango ca ku-lia na ku kosa cilavu-lavu. Via nji lanenene cikuma, ngeci nja vuile cizango ca ku tsa.”

Ojebode, umo Yala ua ku Nigeria ngueni: “Vusiua vua nji hianene cikuma kaha mu ntunda ya laha, nja puile honi nji samasozi, ngeci nja tondele ku litsiha.” Vunoni kali-kali vaOjebode, vaKaoru na vaAdriana ka va litsihile. Vunoni ca vusiua ku handeka ngecize nkala muaka makulukazi a vantu ve ku litsiha vavene.

Vamala vakevo ve ku litsiha cikuma, kaha cingi cavo ve ku ivua ntsuama ya ku vundila vukuasi. Yesu ua handekele ngueni vavezi va tondeka ndotolo. (Luka 5:31) Ngeci mukemuo, nga mu livua ngoco, sukulukambu kati mu ivue ntsuama ya ku vundila vukuasi. Cingi ca vantu ve ku pinda na litima nguavo ku tambula vihemba ku sipitali ce ku kuasa cikuma. VaOjebode, vaKaoru na vaAdriana vose va tambuile vukuasi ku vandotolo kaha ca va kuasele cikuma.

Vandotolo va hasa ku pangesa vihemba mpundu ni ku simutuila mu ku kuasa vakua ku vavala litima. Vaze va kala mu visoti viaco va tondeka vukuasi vua vavusoko na vavusamba. Yehova Njambi ikeye kavusamba ua kama cikuma ua hasa ku kala neni muntu, muomu ue ku tu hana vukuasi ku hitila mu Lizi lieni Mbimbiliya.

Vakua ku vavala litima va tondeka ku va saka mu ntunda ya laha na ku va longesa vati va pande ku yoya na vuvezi vuavo. Kaha nga mua vavala litima, mu hasa ku lavelela muono ua cili ku lutue ngue mua linga Ojebode. Ojebode ngueni: “Nja lavelela ku lipuisamo ca Isaya 33:24, ize ya muesa ngecize tangua na umo uahi a ka handeka ngueni ‘Nji vavala.’” Ngeci mua Ojebode, tsilielenu mu cikulaheso ca “mavu a aha” muze ka mu ka kala “ku vavala.” (Ku-Solola 21:1, 4) Eci ca lomboloka ngecize ku vavala cose cipue ca mu visinganieka ni ca mu vuongo vi ka hua. Ci li vene ku vavala cose ci mue ku ivua ci ka hua. Mua vusunga, nkala ku vavala ci mue ku ivua ‘ka mu ka ci vuluka naua, cipue mu visinganieka vienu ka vi ka hitimo naua’ na limo litangua liahi.​—Isaya 65:17.