Nga mu na Hiti mu Ciyovo ca Mavu
“Ha katete tua livuile nguetu hano hakeho ha u na lengela muono uetu. Muomu viose vi tua kele navio via pihile ni ku nonga ku mavazi na vutompe.”—Andrew, Serra Leoa.
“Mu nima ya mpuendza, tua hilukile ku ndzivo. Vunoni na vimo vi tua uaneneho vene viahi. Ka tua hasele ku handeka lizi na limo liahi ku tala lika. Muanange ua mpuevo ua vuliamene ha mavu na ku lila mbimbi.”—David, Ilhas Virgens.
NGA MUA hitaho laza mu ciyovo ca mavu kaha mu tantekeya vuino vi ve ku lihita navio vantu mu ntsimbu yaco: Kue ku kala ku lisimuoka, ku viana ngecize visoti viaco ka via solokele, muyoyo, ku uma mutima, na ku vi lota-lota. Cingi ca vaze ve ku ovoka ve ku ivua vusiua vua kama kaha ka ve ku tonda naua ku yoya.
Nga nenu mua zimbalesa viose omo lia ciyovo ca mavu, mu hasa ku livua ngecize ci li ku lutue ku-tsa. Vunoni, Mbimbiliya ya muesa ngecize ci li ku lutue mu tualeleleho ku yoya kaha kalenu na vusunga ngecize tangua mu ka yoya vuino ku lutue.
KU TANTEKEYA VUSUNGA VUA MU MBIMBILIYA CE KU TU LINGISA KU TUALELELAHO KU YOYA
Ekelesiaste 7:8 nguayo: “Vusula vua cuma vua hiana vusangumukilo vuaco.” Nga vuovuno mu na ovoloka ku ciyovo, mu hasa ku livua ngue ka muesi na lulavelelo. Vunoni omo mu linga cose mu viukise muono uenu, viuma vi hasa ku vuaha.
Mbimbiliya ya polofetele laza ngecize ku ka kala ntsimbu omo “ka va kevua naua lizi lia ku lila na lizi lia ku linienga.” (Isaya 65:19) Evi vi ka lipuisamo omo mavu va ka alulula ku pua citungu mu ku sika ca Vuangana vua Njambi. (Visamo 37:11, 29) viyovo ka vi ka kalako. Kaha nkala viuma via ku vavalesa ku mutima vi tua muene na vitamba ni ku vavala ci tua tundisaho, viose vi ka hua ku miaka yose. Njambi Mukua Ngolo yose ua tu kulahesa ngueni: “Vize via laza ka va ka vi vuluka, cipue ku heta ku visinganieka.”—Isaya 65:17.
Aci singaniekenuho: Sakatanga na liviukisila ku mi hana “lulavelelo” lua muono ua cili mu ku sika ca Vuangana vueni vua ku tantuluka. (Yelemiya 29:11) Vati ku tantekeya ou muzimbu ci hasa ku mi kuasa ku ivua cizango ca ku tualelelaho ku yoya? Sally, u tu na tambuile mu cimpande ca katete, ngueni, “Ku tualelelaho ku livuluisa viuma via cili vi vu ka linga Vuangana vua Njambi ku lutue, ci hasa ku mi kuasa ku tundisa visinganieka ku visoti via ku nima na ku mi kuasa ku kolesa mu visoti via ntsimbu ino.”
Sukulukambu tua mi lania mu lilongese viuma vi vu ka lingila vantu Vuangana vua Njambi ku lutue! Ku lingamo ci ka mi hana vusunga ngecize vutuhu mu na hiti mu ciyovo, ku tualelelaho ku yoya ci li na seho kaha ku lutue viyovo via mavu ka vi ka kalako naua. Vunoni mu ntsimbu ino, Mbimbiliya ye ku tu tuamenena mu vinjila vi tu kuasa ku pinda na visoti vie ku iza mu nima ya ku hita mu ciyovo ca mavu. Tu talenu vimo vinjila viaco.
