Ca ku muenako, umo mpuevo ua lizina Sally, a ku Estados Unidos, ua zimbalesele vitenga vieni ku mpuendza, ua handekele ngueni: “Nja vuile ngecize ka nji hasa naua ku tualelelaho ku yoya, cili ku lutue vene, nji tse. Visoti vi na lana cikuma.”

Cisoti cikuavo ca kama mu muono ca pua nga kavusoko na tsi. Janice, umo mpuevo ua ku Australia ngueni: “Mu va tsile vana vange vavali, nja vuile ngue muono uange u na puzuka mu vivalavala. Ngeci nja lambelele Njambi nguange: ‘Tata, ka njesi na ku hasa naua, vusiua vu na lana cikuma! Sukulukambu, nji tonda ku-tsa, nji fumeko.’”

Vupangala navuo vue ku kaluuisa cikuma-kuma muono. Umo yala Ndaniele, mpueyeni ua mu endele vungungu. Ua handekele ngueni: “Omo mpueyange ua litavelele ngueni na nji ende vungungu, nja vuile ngue va na nji tuvu mpoko ku mutima. Vutuesi vua ku vavala caco vua kele na ku nji hilukila mu vingonde via vingi.”

Ovu Vutala vu lombolola omo lia vika ci li ku lutue ku tualelelaho ku yoya ambe nga

• Mu hita mu ciyovo ca mavu

• Mu na tsisa kavusoko

• Mukua ndzivo yenu na mi ende vungungu

• Muli na vuvezi vua vukalu cikuma

• Ku yoya ci na mi kaluuila cikuma

Ngeci mukemuo, ha katete, tu talenu vati tu hasa ku pinda na visoti nga tu na hiti mu ciyovo ca mavu?