MU KUE KU SOLOKA VIMPONDE NENU MUE KU LIHULA NGA ‘NJAMBI UA MUENEKO NI?’ HALUMO NTSIMBU IMO MU MUONO UENU MUA HITILE MU VIMO VIA MI LINGISILE KU LIHULA NGA NJAMBI UA MI HAKA SEHO?

Halumo mua livuile ngue vaSheila, va ku Estados Unidos. Va kolela mu vusoko vua Vakua Kilistu, vunoni nguavo: “Tunde ku vunike nja lema Njambi muomu ua pua Sakatanga uetu. Vunoni ka nje ku livua mu hiehi neni. Ngue ua kele na ku nji talela lika ha laako. Nja kele na ku livua ngue vutuhu Njambi ka nji zindile vunoni ka nji hakele seho.” Omo lia vika vaSheila va kele na ku livua ngecize? Va handekele nguavo: “Ha ndzivo yetu tua hitile mu visoti via kama ku sua kumo, kaha ku talamo vene Njambi ka lingileko na mumo muahi.”

Ngeci mua vaSheila, nenu mu hasa ku kala na vusunga ngecize Njambi Mukua Ngolo yose kuali. Vunoni, mu hasa ku lihula nga nenu ua mi haka seho mpundu. Yombi muntu ua vuoloke, ua tsilielele mu ngolo na mana a Sakatanga, ntsimbu imo neni ua livuile ngoco. (Yombi 2:3; 9:4) Mu nima ya ku hita mu visoti via mu nokelele ngue niondzi ue huile Njambi ngueni: “Vikandzo u vandesela cihanga cove na ku nji tumbula citozi cove?”​—Yombi 13:24.

Vika ya handeka Mbimbiliya? Vuno Njambi ikeye mukua mulonga ku tuyando tuetu ni? Vuno kuli vukaleho vu muesa ngecize Njambi ua haka seho ku vantu vose na ku muntu na muntu ni? Vuno citava tu vose muntu ku muntu a tantekeye nga Njambi ue ku tu tuala mana, ku tu ivuisisa, ku lihaka mu cihela cetu, ni ku tu kuasa nga tuli mu tuyando ni?

Mu vimpande vi na hatako, tu ka mona vati via tanga Njambi vi tu longesa ngecize Njambi ua tu haka seho. (Loma 1:20) Kaha, tu ka hilula vi ya handeka Mbimbiliya ku tuala ha seho ya tu haka Njambi. Omuo mu ka mu “tantekeya” ku hitila mu viuma via tangele na Lizi lieni, mu ka kala na vusunga ngecize “ikeye a mi lela.”​—1 Yoano 2:3; 1 Petulu 5:7.