Ola ya katete ya kakeke mue ku tunda muzimo ye ku pua ya ku lifuila cikuma-kuma. Omo lia vika? Muomu ha ntsimbu yaco he ku putuka lizitiko lia seho ya kama lie ku kuata na ku ku kola ca kakeke. *

Vika vie ku lingisa mpuevo ku likata cikuma na kakeke mua cisemuke? Umo mulongisi Jeanette Crenshaw ua lomboluele mu The Journal of Perinatal Education ngueni kua kala imo hormonio oxitocina “ye ku vundula cilemo ca mpuevo mue ku kuata kakeke, ku mu vunga-vunga, na ku mu amuesa.” Ha ntsimbu yaco kue ku vunduka naua hormonio ikuavo “ye ku lingisa mpuevo ku likata na muana.” Vika tu lilongesaho?

Sakatanga Yehova Njambi ikeye ua tangele lizitiko lia kama lia kala ha kati ka kakeke na naye. * Muangana Ndaviti ua sangazialele Njambi ngueni “ua nji fumisile muzimo” kaha va mu niungile vuino ha mavoko a va naye. Ua vundilile ngueni: “Fume muzimo va nji mbilile hali ove, yove Njambi yange fume ha nji semenene nana.”—Visamo 22:9, 10.

ACI SINGANIEKENU: Nga Njambi ua tangele lizitiko lia ku komouesa cikuma ha ku semuka ca kakeke na naye linga a mu tale na ku mu niunga, vuno eci ka ci hasa ku tu hana vusunga ngecize Njambi ue ku tu tala muntu ku muntu etu tua pua “mbuto ya Njambi” ni?—Vilinga 17:29.

Yesu Kilistu, a tantekeya Sakatanga ku hiana nkala muntu uose, ua longesele ngueni: “Kave ku landesa tuzila tuvali tua tundende na cindeyi cimo, ni? Kaha na umo uahi uavo a ka uila ha mavu ku vanga ku cizango ca Isuenu: Vunoni na zinkambu vene zia ku mitue yenu va na zi tanda ziose. Ngoco vene kati mu ivue vuoma: seho yenu ya hiana tuzila va vengi.”—Mateo 10:29-31.

Cingi cetu ka tue ku tuala mana ku nkala kazila ua mundende u tue ku mona, ni ku tantekeya ngecize kuli ‘umo kazila na uila ha mavu.’ Vunoni Tatetu ua muilu ue ku va mona umo ku umo vene! Kaha tuzila​—cipue nga tuzila vavengi​—seho yavo kuli ikeye ka ya hianene ya vantu. Vika tu lilongesaho? Vusunga vua ntsindo: “Kati mu ivue vuoma”  ngueni Njambi ka mi tantekeya, houe. Njambi ua mi haka seho ya kama cikuma!

Mbimbiliya i tu hana vusunga nguayo

• “Meso a Yehova a li kuose, mu ku vingila cize ca cipi neci ca viuka.”​—VISIMO 15:3.

• “Meso a Yehova a li kuli vakua vuviuke, Na matuitui eni a na zikuka ku mutambi uavo.”​—VISAMO 34:15.

• “Nji ka zolela na ku viukilila mu ngozi yove; Muomu yove u na mono kayando kange: u na tantekeya muono uange mu lamba.”—VISAMO 31:7.

Vuno ku tantekeya nguetu Njambi ua tu haka mutima na viuma vi tue ku linga ci hasa ku kuasa mumo ni? Cili vene, ngue mu va handekele vaHannah * va ku Inglaterra nguavo:

“Vintsimbu via vingi nja livuile ngecize Yehova ka nji lemene ngeci ka kele na ku tava vivundilo viange. Nja kele na ku livua nguange halumo omo lia ku hona lutsilielo. Nja livuile ngecize ua nji hele kasitiku na ku nji mbila kuti muomu ka njesi na seho. Nja vuile ngecize ke ku nji niunga.”

Vunoni vaHannah, ntsimbu ino ka ve ku livua naua ngecize Yehova ua va mbila kuti. Vika via va lingisa ku aluluka? Va handekele nguavo, “viuma via alulukile kavundende-kavundende, nji vuluka cimo cimpande ca mu Mbimbiliya ca handekele via cikombelo ca Yesu kaha ca nji hetele ku mutima, na ku nji kuasa ku ivuisisa vukama vua cilemo ca Yehova hali ange. Kaha mu nje ku mona vikumbululo via vivundilo viange nje ku nduekesa masozi, nja muene ngecize nkuma Yehova ua nji lema mpundu. Nje ku lilongesa naua via vingi hali Yehova mu ku lilongesa Mbimbiliya na ku kunguluka ku viuano via Vakua Kilistu, nje ku lilongesa vuntu vueni, na visinganieka vieni hali etu. Ka nja kele naua na vimpata ngecize Yehova ua nji lema na ku nji kuasa, kaha ue ku tu niunga muntu ku muntu.”

Aa mezi a vaHannah a kaniamesa. Amba yeni co? Vati mu hasa ku kala na vusunga ngecize Njambi ue ku mi ivuisisa na ku mona viose vi mue ku hita? Cimpande ci na hatako ci ka kumbulula eci cihula.