VALUZIA VE KU VENDUKILA KU MUKONO UA CIMOSUE. Ku vunike va vavalele kalepa. Mu va kele na miaka 16, va kele na ku pangela kuli umo mpuevo, ua va lekele ngueni, “Njambi ua ku hele cihiso omo lia ku muesa lisino kuli va noko.” Mu nima ya imo miaka, kasi vaLuzia ve ku vuluka ku vavala ci va vuile ha mutima.

VADAMARIS MU VA VA UANENE NA KANSER YA MU VUONGO, Va Ise va vehuile nguavo: “Muanange vika u na lingi linga evi vi ku solokele? Nji mona kuli vumo vupi vua kama vu u na lingi. Ngeci mukemuo Njambi na ku hana kasitiku.” Mu nima ya ku ivua aa mezi vaDamaris va zeyele cikuma.

Tunde ku laza vavengi ve ku singanieka nguavo, ku vavala ca pua kasitiku ka Njambi. Limo livulu ngualio: Ku ntsimbu ya Kilistu “Cingi ca vantu va tsilielele nguavo ku vavala cezile ha muntu omo lia vupi vueni ni vua vavusoko veni. Ngeci ua tambula kasitiku ka vupi vuaco.” (Manners and Customs of Bible Lands). Livulu likuavo ngualio, mu miaka 1300 ku tuala 1500 Tele Kilistu Neza, “vavengi va tsililele nguavo Njambi ue ku tuma mavezi mu ku hana kasitiku ku vantu omo lia vupi vuavo.” (Medieval Medicine and the Plague). Vuno vaze makulukazi a vantu va tsile ku Europa omo lia musongo ca puile cihiso ca Njambi ku vantu vakua vupi ni? Ni musongo uaco ua lisanduokele omo lia vabacteria ngue mu va na muenamo vakua ku tondesesa via cihindu? Vamo ve ku lihula nguavo, cili vene Njambi a hasa ku pangesa musongo mu ku yandesa vantu ku vupi vuavo ni? *

ACI SINGANIEKENU: Nga lamba ni ku vavala ca puile kasitiku ka Njambi, omo lia vika Muaneni, Yesu ua kanguisile vavezi? Vuno eci nga ka ca puile ku popolola vuoloke na vuviuke vua Njambi ni? (Mateo 4:23, 24) Yesu nga ka tavele ku luisa vilinga via Njambi. Ngeci ua handekele ngueni: “Ntsimbu yose nji linga vize via mu leme,” “kaha ngue omo Tata ua nji sikile mukemuo vene nje ku linga.”​—Yoano 8:29; 14:31.

Mbimbiliya ya handeka vusunga nguayo, Yehova Njambi “kesi na vupi.” (Ndeutelonomi 32:4) Ca ku muenako, Njambi ka hasa ku koka mponde ya ndeke, mu ku tsiha vihita via vantu, muomu ua tondele ku hisa umo nendelamo! Ngamba ya Njambi ua vuoloke Avilahama ua handekele ngueni Njambi ka hasa ku nongesa mukua vuviuke hamo na mukua vupi” kaha ngueni visinganieka viaco via ‘kala ku laako na Njambi.’ (Njenisisi 18:23, 25) Mbimbiliya ya handeka naua nguayo “Njambi ka tava ku linga via vupi.”​—Yombi 34:10-12.

Mu tue ku hita mu lamba kati Njambi ue ku tu hana kasitiku omo lia vumo vupi. Yesu ntsimbu imo ua lekele vandongesi veni vusunga ha cimpande caco mu va uanene yala ua semukile kapuputa. ‘Vandongesi va mu ihuile, nguavo, Lambi, iyandzo ua lingile vupi, ou, ni visemi veni, ngecize ua semukile kapuputa? Yesu ua kuanieneko, ngueni Cipue ou, cipue visemi veni ka va lingile vupi: vunoni linga vilinga via Njambi vi soloke muli ikeye.’”—Yoano 9:1-3.

Mua vusunga vandongesi va Yesu va komokele, ku mona ngecize uze yala ni visemi veni ka va lingile vupi na vumo vuahi. Muomu ku ntsimbu ize vantu mukemuo mu va kele na ku singaniekela. Yesu mu ku kanguisa uze kapuputa, ua muesele  ngecize nkuma kati vusunga, ku tsiliela ngecize lamba ya pua kasitiku ka Njambi. (Yoano 9:6, 7) Vose vali na ku pinda na mavezi ntsimbu ino, va hasa ku uana ku lembezieka mu ku tantekeya ngecize kati Njambi ue ku va kokela lamba yaco.

Mbimbiliya nguayo

• “Muomu Njambi intsa ka va hasa ku eseka na vupi, na ikeye ivene ke ku eseka umosi.” (TIANGO 1:13) Ngeci mukemuo, “viuma via vipi” vie ku solokela vantu mu vihita via miaka ngeci mua ku vavala, vulema, na ku-tsa vuovuno vi ka nonga.

• Yesu Kilistu ‘ua kanguisile vose.’ (MATEO 8:16) Mu ku kanguisa vose vezile kuli ikeye, muana Njambi ua muesele vi vu ka linga Vuangana vua Njambi mu mavu ose.

• “[Njambi] a ka hunda masozi ose ku meso avo; na ku tsa ka ci ka kala naua; cipue ku-linienga na vusiua ka ci ka kala naua, cipue ku lila, cipue ku vavala viuma via ku livanga vi na hiti.” —KU-SOLOLA 21:3-5.

Kaha omo lia vika honi vantu ve ku hita mu tuyando? Vantu ve ku linga eci cihula tundeko. Nga kati Njambi ue ku tu koka, iya honi tu tuika mulonga? Vikumbululo via vihula evi vili mu cimpande ci na hatako.