Njambi ua tangele mivila yetu na vuhasi vua ku lisaka ivene. Muntu nga ali na muvila ua cihindu, kaha a livulumuna, ni ku lipuesula, muvila ue ku putuka ku lisaka uvene kavundende-kavundende. Ue ku putuka ku imika maninga, ku kuta mbandu na ku hakaho livanda.

ACI SINGANIEKENU: Nga Sakatanga ua tangele mivila yetu mu ku likanguisa ivene, vuno eci ka ci hasa ku tu hana vusunga vua ku mu tsiliela a tu kuase ku kanguka ku vimbandu vietu via mu visinganieka ni? Mukua visamo ua sonekele ngueni: “A kanguisa vaze va na vatuka ku mutima, Kaha a kuta ku zimbandu ziavo.” (Visamo 147:3) Nga mue ku yanda mu visinganieka omo lia ku hita mu makava ni ciyovo ca kama, vati mu hasa ku kala na vusunga ngecize Yehova a ka mi kaniamesa na ku kanguisa vimbandu vienu ntsimbu ino na ku lutue?

Njambi ua tu kulahesa ngueni: “Kati u ivue vuoma, muomu ange nji li nove; Kati u livete cikumba, muomu yange Njambi yove; Nji ka ku kolesa; Cili, nji ka ku kuasa; Cili nji ka ku kaniamesa na livoko lia cilio lia vuviuke vuange.” (Isaya 41:10) Muntu nga a tantekeya ngecize Yehova ue ku mu lela, ue ku kala na ciyulo ca mu visinganieka na ngolo ya ku hita mu nkala vieseko. Kapostolo Paulu ua tumbuile eci ku simpa caco ngueni, “ciyulo ca Njambi cize ca hiana mana ose,” Paulu ua vuezeleko ngueni: “Nji ku hasa viose muli uze ue ku nji kolesa.”—Filipu 4:4-7, 9, 13.

Mbimbiliya ye ku kaniamesa lutsilielo luetu mu vikulaheso via Yehova via ku lutue. Ca ku muenako, Ku-Solola 21:4, 5 i tu lekesa via ka linga na omo lia vika tu hasa ku tsiliela ngecize a ka vi puisamo:

• “Kaha a ka hunda masozi ose ku meso avo” ni nguetu ku meso a vantu. Yehova a ka fumisako tuyando tuose na viose vie ku tu umisa mutima. Cipue tuyando tu ve ku mona vakuetu nguavo tua tundende.

• “Kaha uze ua tumama ha citumamo ca vuangana” muilu, Muangana ua kala na Ngolo Yose ha viuma via ku tanga, a kohiela vose ku tuyando na ku tu hana vukuasi vu tua tonda.

• Yehova ua tu kulahesa ngueni mezi eni “a cili a vusunga.” Kaha ua tsimana mu ku pua Njambi ua vusunga mukua ku puisamo vikulaheso vieni.

“‘Kaha a ka hunda masozi ose ku meso avo; na ku tsa ka ci ka kala naua; cipue ku-linienga na vusiua ka ci ka kala naua, cipue ku lila, cipue ku vavala viuma via ku livanga vi na hiti.’ Kaha uze ua tumama ha citumamo ca vuangana ua handekele, ngueni, Talenu, nji panga viose via viha. Kaha ua handekele ngueni, ‘Soneka: muomu mezi ano akeo a cili a vusunga.’”​—Ku-Solola 21:4, 5.

Mu tue ku lilongesa Mbimbiliya na ku tala melu na mavu, vie ku tu soluela vifua via Tatetu ua muilu. Viuma via tanga vie ku tu vuisa cizango ca ku likata vusamba na Yehova. Kaha Mbimbiliya ya tu lania mpundu nguayo: “Suenenu kuli Njambi, kaha ikeye a ka suena kuli enu.” (Tiango 4:8) Vilinga 17:27 nguayo: “Ikeye kesi ku laako netu vose.”

Omo mu tualelaho ku tantekeya Njambi, mu ka kala na vusunga ngecize “Ikeye a mi lela.” (1 Petulu 5:7) Ku vezika cika ca kala ha ku tsiliela muli Yehova?

Aci singaniekenu hali va Toru va ku Japão. Vutuhu va naye va puile Vakua Kilistu, vunoni va kovelele mu civunga ca vakua mafia, ni nguetu ca luozi ku Japão. Va handekele nguavo, “Ange nja tsilielele nguange Njambi ua nji zinda, kaha nja livuile ngecize ku-tsa ca vavusoko vange va nja lema, ca puile kasitiku ka nji hele Njambi.” Va Toru va vuezeleko nguavo ku kolela ha kati ka vantu va visinganieka viaco, ca va lingisile “ku pua cikenia na ku hona nkeke.” Va kele na vimo vizango via vipi, nguavo, “nje ku tsile mu vukuendze mu nima ya ku tsiha umo ua tsimanene cikuma ku nji hiana, linga nange nji tsimanese lizina liange.”

 Vunoni mu nima ya ku lilongesa Mbimbiliya hamo na mpueyavo, Hannah, va Toru va aluluile via vingi mu muono uavo na cifua cavo. Va Hannah nguavo, “nja limuenene yaliange alulula vuntu vueni.” Va Toru va handekele nguavo: “Kua kala Njambi ua tu haka seho tu vose muntu ku muntu. Ka tondo muntu uose-ouo a tse, kaha ua kala na cizango ca ku ecela vaze ve ku aluluka na ku seza vuhenge vuavo. Ue ku halakana ku viose vi tue ku mu leka ikeye lika kaha na umo uahi a vi ivuisisa. Vuovuno Yehova a ka fumisako tuyando tuose na visoti na lamba. Cipue ntsimbu ino, ue ku tu kuasa mu vinjila via ku komouesa. Ue ku tu niunga na ku tu ohiela nga tuli mu vuzeye.”—Visamo 136:23.

Ngue mu tua mono mu muzimbu ua va Toru, ku tantekeya ngecize Njambi a hasa, kaha vuovuno a ka fumisako visoti viose na ku hunda masozi ku meso a vose, ka ce ku tu hana lika lulavelelo lua ku lutue vunoni ce ku tu kuasa naua ku yoya muono ua cili ntsimbu ino. Mua vusunga, cipue mu mavu ano a ku sula tuyando, mu hasa ku uana ku vezika mu ku mi niunga kuli Njambi ua cilemo.