Nkeke ya pua “ku lihaka mu cihela ca muntu ni ku seteka ku ivuisisa viali na ku ivua ni ku hita.” Ndotolo Rick Hanson mukua ku lilongesa via cihindu ca mu visinganieka ngueni: “tu vose tua semuka na nkeke.”

ACI SINGANIEKENU: Omo lia vika tue ku muesa nkeke, cifua ka ca kele ku tusitu? Mbimbiliya ya lombolola nguayo Njambi ua tangele vantu mu cifua ceni. (Njenisisi 1:26) Njambi ua tu tangele mu cifua ceni linga tu hase ku muesa vifua via cili. Ngeci vantu mu ve ku vuila vakuavo vantu nkeke, ve ku solola vifua via Sakatanga ua nkeke Yehova Njambi.—Visimo 14:31.

Njambi ue ku tu vuila nkeke kaha ue ku mona tuyando tuetu. Omo vaIsaleli va ku laza va puile vandungo ku Ingito kaha va hitile naua mu tuyando mu vindinda miaka 40, Mbimbiliya ya handeka nguayo: “Mu kayando kavo kose ikeye ua yandele.” (Isaya 63:9) Aa mezi a muesa ngecize Njambi ka muene lika tuyando tuavo. Vunoni neni ua vuile ku vavala cavo. Ua handekele ngueni: “Nji tantekeya masiua avo.” (Ezundu 3:7) Kaha naua ngueni: “uze a mi saleka livoko na saleka livoko ku mukandi ua liso lieni.” (Zakaliya 2:8) Vakuetu mu ve ku tu vuisa ku vavala neni ue ku ivua ku vavala.

Mbimbiliya nguayo vutuhu tue ku livua ngue ngozi ya Njambi ka ya tu fuililile. “Njambi ua hiana mitima yetu, ikeye ua tantekeya viuma viose.” (1 Yoano 3:19, 20) Njambi a tu tantekeya ku hiana etu vavene. Ikeye a tantekeya viose vi tue ku hita, visinganieka vietu, na vi tue ku ivua. Kaha ue ku tu vuila nkeke.

 Mbimbiliya nguayo

• “Kaha u ka sana, na Yehova a ka ku kuania; U ka tambeka, kaha a ka handeka ngueni, Yange uno.”​—ISAYA 58:9.

• “‘Muomu ange nji tantekeya visinganieka vize vi nji ku singanieka kuli enu, ngueni Yehova, visinganieka via ciyulo kati via vipi, mu ku mi hia lulavelelo ku ntsimbu yenu ya ku sulumuina. Kaha mu ka nji tambakana, kaha mu ka ya na ku vundila kuli ange, kaha ange nji ka mi halakana.’”​—YELEMIYA 29:11, 12.

• “Longela masozi ange mu ngalafua yove; Kati a li mu mukanda uove, ni?”​—VISAMO 56:8.

Vuno ku tantekeya ngecize Njambi mukua nkeke ce ku kuasa mumo ni? Aci singaniekenu vi va lihitile navio va Maria nguavo:

“Mu nima ya ku tsisa muanange ua yala ua miaka 18 ua vavalele kanser miaka ivali, nja livuile ngecize muono ua ukalu kaha ua sula vuhenge. Nja vuilile Yehova matoto omo lia ku hona ku mu kanguisa!

“Mu mua hitile vingonde 6 tunde ha ku-tsa ca muanange, nja liniengele cikuma ku meso a umo kavusamba kange ua nkeke nguange Yehova ua nji zinda. Mu nima ya ku nji halakana vuino ca ku hona ku nji teta lizi, ua tumbuile mezi a ku 1 Yoano 3:19, 20, nguauo: ‘Njambi ua hiana mitima yetu, ikeye a tantekeya viuma viose.’ Ua nji lembeziekele ngueni Yehova ue ku ivuisisa visoti vietu.

“Vutuhu ngoco, kasi ca nji kaluuilile ku seza matoto! Ngeci nja tandele Visamo 94:19, ya handeka nguayo: ‘Mu ku lana ca visinganieka viange ha kati kange, ku-lembezieka cove ci zolesa muono uange.’ Nja livuile ngue vinimbu viaco yange mpundu va vi sonekelele! Kaha nja vuile ku lembama ca kama mu ku lekako Yehova visoti viange, na ku tantekaya ngecize ue ku nji halakana.”

Mua vusunga ce ku lembezieka ku tantekeya ngecize Njambi ue ku tu vuila nkeke na ku tu ivuisisa! Vunoni omo lia vika tuyando tua lana ngeci? Vuno Njambi ali na ku tu hana kasitiku omo lia vuhenge vuetu ni? Vuno Njambi tangua a lingako mumo a manusule tuyando ha mavu ni? Evi vi vihula va vi kumbulula mu vimpande via hatako.