Tu hilulenu ha vusamba vua kama vu hasa ku kala ha vantu—Vampasa va vilio vimo. Ve ku kolela mu liyaki limo. Va Nancy Segal navo vampasa va pua vakuluntu va cikota ce ku lilongesa via vampasa va handekele nguavo: “Vamo vampasa ve ku nongonona via tonda mukuavo cipue nga viahi na handeka.” Umo mpuevo ua pua mpasa ua handekele via vusamba vueni na mukuavo mpasa ngueni: “Tu litantekeya vuino mu viose.”

Vika vie ku lingisa eci ku likata ca seho ya kama ngeci? Vakua ku lilongesa nguavo cifua ci ve ku kolelamo vana mu zimo cikuma-kuma vi gene viavo via ku lifua. Vie ku kuata cikuma ku ku kola cavo.

ACI SINGANIEKENU: Sakatanga uevi vi gene via ku komouesa ngecize mua vusunga a tu tantekeya na ku tu ivuisisa vuino. Ngeci mukemuo mukua Visamo Ndaviti ua sonekele ngueni: “Muomu yove ua vumbile vilio viange via mu katikati: Yove ua nji fuikile muzimo lia nana. Vitsiha via muvila uange ka via ku vandelelele, Omo va nji tangele mu ku suekesa, Na ku nji talika ku mitamba ya kuintsi lia mavu . . . Meso ove a muene muvila uange te kanda va u vumba; na mu livulu liove va a sonekele ose, Omo te kanda limo liao.” (Visamo 139:13, 15, 16) Njambi lika a tu tantekeya na ku ivuisisa cifua ci va tu tangelamo na vati viuma vi tua hita mu muono via kuata ku vuntu vuetu. Mu ku Linga Njambi ua kala na mangana a ku hiana vose, a tantekeya vuino cifua cetu kaha ue ku tu ivuisisa mu viose.

Ndaviti ua vundilile ngueni: “A Yehova u na nji hilula, na ku nji tantekeya. U tantekeya ku-tumama cange na ku-katuka cange; U tantekeya cisinganieka cange ku laako. Muomu ka kuesi lizi ku lilimi liange, Vunoni tala, A Yehova, ua li tantekeya liose.” (Visamo 139:1, 2, 4) Cikuavo naua, Yehova a tantekeya cifua ci tue ku livuila muntima na ku “konka mitima yose na ku ivua viyongo viose via visinganieka.” (1 Mizimbu 28:9; 1 Samuele 16:6, 7) Evi vinimbu vi tu longesa vika hali Njambi?

Vutuhu ka tu hasa ku tumbula na mezi vitanga vietu na visinganieka vietu, Sakatanga uetu ke ku mona lika viuma vi tue ku linga vunoni ue ku ivuisisa na omo lia vika tue ku vi linga. Cikuavo naua, ue ku mona vucili vu tue ku tonda ku linga, cipue nga kuli vimo vi tu tangula ku vu puisamo. Mu ku linga Njambi ua tu haka cilemo mu mitima, ali na cizango caco kaha ua tonda ku ivuisisa matumbe etu a cili.—1 Yoano 4:7-10.

 Mbimbiliya nguayo

• “Muomu meso a Muangana a li ku vakua vuviuke, Na matuitui eni ku vivundilo viavo: Vunoni cihanga ca Muangana ca vindika vaze vakua ku linga mua mupi.”​—1 PETULU 3:12.

• Njambi na ku lahesa ngueni: “Nji ka ku leka na ku ku longesa njila ize i u na pande ku endela: Nji ka ku nangula na liso liange hali ove.”​—VISAMO 32:8.

Vuno ce ku kuasa ku tantekeya ngecize Njambi ue ku mona na ku ivuisisa visoti vi tue ku hita ni? Aci singaniekenu visoti vi va hitile va Anna va ku Nigeria. Va handekele nguavo: “Ka nja muene na seho ya ku yoya omo lia cifua ca muono uange, ange nji ntuluue oku nji vavalesa muanange ua kele na mema ku vuongo, ha ntsimbu yaco naua va nji uanene na vuvezi vua (cancer) kanser ya ku livele kaha ca tondekele ku li tavula. Ca nji kaluuilile cikuma ku ntsimbu ize ku vavalesa muana oku nange naua nji vavala.”

Vika via kaniamesele va Anna? Va handekele nguavo: “Nja singaniekele ha mikanda ngeci mua Filipu 4:6, 7, ua handeka nguauo, ‘ciyulo ca Njambi cize ca hiana mana ose ci ka niunga mitima yenu na visinganieka.’ Ntsimbu yose mu nje ku vuluka ou mukanda, nje ku livua mu hiehi na Yehova, nja tantekeyele ngecize ue ku tu ivuisisa ku hiana etu vavene. Nja tambuile naua ku nji kaniamesa ku vamuanetu mu cikungulukilo ca Vakua Kilistu.

“Vutuhu kasi nje ku pinda na cihindu cange na ca muanange, vunoni viuma via aluluka. Muomu Yehova ali netu, tua lilongesa ku mbila kuti visinganieka via ku pihia ku tuala ha vitanga vi tue ku hita mu muono. Tiango 5:11 ya tu kaniamesa nguayo: ‘Tu va tumbula vakua ku vezika ava va na likolesa: mu nevu ku ntsintsa ya Yombi, kaha mu na mono ku-manesa ca Muangana, ngecize Muangana ikeye na sulu na nkeke ikeye mukua cikeketima.’” (Tiango 5:11) Yehova uevuisisile mu vutantuluke via lihitile navio Yombi, tu hasa ku kala na vusunga nguetu ue ku ivuisisa tuyando tuetu.