“A Yehova, zintsimbu zingahi nji ka tambeka, nove ko u kevuako? Nji tambeka kuli ove omo luozi, nove ko u ovola. Vika u nji muesa vupi, na ku tala vupuye?” (Havakuke 1:2, 3) Havakuke ikeye ua handekele aa mezi, ua puile muntu ua ile Njambi ku mutima. Vuno aa mezi eni a muesele ngecize ka kele na lutsilielo ni? Houe. Njambi ua kaniamesele Havakuke ngueni ali na ntsimbu ya hangula aka tundiseko tuyando.—Havakuke 2:2, 3.

Nga yeni ni umo u mua lema a hita mu tuyando, ca casi ku singanieka nguenu Njambi ali na ku simbula muomu na pande ku lingako mumo hano vene. Vunoni Mbimbiliya nguayo: “Muangana ke ku tokesaho na litavasiano lieni, ngue omo vamosi ve ku amba, nguavo na tokoho; vunoni a li na lukakatela lua ngozi nenu, ka hianga ngecize umosi a ka nonge, vunoni ngecize vose va hete ku ku-aluluka.”—2 Petulu 3:9.

Vuovunovuno vene! Yesu ua sololuele umo muyati ni nguetu lizimo lie ku muene citantekeyeso ca viuma vie ku lekesele matangua a ku kotokela a tuala ku “ku kotoka ca mavu.” (Mateo 24:3-42) Ku lipuisamo ca vupolofeto vuaco ku matangua ano ci muesa ngecize, vuovuno Njambi a ka fumisako tuyando. *

Vati Njambi a ka fumisako tuyando tuose? Yesu mua kele hano ha mavu, ua muesele ngolo ya Njambi mu ku tepulula tuyando tua vantu. Aci talenu vimo vimueso.

Viyovo via Mavu: Yesu na vapostolo veni ntsimbu imo mu va kele na ku zavuka mu kalunga ndonga ya Ngalileya, kua katukile luhundzi lue ku vombelesele vuato. Kaha Yesu ua muesele ngecize neni na Ise vali na ngolo ya ku imika viyovo via mavu. (Kolose 1:15, 16) Yesu ua handekele lika ngueni: “Holoka kulu. Kaha luhundzi lua likelele kaha kua lembamene kulu cikuma.”​—Mako 4:35-39.

Mavezi: Yesu ua tsimanene omo lia vuhasi vueni vua ku kanguisa tupuputa, vilema, vakua ku sinia, vakua mbumba ni nkala vulema. Vose “ua va kanguisile.”​—Mateo 4:23, 24; 8:16; 11:2-5.

Ndzala: Yesu ua pangesele ngolo ya mu hele Ise mu ku lanesa via-ku-lia. Mbimbiliya nguayo Yesu mua kele ha mavu mu ku ambulula ceni, ua lingile luvali cikomoueso ca ku lisa makulukazi a vantu.​—Mateo 14:14-21; 15:32-38.

Ku-tsa: Yesu ua sanguile vatsi lutatu, ovu vusunga vuaco vua muesa ha toma ngecize, Yehova ua kala na ngolo ya ku fumisa ku-tsa. Umo ua vantu va sanguile ua mu sanguile mu nima ya matangua a uana.—Mako 5:35-42; Luka 7:11-16; Yoano 11:3-44.