VUTUHU lisino li va muesele visemi vetu va katete va Andama na Eva, lia tu kokela vupi na ku tsa, vunoni evi ka via aluluile vutumbe vua Njambi ku vantu. Mu Lizi lieni liose, Njambi ua muesa vintsimbu via vingi ngecize vutumbe vueni ka vua alulukile.

• “Vakua vuviuke va ka suana cifuti, kaha va ka kalamo ku miaka na miaka ya ya-ye.”​—Visamo 37:29.

• “Na mini ku-tsa ku miaka yose; kaha Sukulu Yehova a ka hunda masozi ose ku vihanga viose.”​—Isaya 25:8.

• “Citozi ua ku sulumuinako ku mu enieka, ikeye ku-tsa.”​—1 Kolintu 15:26.

• “Ku-tsa ka ci ka kala naua; cipue ku-linienga na vusiua ka ci ka kala naua, cipue ku lila, cipue ku vavala.”​—Ku-Solola 21:4.

Vati Njambi a ka ‘minisa ku-tsa’ ni nguetu ku nongesa ku-tsa? Ngue mu tu na mono laza, Mbimbiliya ya muesa ha toma ngecize “vakua vuviuke . . . va ka [yoya] miaka na miaka ya ya-ye.” Vunoni ya handeka naua nguayo “ha mavu ka hesi umo mukua vuviuke, ue ku panga via ku viuka, kaha ke ku linga vupi.” (Ekelesiaste 7:20) Vuno eci ca lomboloka ngecize Njambi ka ka kava naua vitume vieni, mu ku ecelela honi na vakua vupi va ka yoye miaka yose ni? Na limo litangua liahi! Muomu Njambi “ka hasa ku onga.” (Tito 1:2) Vika honi a ka linga Njambi mu ku puisamo vutumbe vueni vua cilemo vua tangelele vantu?

Yehova Njambi ua tu hele vuana vua kama vua tu patula ku kutsa. Vuana vuka? Cikombelo ca ku kula. Ku kula ca pua ndando ye ku fueta muntu nga na vihisa cimo cuma ni ndando i ve ku fueta mu ku puisamo masiko a vuoloke. Ndando yaco ya pande ku litombola na vize vi va na vihisa. Kaha mu ku linga vantu vose vapua vakua vupi, kaha va kala muintsi lia cihiso ca ku-tsa, Mbimbiliya ya handeka ha toma nguayo: “Na umo uahi uavo a hasa ku kula muanaye na hamo hahi, cipue ku hana evi via ku mu kula kuli Njambi (Muomu ku kula muono uavo ca cikalu cikuma, kaha va ci honoua ku miaka yose ya ya-ye).”—Visamo 49:7, 8. 

Nga muntu ka tantulukile a tsa, a hasa ku fueta lika vupi vueni, ka hasa ku liohiela ikeye ivene cipue ku ohiela mukuavo. (Loma 6:7) Tua tondekele muntu ua ku tantuluka linga a hane muono ueni, mu ku tu patula.​—VaHevelu 10:1-4.

Evi vikevio mpundu via tu viukisilile Njambi. Ua tumine Muaneni Yesu ha mavu, mu kua ku semuka na muvila ua ku tantuluka. (1 Petulu 2:22) Yesu ua handekele ngueni uezile mu ku “hana muono ueni ku kula va vengi.” (Mako 10:45) Yesu mua tsile ua vulile citozi ku-tsa linga tu ka yoye miaka yose.—Yoano 3:16.

Lelo lino, tuli mu “zintsimbu zia ku kaluua” kaha eci ce ku puisamo vupolofeto vua mu Mbimbiliya vua muesa ngecize tuli na ku yoyela ku “matangua aze a ku kotokela.” (2 Timoteo 3:1) Kaha matangua aco a ku kotokela a ka huila ha “litangua lia ku sompela, na ku nonga ca vantu vakua ku sahula Njambi.” (2 Petulu 3:3, 7) Vunoni  vaze va lema Njambi va kovoka ku ku nonga na ku ka tambula civezikiso ca “muono ka ue ku hua ua ya-ye.”—Mateo 25:46.

Vantu vakuavo va vengi va ka sanguka na ku kala na vukovelelo vua ku tambula muono ka ue ku hua. Yesu ua muesele vati ca fua cisangukilo mua ile ku mbonge ya Naini. Ku mbonge yaco umo ntuluue ua tsisile muaneni umo lika ua yala, ngeci Yesu “ua mu vuililile cikeketima” kaha ua mu sanguile. (Luka 7:11-15) Kapostolo Paulu ua sonekele ngueni: “Nji li na ku lavelela kuli Njambi . . . ngecize ku ka kala cisangukilo ca vakua vuviuke na vakua vuhenge.” Eci cisangukilo ca muesa vukama vua cilemo ca Njambi ku vantu.​—Vilinga 24:15.

Makulukazi a vantu va hasa ku lavelela ku ka yoya miaka yose. Muomu Mbimbiliya nguayo: “Vakua vuviuke va ka suana cifuti, kaha va ka kalamo ku miaka na miaka ya ya-ye.” (Visa. 37:29) Mu ntsimbu yaco, va kevua ndzolela mu ku mona ku lipuisamo ca mezi a handekele kapostolo Paulu miaka 2.000 ku nima ngueni: “Ove ku-tsa, ku-hiana cove ci lihindzo? ove ku-tsa kamuni kove ka li kulihi?” (1 Kolintu 15:55) Mua vusunga ku ntsimbu oyo, ku-tsa, citozi ua kama ua vantu, va ka mu vula!