Vantu vangi mu mavu ose, ka vakele na via ku lia cipue ndzivo ya ku kala. Vamo co va tondeka lika ku kala na lulavelelo. Ngeci mukemuo, vivezikiso vika tu ka tambula kuli Njambi nga tu kuasa vantu va cifua eci?

“Uze a tetela muhutu a kumuisa kuli Yehova, Na cilinga ceni ca ku viuka a ka mu fuetaco naua”—VISIMO 19:17.

Yesu ua tele cisimo ca umo yala i va tinguile vambanditu na ku mu seza ku hiehi na ku tsa. (Luka 10:29-37) Ngeci umo lihita njila mukua ngozi ue manene na ku mu kuasa. Uze lihita njila ua kuasele uze yala, vutuhu va ku visemua via ku liseza.

Uze yala mukua ngozi ka putukile lika ku saka vimbandu via uze yala ua ku vulumuka. Vunoni ua mu hanene vukuasi vukuavo naua na ku mu lembezieka, kaha evi via mu kuasele ku likela ku lisosomua cikuma na cize cisoti cedi.

Vika tu lilongesa ku cisimo eci? Yesu ua muesele ngecize tua pande ku kuasa vakua ku kalekeya mu nkala njila i tu hasa. (Visimo 14:31) Visoneka via ku Lela, via longesa ngecize vuovuno Njambi a ku manusula vuhutu na tuyando. Vunoni halumo tu hasa ku lihula nguetu, vati kaha tangua lika Njambi a ka lingamo? Cimpande ci na hatako ci ka muesa vivezikiso via na mi tulikila Sakatanga uenu ua cilemo.