Tu Hasa ku Lilongesa via Njambi ku Hitila mu Vapolofeto Veni
Ku ntsenkulu Njambi ua tumine muzimbu ku vantu, ku hitila mu vapolofeto veni. Vuno eyi mizimbu ya muesa vati tu hasa ku tambula vivezikiso via Njambi ni? Eyo. Tu talenu honi vika tu hasa ku lilongesa ku vapolofeto vatatu va lutsilielo.
AVILAHAMA
Njambi kati mukua kahangu ngeci ua tonda ku vezikisa vantu vose.
Njambi ua kulahesele kapolofeto ueni Avilahama ngueni “muli ove vavusoko vose va ha mavu va ka vezika.”—Njenisisi 12:3.
Vika tu lilongesaho? Njambi ua tu lema cikuma kaha a tonda ku ka vezikisa masoko ose, vamala, vampuevo, na vanike vaze ve ku mu ononoka.
MOSESA
Njambi mukua ngozi kaha a ka vezikisa vose vaze ve ku lihakela kapandi ka ku mu tantekeya.
Mukua ngolo yose ua hele kuli kapolofeto ueni Mosesa ngolo ya ku linga vikomoueso via kama. Vunoni Mosesa ua vundilile ngueni: “Nji lekese vuovuno zinjila ziove, linga nji ku tantekeye, mangana nji uane kavumbi ku meso ove.” (Ezundu 33:13) Njambi ua lemene eci civundilo ca Mosesa ngeci ua mu vezikisile na mana a ku tantekeya vinjila na vifua vieni. Ca ku muenako, Mosesa ua tantekeyele ngecize Sakatanga uetu ua pua “Njambi mukua cikeketima na kavumbi.”—Ezundu 34:6, 7.
Vika tu lilongesaho? Njambi ua tonda ku tu vezikisa tu vose vamala, vampuevo na vanike, nga tu lihakela kapandi ka ku mu tantekeya vuino. Ua tu muesa mu Visoneka via ku Lela vati tu hasa ku mu lemesa kaha ua kala na cizango ca kama ca ku tu vezikisa.
YESU
Omo lia cikeketima Yesu ua kanguisile mavezi a vifua viose
Tu hasa ku tambula vivezikiso via ya-ye kuli Njambi nga tu lilongesa via Yesu, vilinga vieni na vilongesa vieni.
Mu Lizi lia njambi mua kala mizimbu ya ingi ku tuala hali Yesu na vilongesa vieni. Njambi ua hele Yesu ngolo ya ku linga vikomoueso via kama ngeci mua ku kanguisa tupuputa, tu sindamatuitui na vilema. Kaha kati ovio lika vunoni ua sanguile na vatsi. Mu ku linga evi, Yesu ua muesele vivezikiso via ka hana Njambi ku vantu vose ku lutue. Kaha ua lomboluele vati tu vose tu hasa ku ka tambula vivezikiso viaco ngueni: “Muono ka ue ku hua ukeuo ou, ku ku tantekeya ove Njambi umo lika ua vusunga, na uze i ua tumine, ikeye Yesu Kilistu vene.”—Yoano 17:3.
Yesu ua muesele cikeketima, cilemo na ngozi. Vamala, vampuevo, vanike cipue vakuluntu va kele na kuya kuli Yesu omo lieci cilanio ceni: “Lilongesienu kuli ange; muomu nja konkama, nji mukua ku likehesa mu mutima: kaha mu ka uana ku huima ku miono yenu.” (Mateo 11:29) Ku ntsimbu ize vamo va kele na ku yandesa vampuevo, vunoni Yesu ua va muesele ngozi na kasingimiko.
Vika tu lilongesaho? Yesu ua muesele cilemo ca kama ku vantu kaha ua tu sila lungano lua ku komouesa lua vati tu hasa ku yoya umo na mukuavo.
YESU KA PUILE NJAMBI
Visoneka via ku Lela via tu longesa ngecize “kuli etu ku li Njambi umo lika” kaha Yesu ua pua Muluua ua Njambi. (1 Kolintu 8:6) Yesu ua muesele ha toma ngecize Njambi ua mu hiana kaha ikeye ua mu tumine ha mavu.—Yoano 11:41, 42; 14:28. *
^ cin. 17 Nga mu tonda ku lilongesa vikuavo ku tuala hali Yesu Kilistu, talenu cilongesa 4 ca mukanda Muzimbu ua Cili u Fuma Kuli Njambi!, uli mu saiti www.pr418.com.
