Puenu na ku Vundila Vukuasi Vua Njambi
Njambi ua hele vantu vuana vua ku lifuila. Vuana vuka? Vuana vua ku handeka neni ku hitila mu civundilo na ku lombolola visinganieka viavo. Kapolofeto Ndaviti ua vundilile ngueni: “A ove mukua ku ivua vivundilo, Kuli ove ntsitu yose i keza.” (Visamo 65:2) Vuno vati honi tu hasa ku vundila linga Njambi evue vivundilo vietu na ku tu vezikisa?
PUENU NA KU VUNDILA NA KU LIKEHESA KAHA NA MUTIMA UOSE
Vivundilo vi hasa ku mi kuasa ku ‘muania mutima uenu ku meso a Njambi’ ni nguetu ku mu leka viose vili ku mutima uenu.’ (Visamo 62:8) Mukua Ngolo Yose, ue ku ivua ndzolela mu ku ivua vivundilo vienu via ku mutima.
OMO MU VUNDILA PUENU NA KU TUMBULA NJAMBI HA LIZINA LIENI MPUNDU
Vutuhu Njambi ua kala na vinkumbu via vingi, vunoni ua kala na lizina lieni mpundu. Ivene ua tumbula lizina liaco ngueni: “Ange nji Yehova, likelio lizina liange.” (Isaya 42:8) Lizina Yehova, va li soneka mu Visoneka via ku Lela lua ku pua 7.000. Vapolofeto vavengi va kele na ku tumbula lizina lia Njambi mpundu omo va kele na ku handeka neni. Ca ku muenako, Avilahama ua tumbuile mpundu Njambi ha lizina ngueni: “A sukulu Yehova.” (Njenisisi 15:2) Netu tua pande ku tumbula lizina lia Njambi, Yehova, nga tu vundila.
PUENU NA KU VUNDILA MU LILIMI LIENU
Njambi ue ku ivuisisa visinganieka vietu nga tu vundila mu nkala lilimi li tu handeka. Lizi lieni lia tu kaniamesa ngualio: “Njambi ka hangula ku vantu: Vunoni ku miyati yose, ou uose a mu vuila vuoma, kaha a linga vuviuke, ikeye ya na tava.”—Vilinga 10:34, 35.
Vunoni linga Njambi a tu vezikise, tua tondeka ku linga vikuavo naua kati ku vundila lika. Mu cimpande ci na hatako, tu ka hilula ha vika tua pande ku linga.