Sakatanga Uetu ua Cilemo ua tu Haka Seho
1. SAKATANGA UETU UE KU TUHUISA LITANGUA
Aci singaniekenu nga ha mavu ka ha kele ceke ca litangua? Litangua lie ku tuhula ceke mu ku kuasa miti, linga isoke mafo, vintemo na vusuka. Cikuavo naua, litangua lie ku kuasa miti linga i ntsembe mema mu livu ku hitila mu mizi. Kaha mema aco, e ku kanduka mu muti na ku mafo kaha mu nima yaco eku ya mu luhundzi.
2. SAKATANGA UETU IKEYE UE KU NOKESA NIONDZI
Niondzi ya pua vuana vua tu hana Njambi muomu ye ku lingisa mavu eme mbuto, mu ku pua via ku lia vietu. Njambi ue ku tu hana niondzi ya ku fumina muilu, na miaka ya vimbuto, na ku sulisa mitima yetu na via ku lia na ndzolela.
3. SAKATANGA UETU UE KU TU HANA VIA KU LIA NA VUZALO
Cingi ca mitue ya vindzivo ve kuma cikuma mutima omo lia ku tonda via ku lia na vuzalo via vusoko vuavo. Mbimbiliya nguayo: “Talenu tuzila va muilu, ka ve ku kuva, cipue ku tia, cipue ku ungulula mu visete; kaha isuenu ua muilu a li na ku va lisa. Enu ka mua va hianene seho cikuma, ni?”—Mateo 6:25, 26.
“Yongolenu zintsani zia mu musenge omo mu zi li naku kula . . . ; vunoni nji ku mi leka, nguange Solomone vene ku vumpahu vueni vuose ka zalele ngue imo yayo. Vunoni muila ua mu musenge . . . , nga Njambi a u zika ngecize, ka ka hiana cikuma mu ku mi zika enu, ni?”—Mateo 6:28-30.
Mu ku linga Njambi ue ku tu hana via ku lia na vuzalo, mua vusunga a hasa naua ku tu kuasa ku uana viuma vikuavo via tu kambela mu muono. Nga tu lihakela kapandi ka ku linga vize via tonda Njambi tu vi linge, Njambi a ka vezikisa kapandi ketu na ku tu hana via ku lia ni vene ku tu kuasa ku uana cipanga linga tu hase ku landa vize vi tu tondeka.—Mateo 6:32, 33.
Ku hilula ha viuma ngeci mua mutana, niondzi, tuzila na vintemo vie ku tu hana vusunga vua ku lema Njambi. Cimpande ci na hatako, ci ka muesa vati Sakatanga uetu ue ku handeka na vantu.