Tunde ha tangelele vantu, Sakatanga uetu ue ku simutuila na vantu ku hitila mu tungelo na vapolofeto. Cikuavo naua, ua tumine muzimbu na vikulaheso vieni linga va vi soneke. Njambi ua kulahesa ngecize, ku lutue tu ka yoya mu ndzolela. Kulihi mu hasa ku uana vikulaheso via Njambi lelo lino?

Muzimbu ua Njambi ua kala mu Visoneka via ku Lela. (2 Timoteo 3:16) Vati Njambi ua pangesele vapolofeto mu ku soneka muzimbu ueni? (2 Petulu 1:21) Njambi ua hakela muzimbu ueni mu visinganieka via vakua ku soneka, ngeci va vi sonekela. Na lelo lino vie ku soloka. Ca ku muenako, mukua mingoso ue ku pangesa mukua ku soneka linga a mu sonekele mikanda, kaha mikanda yaco ka ye ku pua ya mukua ku soneka vunoni ye ku pua ya uze na tumu ku i soneka. Na vuno vene, vutuhu Njambi ua pangesele vantu ku soneka muzimbu ueni, vunoni Ikeye mpundu ua pua ivene Visoneka via ku Lela.

Muzimbu ua Njambi ua kala na seho, ngeci ua tonda linga vantu vose va u tande na ku uivuisisa. Lelo lino, ou muzimbu ni nguetu “zimpande zia cili ka zie ku hua zia yaye,” ua lisanduoka ku “vifuti viose, na miyati yose na malimi ose.” (Ku-Solola 14:6) Na vukuasi vua Njambi ou muzimbu ua ku lela va u langulula mu vutuntu ni mitamba yauo mu malimi a tuvakana 3.000. Ka kuesi muzimbu ueka u va langulula mu malimi a ku lana ngeci.