Mu ku linga tua tunda ku yala umo lika, Andama, tu vose tu vavusoko. Vutuhu tele nga vavusoko va pandele ku limuesa cilemo na kasingimiko vunoni lelo lino ca cikalu ku uana vusoko vue ku lingamo. Vunoni evi kati vikevio via tonda Njambi yetu ua cilemo.

“U ka lema mukuenu ngue mu ua lilema ove ivene.”—LEVITIKU 19:18.

“Lemenu vitozi vienu.”—MATEO 5:44.

Talenu vati Njambi ua lombolola cilemo mu Lizi lieni ku 1 Kolintu 13:4-7:

“Cilemo cili na lukakatela, cili na ngozi.”

Aci singaniekenu: Vati mu livua nga va mi muesa lu kakatela na ngozi kaha ku va niengue nenu nga mua sevuka?

“Cilemo ka ce ku liveya.”

Aci singaniekenu: Vati mu livua nga vantu va mi singaniekela via ku vihia ni va mi vuila cipululu?

Cilemo “ka ce ku lilengeyela viuma via civene.”

Aci singaniekenu: Vati mu livua nga vakuenu va singimika vinguli vienu kaha ka va kakatela ntsimbu yose vinguli viavo?

Cilemo “ka ce ku singanieka via vipi.”

Aci singaniekenu: Njambi ua kala na cizango ca ku ecela vakua ku mu vulumuina. “Ka li ka niunga vutenu vueni ku miaka yose.” (Visamo 103:9) Tue ku ivua ndzolela nga muntu u tua vulumuina a tu ecela. Ngeci mukemuo, tua pande ku liviukisila ku ecela vakuetu nga va tu vulumuina.—Visamo 86:5.

Cilemo “ka ce ku zolela vuhenge.”

Aci singaniekenu: Nga viuma via ku pihia vi na tu solokela, ka tue ku tonda vakuetu va viukilile na lamba yetu. Ngeci mukemuo ka tue ku zolela nga vakuetu vali mu lamba, cipue nga va tu lingile via ku vihia ku nima.

Linga tu tambule vivezikiso via Njambi, tua pande ku lema vakuetu mu vinjila vi tua tumbula helu ca ku hona ku tala ku citso cavo, cifuti cavo ni vulombelo vuavo. Cifua cimo ci tu hasa ku vi lingilamo ca pua ku kuasa vakua ku kalekeya.