Kapolofeto Mosesa ua handekele ngueni, nga tu ononoka masiko a Njambi, tu ka tambula vivezikiso. (Ndeutelonomi 10:13; 11:27) Ka tue ku ononoka Njambi omo lia ku tina kasitiku. Tue ku ononoka Njambi omo lia vifua vieni via cili, omo lia ku mu lema, ngeci ka tue ku tonda ku mu vuisa ku mutima ku vihia. “Eci cikeco cilemo ca Njambi ngecize tu niunge mezi a lisiko eni.”—1 Yoano 5:3.

Vuno vati ku ononoka Njambi ce ku neha vivezikiso? Hilulenu ha vinjila vivali.

“Ange nji Yehova Njambi yove, Uze a ku longesa vize vi silivila, Uze a ku tuamena mu njila ize ya ku pande.”—ISAYA 48:17.

Yehova Njambi, sakatanga uetu, a tu tantekeya vuino kaha ue ku tu tuamenena mu viose vitondeka. Nga tu tonda vilongesa via Njambi vi tu kuase ku linga vihangula, tua pande ku lilongesa Visoneka via ku Lela, muomu via muesa vika Njambi ua tonda ku li etu na vati tu hasa ku vi niunga.

“Va vezika vaze vevua lizi lia njambi na ku li niunga.”—LUKA 11:28.

Lelo lino, makulukazi a vakua ku ononoka Lizi lia Njambi ve ku yoya mu ndzolela. Ca ku muenako, halakanenu via umo yala ua ku Espanha ua puile mukua vutenu, ka kele na ku yoya mu ciyulo na vakuavo cipue vene na mpuevo yendi. Tangua limo ua tandele visoneka via kapolofeto Mosesa, via handeka ku tuala ha ku konkama ca Yosefe muana Yakomba. Yosefe va mu landesele ku vundungo kaha va ka mu hakele mu kamenga ca ku hona mulonga. Vutuhu ngoco ua tualeleho ku pua mukua ku konkama, ku pua mukua ciyulo na ku ecela vakuavo. (Njenesisi, kapitulu 37-45) Uze yala ua ku Espanha ua litavele ngueni: “Ku singanieka ha lungano lua Yosefe, ca nji kuasele ku lihakela kapandi ka ku kala na vifua ngeci mua ku konkama, ngozi na ku lipokuesa. Ngeci lelo lino, nja yoya honi mu ndzolela”

Mu Visoneka via ku Lela mua kala naua vimamuna vikuavo via vati tu hasa ku yoya na vakuetu. Cimpande ci na hatako ci vilombolola vuino.