Tambulenu Vivezikiso via Ya-ye Kuli Sakatanga Uetu
Njambi ua kulahesele kapolofeto Avilahama ngueni, ku hitila muli muaneni “miyati yose ya ha mavu i ka vezika.” (Njenisisi 22:18) Ou muaneni uaco iya?
Kampe miaka 2.000 ku nima, Njambi ua hele ku li Yesu uze ua pua mbuto ya Avilahama, ngolo ya ku linga vikomoueso. Vikomoueso viaco via muesele ha toma ngecize, cikulaheso ca lingile Njambi kuli Avilahama ce ku lipuisilemo ku hitila muli Yesu.—Ngalata 3:14.
Vikomoueso via lingile Yesu via kuasele vantu ku nongonona ngecize, ikeye ya hanguile Njambi mu ku vezikisa vantu kaha naua via muesele vati Njambi a ka mu pangesa mu ku vezikisa vantu ku miaka yose. Cikuavo naua vikomoueso viaco via soluele vifua vieni via cili.
Cilemo—Yesu ua kanguisile vavezi.
Tangua limo umo mukua mbumba ua vundilile Yesu linga a mu kanguise. Kaha Yesu ua mu salekele livoko na ku mu kumbulula ngueni: “Nji na zange,” mu ntsimbu oyo vene uze mukua mbumba ua kangukile.—Mako 1:40-42.
Vuhuanga—Yesu ua lisile vakua ndzala.
Yesu ka zangele ku mona vantu va yanda na ndzala. Ngeci vintsimbu vimo ua lingile vikomoueso mu ku lisa makulukazi a vantu ku hitila mu tu mbolo na tu vantsi tua tundende. (Mateo 14:17-21; 15:32-38) Ha vintsimbu viaco, kua kele via ku lia via ku linga vantu va lile vunoni ka va hasele ku vi manusula.
Cikeketima—Yesu ua sanguile vatsi.
Omo lia “cikeketima” Yesu ua sanguile muana umo lika ua mumala ua umo ntuluue ka kele na vavusoko.—Luka 7:12-15.
Halumo mu Hasa ku Lema Naua Evi
ESSENTIAL BIBLE TEACHINGS
Omo lia Vika Njambi ua Tangele Mavu?
Mavu a sula na viuma via cili. Va a tumbika ha ntunda ya ku puamo mpundu ku tunda ku litangua, va a tangele mu cifua ca cili, eku lizenga mu lusi lua ku puamo. Omo lia vika Njambi ua pangesele ngolo eyi yose mu ku tanga mavu?
