Vuno Lizi Lia Njambi va li Alulula Ni?
Vamo ve ku singanieka ngecize halumo Lizi lia Njambi va li a lulula. Kapolofeto isaya ua handekele ngueni: “Lizi lia Njambi yetu li ka mana ku miaka yose ya ya-ye.” (Isaya 40:8) Vusunga vuka tuli navuo ngecize, muzimbu ua Njambi ka ua alulukile?
Njambi ua kala na ngolo ya ku niunga Lizi lieni, na ku vindika uose ua tonda ku lialulula. Ku ntsekulu, omo va kele na ku kopiala Lizi lia Njambi, vakua ku likopiala va kele na ku tanda masona ose a ku lela linga va kale na vusunga ngecize ka va vuezeleko, ku alulula ni ku tepululako vimo. Vutuhu ngoco, vantu ka va tantulukile, kaha vamo vakua ku kopiala, va lingile vimo visevuka via vindende.
VATI TU HASA KU KALA NA VUSUNGA NGECIZE, MUZIMBU UA NJAMBI, KASI UKEUO MPUNDU UA KALA NA MU VISONEKA VIA KU LELA?
Lelo lino, kua kala makulukazi a makulukazi a vikopia via mazengununo a engi a Visoneka via ku Lela via ku laza. Ngeci mukemuo nga imo kopia i na aluluka, citava ku nongonona nkala cisevuka caco, mu ku i setekesa na vikopia vikuvao.—Linga mu tantekeye vikuavo, talenu cimpande Vuno Mbimbiliya va i alulula cipue ku i pihisa ni?” mu jw.org.
Ca ku muenako, tu ci hilulenu amo mapapelo a va tumbula nguavo, Mazengununo a ku Cisali ca Kutsa a va uanene vabedouins mu vimpako via ku minkinda ya kala ku hiehi na Cisali ca Kutsa mu 1947. Mazengununo aco, a kala na mitamba ya Visoneka via ku Lela vi va sonekele miaka i tuvakana makulukazi avali ku nima. Vakua ku tondesesa va setekesele aa mazengununo a laza na Visoneka via ku Lela vi tua kala navio lelo. Vika va uana?
Vakua ku tondesesa via Mbimbiliya, va uana ngecize muzimbu ua mu Lizi lia Njambi u tua kala nauo lelo, ka ua alulukile, kasi ukeuo vene ua tumine Njambi ku soneka. * Mua vusunga ku hilula vuino mazengununo a ku laza, ca tu hana vukaleho vua ku sula ngandza ngecize, Visoneka via ku Lela vi tua kala navio lelo, vikevio mpundu via sikile Njambi. Tu kalenu na vusunga ngecize Njambi, ua linga cose mu ku niunga vusunga vua mu Visoneka vieni via ku Lela, linga vu hase ku heta ku li yetu lelo.
Ngeci mukemuo, tu puenu na ku tanda Lizi lia Njambi na mutima umo lika, oku tuli na vusunga ngecize ka mua alulukile na vimo viahi. Omo tuli na vusunga vuaco, tu hilulenu honi vika tu hasa ku lilongesa hali Njambi ku hitila mu vapolofeto veni.
^ cin. 7 Lizengununo lia The Complete Dead Sea Scrolls mu English, lia sonekele Geza Vermes, ha lifo 16.