1, 2. Vati kapostolo Paulu ua muesele ku santsela ku kavumbi ka Njambi?

KAPOSTOLO Paulu ua handekele vusunga ngueni: “Kavumbi keni [Njambi] va nji heleko ka ka ile mu ngoco.” (Tandenu 1 Kolintu 15:9, 10.) Paulu ua tantekeyele mpundu ngecize tele ka fuililile ku tambula ngozi ya kama kuli Njambi. Ua puile mukua ku luisa Vakua Kilistu.

² Ku matangua a ku sulumuina a muono ueni, Paulu ua sonekelele kuli Timoteo ngueni: “Nji mu santsela uze na nji hasesa, ikeye Kilistu Yesu Muangana uetu, omo ikeye ua nji yonguele mukua cili, na ku nji hangula ku vipanga vieni.” (1 Timoteo 1:12-14) Vipanga vika? Paulu ua lekele vakuluntu va mu cikungulukilo ca mu Efeso ngueni: “Ange ka nja singaniekele ngue muono uange u li na seho, linga nji manese ciseteko cange, na vipanga vize vi nja tambuile kuli Muangana Yesu, ku ambulula vukaleho vua zimpande zia cili zia kavumbi ka Njambi.”—Vilinga 20:24.

3. Cipanga cika ca ku lifuila Paulu ua tambuile? (Talenu cikupulo ca ku vuputukilo)

³ “Muzimbu ua cili” uka Paulu ua ambuluile, kaha vati ua soluele kavumbi ka Njambi? Paulu ua lekele Vakua Kilistu va ku Efeso  ngueni: “Mu nevu ku ku pangela ca kavumbi kaze ka Njambi ci va na nji hie omo enu.” (Efeso 3:1, 2) Yesu ua tumine Paulu ku ambuluila muzimbu ua cili ku vose vaze ka va puile vaYundeya. Mu ntsimbu yaco vakua vifuti va va tavele ku pua mutamba ua Vuangana vua Mesiya. (Tandenu Efeso 3:5-8.) Paulu ua ambuluile na ntuima, kaha ua sila Vakua Kilistu lungano lua cili lelo. Ua muesele ngecize kavumbi ka Njambi hali ikeye “ka ka ile mu ngoco.”

4, 5. Vika tu hasa ku handekela nguetu “muzimbu ua cili ua Vuangana” una lifu na muzimbu ua cili ua “kavumbi ka Njambi”?

⁴ Ku matangua ano a ku kotokela, Yehova na hana vangamba veni cipanga ca ku ambulula “zimpande ezi vene zia cili zia vuangana. . . ku vifuti viose, zi ka pua vukaleho vua kuli vakua vifuti viose; amba vuose ku-kotoka ca mavu ci keza.” (Mateo 24:14) Muzimbu ua cili ua Vuangana ua pua naua “muzimbu ua cili ua kavumbi ka Njambi.” Mu njila ika? Muomu vivezikiso viose vi tu ka tambula ku vuangana vua Njambi, tu ka vi tambula omo lia ngozi yeni. (Efeso 1:3) Paulu ua muesele ku santsela ceni ku kavumbi ka Yehova mu ku ambulula na ntsintsa. Vuno tue ku tambuluisa Paulu ni?​—Tandenu Loma 1:14-16.

⁵ Mu cilongesa ci na hiti, tua lilongesele ku vezika ci tue ku uana ku kavumbi ka Njambi mu vinjila via liseza-seza, vutuhu tu vakua vupi. Mu ku linga tua vezika cikuma, tua kala na kapandi ka ku longesa vakuetu vati Yehova a li na ku muesa cilemo ceni, kaha na ku vezika ci va hasa ku uanaho. Mu vinjila vika tu hasa ku kuasa vakuetu va muese ku santsela ku kavumbi ka Njambi?

6, 7. Vati tue ku ambulula muzimbu ua cili ua kavumbi ka Njambi mu tue ku leka vantu via vuana vua ku tu kula?

⁶ Cingi ca vantu matangua ano ka ve ku livua mulonga nga va na lingi vupi, ngeci ka ve ku ivuisisa omo lia vika vantu va tondeka ku va kula. Vunoni kasi vantu vavengi ve ku mona nguavo cifua ca muono uavo ka ce ku va vuisa ndzolela. Vavengi tele kanda va simutuile na Vakaleho va Yehova, ka va tantekeyele vika vupi, vati vua tu kuata, na vika tua pande ku linga tu patuke ku vundungo vua vupi. Omo vantu vakua vusunga ve ku ivuisisa vika vupi, ve ku muesa ku santsela cavo kuli Yehova mu ku tuma Muaneni ha mavu a ku tu patule ku vupi na ku-tsa. Yehova ua lingilemo omo lia vukama vua cilemo ceni na kavumbi.​—1 Yoano 4:9, 10.

⁷ Talenu via handekele kapostolo Paulu hali Yesu, muana ya lema Yehova: “Muli ikeye tu na ku kuka na maninga eni, ku ecela ca vivulumuna vietu, ngue vufuko vua kavumbi keni [Yehova].” (Efeso 1:7) Cikombelo ca Yesu ca solola vukama vua cilemo ca kala naco Njambi hali yetu na vukama vua kavumbi Keni. Mu tua lilongesa ngecize nga tu muesa lutsilielo mu cikombelo ca Yesu va ka tue ecela ku vupi vuetu na ku kala na mutima ua ku lela, tue ku ivua ngue va na tu tulu citeli ca kama! (VaHevelu 9:14) Ou ua pua muzimbu ua cili mpundu u tua pande ku lekako vakuetu!

8. Omo lia vika vantu ka va tsilielele va pande ku lihamba na Njambi?

⁸ Njambi ue ku mona vantu ka ve ku muesa lutsilielo muli Yesu ku pua vitozi veni. Ngeci tua kala na kapandi ka ku va kuasa va lihambe na Njambi. Kapostolo Yoano ua sonekele ngueni: “Uze a tsiliela Muana, a li na muono ka ue ku hua ua ya-ye; vunoni uze kononoka kuli  Muana ka ka mono muono, vunoni vutenu vua Njambi vu ka kala hali ikeye.” (Yoano 3:36) Tue ku viukilila ku tantekeya ngecize cikombelo ca Yesu ca tu sokoluela njila ya ku likuata vusamba na Njambi. Paulu ua tumbuile ngueni: “Nenu, mua puile laza vangendzi na vitozi mu visinganieka vienu na vipanga vienu via vipi, vunoni vuovuno na mi hambesa mu muvila ua ntsitu yeni ha ku-tsa, ku mi solola vakua ku lela na cipenga cahi na ha vupayelo hahi ku meso eni.”​—Kolose 1:21, 22.

9, 10. (a) Vipanga vika via seho ya kama Kilistu ua hana ku vamuanetu va ku vuavesa? (b) Vati “vampanga veka” ve ku kuasa va ku vuavesa?

⁹ Kilistu ua hana vamuanaye va ku vuavesa ha mavu “vipanga via ku hambesa.” Paulu ua va lekele ngueni: “Viose via fuma kuli Njambi, uze na tu hambesa na ikeye ivene hali Kilistu, kaha na tu hie vipanga via ku hambesa; Muomu Njambi ua kele muli Kilistu mu ku hambesa vakua mavu na ivene, ka va tandelele vivulumuna viavo, kaha na tu kundika lizi lia ku hambesa. Ngoco vene etu tu miluua va Kilistu, ngue Njambi a li na ku lambelela hali etu: tu mi lambelela omo Kilistu, nguetu ‘lihambienu na Njambi.’”​—2 Kolintu 5:18-20.

¹⁰ Ca pua ku vezika ku “vampanga veka” ku kuasa va ku vuavesa mu cipanga ca ku ambulula. (Yoano 10:16) Mu ku pua “tunganda,” va Kilistu, “vampanga veka” va kala na mutamba ua kama mu cipanga ca ku ambulula, ku longesa vantu vusunga na ku va kuasa va likuate vusamba na Yehova. Eyi ya pua njila ya seho ya ku ambulula muzimbu ua cili ua kavumbi ka Njambi.

11, 12. Vika ue ku puila muzimbu ua cili ku vantu ku tantekeya ngecize tu hasa ku vundila kuli Yehova?

¹¹ Vantu va vengi va lema ku vundila muomu ce ku va vuisa vuino, vunoni ka va tsilielele nga Njambi ue ku halakana vivundilo viavo. Navo va na pande ku tantekeya ngecize Yehova “mukua ku ivua vivundilo.” Mukua visamo ua sonekele ngueni: “A ove mukua ku ivua vivundilo, Kuli ove ntsitu yose i keza. Vipi vi na nji hiana: Nomo vivulumuna vietu, u ka vi ecela.”​—Visamo 65:2, 3.

¹² Yesu ua longesele vandongesi veni ngueni: “Nga mu ka vundila nkala cuma mu lizina liange, cikeco nji ka ci linga.” (Yoano 14:14) Eci ca lomboloka ngecize citava tu vundile “nkala cuma” ca litombola na cizango ca Yehova. Yoano ua sonekele ngueni: “Eci cikeco ku-simpa cize ci tu li naco, ngecize nga tu vundila vimosi via litombola na cizango ceni, ikeye a ku tu ivua.” (1 Yoano 5:14) Ca pua ku vezika ku kuasa vantu va tantekeye ngecize civundilo ka ca puile njila ya ku va vuisa lika vuino houe, vunoni ca pua vukovelelo vua ku suena ku “citumamo ca kavumbi” ka Yehova! (VaHevelu 4:16) Mu tue ku longesa vantu ku vundila mu njila ya cili, na Muntu u va pande ku vundila, na viuma vi va pande ku vundila, tue ku va kuasa ku likuata vusamba na Yehova kaha ve ku uana ku simpa nga va hita mu tuyando.​—Visamo 4:1; 145:18.

13, 14. (a) Vipanga vika via cili cikuma vi va ka linga va ku vuavesa ku lutue? (b) Vipanga vika via cili cikuma va ku vuavesa tangua va ka pangela vantu?

¹³ Yehova a ka muesa kavumbi keni ka kama “mu mavu a aha.” Mu njila ika? Civunga ca 144,000 va ka sika na Kilistu muilu, eci ci ka pua cipanga ca seho ya kama. Paulu ua lomboluelele vati ci ka pua eci cipanga caco ca seho ya kama ngueni: “Njambi, omo ikeye mukua ngozi ya kama, muomu na tu leme na cilemo ceni ca kama cikuma, cipue mu tua tsile na vivulumuna vietu, na tu yoyesele hamo na Kilistu (na kavumbi mu novoka), Ua tu sanguile  hamo neni kaha na tu tumbika kumo neni muilu, muli Kilistu Yesu: linga ku zintsimbu zia ku izako a ka muese vufuko vueni vua ku hiana cikumakuma vua kavumbi keni mu ku linga ngozi netu muli Kilistu Yesu.”​—Efeso 2:4-7.

¹⁴ Ca cikalu ku ivuisisa vuino viuma via cili via viukisila Yehova Vakua Kilistu va ku vuavesa omo va ka sika na Kilistu muilu. (Luka 22:28-30; Filipu 3:20, 21; 1 Yoano 3:2) Yehova ‘a ka muesa vufuko vueni vua ku hiana cikumakuma vua kavumbi keni’ kuli vakevo mu njila ya ku lifuila. Va ka pua “Yelusalema ya iha,” ntsombolua ua Kilistu. (Ku-Solola 3:12; 17:14; 21:2, 9, 10) Va ka panga na Yesu mu “ku kanguisa vifuti.” Va ka kuasa vantu va patuke ku vundungo vua vupi na ku-tsa kaha va ka va kuasa va hete ha ku tantuluka.​—Tandenu Ku-Solola 22:1, 2, 17.

15, 16. Vati Yehova a ka muesa kavumbi keni ku “vampanga veka” ku lutue?

¹⁵ Efeso 2:7 nguauo Njambi a ka muesa kavumbi keni “zintsimbu zia ku izako.” Ku ntsimbu yaco nkala muntu ha mavu a ka limuena “vufuko vueni vua ku hiana cikumakuma vua kavumbi keni.” (Luka 18:29, 30) Yehova tangua a ka muesa kavumbi keni mu njila imo ya ku komouesa cikuma ha mavu omo a ka sangula vatsi “mu vihilo.” (Yombi 14:13-15; Yoano 5:28, 29) Veya va ka sanguka? Vamala na vampuevo vakua vuviuke va tsile tele kanda Kilistu a tse na vaze vakua civunga ca “vampanga veka” ve ku tsila mu vusunga kuli Yehova ku matangua ano a ku kotokela. Ava vantu vaco vose Yehova a ka va sangula linga va ku tualeleleho ku mu pangela.

¹⁶ Makulukazi na makulukazi a vantu va tsile ca ku hona ku tantekeya Njambi, navo naua va ka sanguka. Yoano ua sonekele ngueni: “Kaha nja muene vatsi, ava va kama na ava vandende va mene ku lutue lua citumamo ca vuangana; kaha va fukuile mukanda ueka, ukeuo ua muono: kaha va sompesele vatsi, ava va kama na ava va vandende, va mene ku lutue lua citumamo ca vuangana; kaha va fukuile mikanda: kaha va fukuile mukanda ueka, ukeuo ua muono: kaha va sompesele vatsi na vize vi va sonekele mu mikanda, ngue ku vilinga viavo.  Kaha mema a kalunga ecelele vatsi va kelemo; na ku-tsa na Vukalo vua Vatsi viecelele vatsi va kele mu vikevio: kaha vose, ku muntu ku muntu, va va sompesele ngue ku vilinga viavo.” (Ku-Solola 20:12, 13) Vaze va ka sanguka va ka kala na ntsimbu ya ku lilongesa via Yehova na ku tava masiko eni. Va ka lilongesa ku niunga vitume via Mbimbiliya na ku kava vitume via mu “mikanda.” Evi vitume via viha vi ka pua naua njila ikuavo ya ka mueselamo Yehova kavumbi keni.

17. Viuma vika ka tua pandele ku suva nga tu ya mu ku ambulula?

¹⁷ Ca pua ca seho ya kama ku ambulula muzimbu ua cili ua Vuangana, muomu ku kotoka ci li mu hiehi! (Mako 13:10) Tua pande ku vuluka ngecize vutumbe vuetu mu ku ambulula vua pua ku muesa Yehova kasingimiko. Vati tu hasa ku lingamo? Tua pande ku leka vantu va tantekeye ngecize vivezikiso viose vi tu ka litovalesa mu mavu a aha vi ka lipuisamo lika, omo lia kavumbi ka Yehova.

18, 19. Vati tue ku muesa ku santsela ca kama ku kavumbi ka Yehova?

¹⁸ Omo tu ya mu ku ambulula, tu hasa ku lomboluela vantu nguetu mu ku sika ca Vuangana vua Kilistu, vantu va ka tambula vivezikiso ku cikombelo, kaha va ka heta ha ku tantuluka kamandende-kamandende. Mbimbiliya nguayo: “Via ku tanga vi kovoka ku vundungo vua ku-tsa, vi ka kovela mu vuovoke vua vumpahu vua vana va Njambi.” (Loma 8:21) Evi vi ka lipuisamo lika omo lia kavumbi ka Yehova.

¹⁹ Tua vezika ku leka vantu via vikulaheso via ku vuaha via ku mukanda ua Ku-Solola 21:4, 5: “[Njambi ] a ka hunda masozi ose ku meso avo; na ku tsa ka ci ka ka kala naua; cipue ku-linienga na vusiua ka ci ka kala naua, cipue ku lila, cipue ku vavala viuma via ku livanga vi na hiti.” Kaha Yehova uze ua tumama ha citumamo ca vuangana ua handekele, ngueni, “Talenu, nji panga viose via viha.” Kaha ua handekele ngueni, “Soneka: muomu mezi ano akeo a cili a vusunga.” Nga tu ambulula na ntuima yose ou muzimbu ua cili ku vakuetu tu ka muesa ku santsela ca kama ku kavumbi ka Yehova!