MUE ku litumbula nguenu mu Vakua Kilistu ni? Nga mukemuo, kaha nenu mua pua umo ua vantu va heta ku 2 bilhões mu mavu ose, kampe muntu umo ha kati ka vantu vatatu ue ku litumbula mukua ku kava Kilistu. Lelo lino kua kala vitembele via vingi via Vakua Kilistu, vunoni via liseza-seza muomu vilongesa viavo vie ku liluisa kaha ve ku mona viuma mu cifua ceka. Kaha vi mua tsiliela vi hasa ku litepa cikuma na vimo vi va tsiliela vakuenu ve ku litumbula ku pua Vakua Kilistu. Vuno mua pande ku hilula vuino ha viuma vi mua tsiliela ni? Eyo, nga mu tonda Vukua Kilistu vuenu vu litombole mpundu na vize vi ye ku longesa Mbimbiliya.

Vakua ku kava Yesu Kilistu va katete va va tantekeyele ku pua “Vakua Kilistu.” (Vilinga 11:26) Ka ca tondekele va liluke mazina a ku va tantekeya nao, muomu kua kele cifua ca ku lemesa cimo lika. Vakua Kilistu va likuatele kumo mu ku kava vilongesa na vitume via Yesu Kilistu, ikeye ua tatekele Vukua Kilistu. Ku vulombelo vuenu co? Mu li na vusunga nguenu ku tembele yenu ve ku longesa via longesele Kilistu kaha vantu va tsiliela mu viuma vi va tsilielele vaze va kavele Yesu ha katete ni? Vati mu hasa ku kala na vusunga vuaco? Mu hasa lika ku lingamo mu njila imo, ku visetekesa na Mbimbiliya.

Aci singaniekenu: Yesu Kilistu ua singimikile cikuma Visoneka ua kele na ku vi mona ku pua Lizi lia Njambi.  Ikeye ka lemene vantu va kele na ku zilula vilongesa via Mbimbiliya na ku tuameka vizila viavo ni nguetu vilika via vantu. (Mako 7:9-13) Mua vusunga tu hasa ku handeka nguetu vakua ku kava Yesu mu vusunga ve ku tundisa vi va tsiliela viose mu Mbimbiliya. Ngeci nkala Mukua Kilistu na pande ku lihula ngueni, ‘Vuno vi ve ku longesa ku tembele yetu via litombola na Mbimbiliya ni?’ Linga mu hase ku kumbulula eci cihula, citava mu setekese vilongesa via ku tembele yenu na vize vi ye ku longesa Mbimbiliya ni?

Yesu ua handekele ngueni tua pande ku lemesa Njambi mu vusunga, ovu vusunga vuaco vua kala mu Mbimbiliya. (Yoano 4:24; 17:17) Kaha kapostolo Paulu ua handekele ngueni ku ovoka cetu cemana “ha ku tantekeya vusunga.” (1 Timoteo 2:4) Ca pua vusonde vua kama nga vi tua tsiliela ka via litombuele na vusunga vua mu Mbimbiliya. Muomu hakeho hemana ku ovoka cetu!

Tua mi lania mu tande vihula 6 vi na hatako, kaha talenu vati Mbimbiliya ya kumbulula vihula viaco. Talenu mikanda ya Mbimbiliya i va na hakaho na ku hilula ha vikumbulula viaco. Kaha lihulenu, ‘Vati vilongesa via ku tembele yange via fua ku vi seteka na vi ya handeka Mbimbiliya?’

Ku hilula ha vihula vino ci hasa ku mi kuasa ku setekesa vi mua tsiliela na vi ya longesa Mbimbiliya. Muli na cizango ca ku setekesa vilongesa vikuavo via ku tembele yenu na vi ya longesa Mbimbiliya ni? Vakaleho va Yehova va ka viukilila cikuma ku mi kuasa ku hilula mpundu ha vusunga vua Mbimbiliya. Mu hasa ku lomba cilongesa ca Mbimbliya ca vuana. Ni citava mu kovele mu site yetu, jw.org.