Mbimbiliya ka ya longesele ngecize nkala muntu ua kala na kangelo ue ku mu niunga. Vutuhu Yesu ua handekele ngueni: “Talenu kati mu yengule umosi ua ava va vandende: muomu nji ku mi leka, nguange, Tungelo tuavo muilu ntsimbu yose va li na ku tala-tala cihanga ca Tata u li muilu.” (Mateo 18:10) Vunoni Yesu ka muesele ngecize nkala muntu ua kala na kangelo keni ue ku mu niunga houe, ua tondele lika ku lombolola ngueni tungelo va haka seho ku nkala muntu ue ku pua ndongesi ya Yesu. Ngeci mukemuo, Vakua Kilistu va vusunga ka ve ku lihaka ngoco mu viuma vie ku koka vimponde, na ku lavelela ngecize tungelo va Njambi va ka vohiela.

Vuno eci ca lomboloka ngecize tungelo ka ve ku kuasa vantu ni? Houe. (Visamo 91:11) Vamo va tsiliela ngecize Njambi ua va hana tungelo ve ku va niunga na ku va tuamenena. Umo ue ku ivua ngoco ua pua uze Kenneth u tu na tumbuile mu cimpande ca ku livanga. Vutuhu ka tuesi na vusunga vua ku sula ngandza, halumo a li na vusunga. Vakaleho va Yehova ve ku mona viuma vie ku va lingisa ku tava ngecize tungelo ve ku va kuasa mu cipanga cavo ca ku ambulula. Vunoni, mu ku linga ka tu hasa ku mona tungelo, ka tu tantekeya mpundu vukuasi vungahi tungelo ve ku hana vantu mu vintsimbu via ku liseza-seza. Vunoni ka tua pandele ku sevuka mu ku likela ku sangala Njambi Mukua Ngolo yose omo lia vukuasi vue ku tu hana.​—Kolose 3:15; Tiango 1:17, 18.