Nja semukila mu mbonge ya indende ya Saxony, mu cifuti ci va tumbuile laza nguavo República Democrática Alemã (RDA). Tua yoyele mu ndzolela na cilemo ha ndzivo yetu, kaha visemi va nji longesele ku kala na vilinga via cili. RDA ya kele na pulitika ya Komunizimu, ngeci mukemuo cingi ca vantu va kele mu Saxony, vulombelo ka vua kele na seho. Kaha kuli yange, Njambi ka keleko. Tunde ku vunike noho nja puisile miaka 18, vilongesa vivali via nji kovelele cikuma: Ateizimu (ku viana ngecize Njambi ka keleko) na Komunizimu (ku tava ngecize vantu va pua hamo).

Omo lia vika Komunizimu ya nji ile ku mutima? Muomu nja lemene cilongesa cayo ca muesa ngecize vantu vose va pua hamo. Cikuavo naua, kuli yange vupite vuose vua pandele ku vu tepela ku vantu mu ku puisa hamo, muomu ku lingamo nga ca manusula vuhutu. Ngeci nja likovelesele mu cimo civunga ca vakuendze vakua ku hakuila Komunizimu. Mu nja kele na miaka 14, nja pangesele ntsimbu ya kama ku cipanga ca ku tua mapapelo a laza ku a puisa a aha. Vakua mbonge ya indende ya Aue va lemene cikuma vipanga viange, ngeci vakua nguvulu va nji lunguisile. Vutuhu tele nji kanike, nja tantekeyele vamo vantuamena va ku tsimana va pulitika ya RDA. Nja muene ngecize nji li na ku puisamo vizango via cili kaha muono uange u kenda vuino ku lutue.

Vunoni viose vi nja kele na ku linga via hungumukile na muta. Mu muaka ua 1989, Civumbe ca Berlin ca uile hamo lika na Komunizimu, ku Cihava ca Europa. Nja lisimuokele via vingi. Ca ku livanga nja tantekeyele ngecize vakua RDA navo nkuma va kele na ku linga vuhenge. Ca ku muenako, vose ka va hakuilile Komunizimu va va puisile ngue vilinge via ngoco. Mu njila ika? Etu vakua Komunizimu tua tsilielele nguetu vantu vose va pua hamo, kaha omo lia vika vamo tua va puisile ngue vilinge via ngoco? Komunizimu ka ya puisilemo vi ya likuminia. Ku tantekeya evi ca nji umisile cikuma mutima.

Ngeci nja likelele via Komunizimu na ku likovelesa mu miaso na ku soneka vifikula. Mu ku linga nja kele na ku lilongesela ha sikola ya miaso, kaha tele nji lingila ku ya ku Sikola ya Kama, nja tondele ku ka pua mukua miaso na mukua vifikula. Cikuavo naua nja mbilile vilongesa via cili vi nja lilongesele ku vunike. Kaha nja tualele mana ose ku senga na ku kala na mapangala va  vengi. Vunoni miaso, vifikula na vupangala ka via tepuluile ku lisosomua cange. Muomu ambe vikupulo vi nja kele na ku soneka viose via muesele lika vuoma vu nja kele na ku ivua. Nja kele na vihula ngeci mua: Vika vi ka soloka ku lutue? Kaha vutumbe vua muono vuka?

Mu nja uanene vikumbululo via vihula vi nja kele na ku tonda, nja komokele cikuma. Tangua limo ku cinguezi, nja tumamene hamo ha civunga ca vandongesi va ha sikola yetu mu ku simutuila via ku lutue. Kaha ha kele umo ndongesi lizina lieni Mandy *, ua puile Mukaleho ua Yehova. Ua nji hanene cimamuna ca cili ku cinguezi cize. Ngueni “Andreas, nga u tonda vikumbululo ku tuala ha muono na via ku lutue, ya u ka tande vuino Mbimbiliya.”

Vutuhu nja vi sembuluile nja tondele ku ka talamo. Mandy ua nji lekele via kapitulu 2 ka livulu lia Ndaniele, vi nja tandelemo via nji komouesele cikuma. Vupolofeto vuaco vua lombolola cingi ca vamiangana va mavu ose, ni nguetu vanguvulu vaze va tsimana ku matangua ano. Mandy ua nji lekesele naua vupolofeto vukuavo vua mu Mbimbiliya vua ku lutue. Amba vuose nja putukile ku uana vikumbululo via vihula viange! Vunoni nja lihulile nguange: ‘Iya ua sonekele vuze vupolofeto vua handekele via ku lutue ca ku hona ku sevuka? Nji mona Njambi kua kala ni vati? Nji ya honi na ku tavuluka ha meso.’

Mandy ua nji tualele kuli muanetu Horst na mpueyeni, vaze va nji kuasele ku ivuisisa Mbimbiliya. Mu ntsimbu ya indende nja tantekeyele ngecize vulombelo vua Vakeleho va Yehova vukevuo lika vue ku pangesa Mbimbiliya mu ku tsimanesa lizina lia Njambi Yehova. (Visa. 83:18; Mat. 6:9) Nja lilongesele ngecize Yehova Njambi ua hanene ku vantu lulavelelo lua ku ka yoya miaka yose mu citungu. Visamo 37: 9 nguayo: “Vaze va tumamena Yehova, va ka suana cifuti.” Nja lemene ku tantekeya ngecize lulavelelo lua ku ka yoya miaka yose ku lutue, va lu hana vantu vose.

Vunoni ca nji kaluuilile cikuma ku alulula cifua ca muono uange linga u litombole na Mbimbiliya. Ku tsimana omo lia ku imba miaso na ku soneka vifikula via nji lingisile ku livua ngue cindzunda ha litemo, ngeci cifua ca katete ci nja pandele ku lilongesa, ku likehesa. Kaha naua nja lifuitile mu ku likela via vupangala. Nja santsela cikuma kuli Yehova mu ku muesa ntsintsa, cikeketima, na ku ivuisisa vaze ve ku lihakela kapandi ka ku yoya mua ya vitume via Mbimbiliya!

Komunizimu na ku viana Njambi via puile vilongesa via nji kovelele cikuma tunde ku vunike vuange na ku heta ha miaka 18, vunoni Mbimbiliya i na alulula muono uange. Vi nja lilongesamo via manusula ku lisosomua cange ku tuala ha viuma via ku lutue. Mu 1993 va nji mbatizile ku pua mukaleho ua Yehova, kaha mu 2000 nja ambatele Tabitha, umo ndokazi ua ntuima mu ku pangela Njambi. Tue ku pangesa ntsimbu ya yingi mu ku kuasa vakuetu va tantekeye Mbimbiliya. Cingi ca vantu va tua kele na ku uana va fuile ngeci muange laza, vakua ku viana Njambi na ku hakuila Komunizimu. Ngeci nje ku ivua ndzolela ya kama mu nje ku va muesa vati va hasa ku tantekeya Yehova.

Mu nja putukile ku likata na Vakaleho va Yehova, visemi vange va vatukile ku mitima. Vunoni tunde haze va putuka ku mona vati ku likata na Vakaleho ca sungamesele lueka muono uange. Matangua ano ce ku nji vuisa ndzolela ku mona ngecize va na putuka ku tanda Mbimbiliya kaha ve ku kunguluka

Vulo vuetu na Tabitha vue ku tu tovala cikuma muomu tue ku lihakela kapandi ka ku kava vimamuna vi ya hana Mbimbiliya kuli vaze va liambata. Ca ku muenako, ku niunga citume cayo ku tuala ha vupangala ce ku kaniamesa vulo vuetu.​—VaHevelu 13:4.

Ka nja kele naua na vuoma vua muono ni ku lisosomua via ku lutue. Muomu nja kovela ku vusoko vua mu mavu ose vua vamuanetu va mu lutsilielo, vuze vua kala mu ciyulo na ku pangela hamo lika. Mu vusoko vuaco ka mua kele na umo ua hiana vakuavo uahi, tu vose tua pua hamo. Evi vikevio nja tsiliela tunde ku vunike, kaha vikevio vi nja fuitangana ku tonda mu muono uange uose.