Tangua limo, lia Calumingu, ku cinguezi, Keneth na Filomena va ku cifuti ca Curaçao va ile mu ku mona umo mpuevo na yalieni va va kele na ku longesa Mbimbiliya.

Kenneth ngueni, “Mu tua hetele tua uanene mbelo ya ku pata kaha likalu liahiko. Vunoni mutima uange ka ua tavele ku hiluka ngoco, ngeci nja sanene mpuevo ku telefone.”

Mpuevo ua tavele telefone na ku lombolola ngueni yalieni ali ku vipanga. Vunoni mua vuile ngecize va Kenneth na Filomena va li ha mbandza, uezile mu ku va sokoluela mbelo.

Kaha va muene ngecize na kala na ku lila. Omo Kenneth ua vundilile linga va putuke cilongesa ca Mbimbiliya uze mpuevo ua putukile naua ku lila. Ngeci va mu hulile vika ua kele na ku lila.

Ngeci ua lomboluele ngueni ua tondele ku litsiha ha ntsimbu ize vene, kaha tele ali na ku soneka mukanda ua ku sika yalieni, vunoni omo ua vuile telefone i sana ua likelele. Ua va lekele ngueni ua vavala litima, ngeci va mu lembeziekele na vimo vinimbu via mu Mbimbiliya. Ku kaniamesa ca tambuile covuele muono ueni.

Kenneth ua handekele ngueni “Tua santselele Yehova mu ku tu kuatesa linga tu hase ku kuasa uze mpuevo, cikumakuma mu ku tu tuamenena​—halumo ku hitila mu kangelo ni sipilitu santu yeni—​linga tu sane uze mpuevo ku telefone!” *

Vuno va Kenneth na Filomena va kele na vusunga vua ku tsiliela ngecize njambi ua va kuasele, cipue ku hitila mu kangelo ni mu sipilitu santu yeni ni? Ni ku sana uze mpuevo ku telefone ca puile ku litombola ca ngoco?

Ka tuesi na vusunga mpundu. Vunoni tua tantekeya ngecize Njambi ue ku pangesa tungelo veni mu ku kuasa vantu mu lutsilielo. Ca ku muenako, Mbimbiliya ya muesa ngecize Njambi ua pangesele kangelo mu ku tuamenena Filipe umo mukua ku ambulula linga a ka kuase umo yala ua ku Etiopia ua tondele vukuasi vua mu lutsilielo.​—Vilinga 8:26-31.

Malombelo a engi e ku longesa ngecize kua kala vimbembesi va ngolo ya kama, vamo va pua va cili kaha ve ku puisamo cizango ca Njambi vakuavo vakua ku niunga muntu ku muntu. Vavengi va tsiliela ngecize tungelo ku va kala kaha va kala na ngolo hali vakevo. Vunoni kasi kuli vantu va vengi ka va tsilielele mu tungelo.

Vuno tungelo ku va kala mpundu? Nga mukemuo, va tunda kulihi? Vusunga vuka vua kalako ku tuala ha tungelo? Kuli vimo vi va hasa ku linga mu muono uenu ni? Tu ci hilulenu evi vihula.