Mbimbiliya ya muesa nguayo linga va puisemo cizango ca Njambi, mu vintsimbu vimo, tungelo ve ku ohiela vakua ku lemesa va vusunga. (Visamo 34:7) Tu ci talenu ha vimueso vi na hatako:

• Yehova mua nongesele membo a api a Sondoma na Ngomola, tungelo va kuatesele mukua vuviuke Lote na vusoko vueni linga va tuhukemo vuasi-vuasi.​—Njenisisi 19:1, 15-26.

• Ku Mbambilone ya laza omo vakuendze vatatu va vaHevelu va va hele kasitiku mu ku va mbila mu lutengo lua tuhia, Njambi ua tumine “kangelo keni na ku ohiela [vaze] vakuamanda veni.”​—Ndaniele 3:19-28.

• Ndaniele mu nima ya ku kosa vutsiki vuose mu cipuku ca vandumba, ikeye mpundu ua handekele ngueni ka va mu lile muomu Njambi “na tumu kangelo keni, kaha na fuika tunua tua vandumba.”​—Ndaniele 6:16, 22.

Mu vintsimbu vimo, tungelo va Njambi navo va hakele seho ya kama ku viuma vi va kele na ku linga Vakua Kilistu va katete, cikumakuma nga ku lingamo ce ku puisilemo cimo cizango ca Njambi. Ca ku muenako:

• Umo kangelo ua sokoluele mapito a kamenga na ku leka vapostolo va kelemo va tuhuke linga va ka tualeleleho ku ambuluila mu tembele.​—Vilinga 5:17-21.

• Umo kangelo ua lekele mukua ku ambulula Filipu ku ya ku imo njila ya tundile ku Yelusalema ku ya ku Ngaza, kaha na ku ka ambuluilako umo kaEtiopia ua ile mu ku ka lemesela ku Yelusalema.​—Vilinga 8:26-33.

• Mu ya hetele ntsimbu ya Njambi ku tavesa vakua vifuti linga navo va pue Vakua Kilistu, umo kangelo ua solokele kuli ntuamena ya masualale va ku Loma ua ku luka Koloneliu mu cimona na ku mu leka a ka lanie Petulu ku ndzivo yeni.​—Vilinga 10:3-5.

• Petulu mua kele mu kamenga, umo kangelo ua mu solokelele na ku mu tuhulamo.​—Vilinga 12:1-11.

Ka kuesi vukaleho na vumo vuahi vua muesa ngecize Njambi matangua ano ue ku pangesa tungelo mu ku kuasa vantu ku hitila mu vikomoueso ngue mua lingile laza. Vunoni, Yesu ua handekele viuma vi li na ku soloka ku matangua ano ngueni: “Zimpande ezi vene zia cili zia vuangana va ka zi ambulula ku vifuti viose, zi ka pua vukaleho vua kuli vakua vifuti viose; amba vuose ku-kotoka ca mavu ci keza.” (Mateo 24:14) Mu tantekeya ngecize Vakua Kilistu lelo lino va li na ku linga eci cipanga na vukuasi vua tungelo ni?

Livulu lia Ku-Solola lia muesa ngecize tungelo ve ku fuitangana mu ku kuasa vantu mu mavu ose, va lilongese via Yehova Njambi na vutumbe vueni ku vantu. Kapostolo Yoano ua sonekele ngueni: “Nja muene kangelo ueka ua ku pulula ha kati ka lilu, ikeye ua kele na zimpande zia cili ka zie ku hua zia yaye zia ku zimbuila vaze va kala hano ha mavu, na vifuti viose, na miyati yose na malimi ose na vantu vose: Kaha ikeye ua handekele na lizi lia kama, ngueni, Ivuenu vuoma kuli Njambi, mu zumbangeyenu; muomu ola ya ku-sompela ceni i na heta: kaha lemesenu uze ua tangele lilu na mavu na mema a kalunga na zindundzi zia mema.” (Ku-Solola 14:6, 7) Viuma vi ve ku lihita navio vantu lelo, via pua vukaleho vua muesa ngecize tungelo ve ku kuasa cipanga ca ku ambulula muzimbu ua Vuangana mu mavu ose. Mua vusunga, nga umo mukua vupi a liveya na ku hiluka kuli Yehova, “ku ka kala ndzolela ku meso a tungelo va Njambi.”​—Luka 15:10.

Vika vi kezako omo cipanga ca ku ambulula ci ka hua? “Zimbunga zia masualale zi li muilu” zi ka kuasa Yesu Kilistu, uze Muangana ua vamiangana, mu ku ka lua “ndzita ya litangua lia kama lia Njambi, Mukua ngolo yose” ya Alemangendo. (Ku-Solola 16:14-16; 19:14-16) Tungelo va ngolo vakevo va ka puisamo vihiso via Njambi omo Muangana Yesu a ka “linguila ava . . . ka va tamunuka ku zimpande zia cili zia Muangana uetu Yesu.”​—2 Tesalonika 1:7, 8.

Ngeci mukemuo, kalenu na vusunga ngecize tungelo va tu haka seho muntu ku muntu mpundu. Va haka seho ya kama ku kakesi ka vaze va kala na cizango ca ku pangela Njambi, kaha Yehova mu vintsimbu via vingi ua pangesele ava tungelo mu ku kaniamesa na ku ohiela vangamba veni ha mavu.​—VaHevelu 1:14.

Ngeci mukemuo, tu vose tua kala na cimo cihangula ci tua pande ku linga: ku halakana na ku ononoka muzimbu u va li na ku ambuluila mu mavu ose ni kuahi. Mu tonda ku u ononoka ni? Vakaleho va Yehova muimbo lienu va kevua ndzolela ya ku mi kuasa ku tambula vukuasi ku cipanga ci va li na ku linga tungelo va Njambi.