Ngeci mua Njambi ua pua Sipilitu, tungelo navo va pua sipilitu kaha ka tu hasa ku va mona muomu ka va kele na mivila ya “ntsitu na vitsiha.” Tungelo va ku ononoka va kala muilu kaha va va tavesa ku soloka ku meso a Njambi.​—Luka 24:39; Mateo 18:10; Yoano 4:24.

Tungelo vintsimbu vimo va lisoluele na mivila ya vuntu linga va puisemo vimo via va tumine Njambi ha mavu, kaha mu nima ya ku manusula vipanga viaco va zalele naua muvila ua vungelo.​—Vangazi 6:11-23; 13:15-20.

Vutuhu tungelo va va tumbula ku pua vamala mu Mbimbiliya, kaha va kele na ku lisolola mu cifua ca vumala, vunoni ku tungelo ka kua kele ku tepesa ca vamala na vampuevo. Ka ve ku liambata ni ku sema tungelo vakuavo. Cikuavo naua, tungelo ka va puile vantu va laza​—cipue mu cifua ca vukeke, vunike ni vukuluntu, houe. Tungelo va va tangele kuli Yehova; ngeci Mbimbiliya ya va tumbula nguayo, “vana va Njambi.”​—Yombi 1:6; Visamo 148:2, 5.

Mbimbiliya ya handeka via “malimi a vantu na aa a tungelo,” mu ku muesa ngecize tungelo va kala na lilimi li ve ku handeka. Vutuhu Njambi ua tumine tungelo mu ku handeka na vantu, vunoni ke ku tu tavesa tu va lemese ni ku vundila kuli vakevo.​—1 Kolintu 13:1; Ku-Solola 22:8, 9

Tungelo va pua va vengi cikumakuma, va pua makulukazi na makulukazi. *​—Ndaniele 7:10; Ku-Solola 5:11.

Tungelo va pua “vakua ku hiana ngolo”​—ngolo ya kama-kama vene ku hiana vantu kaha va kala na mana ku hiana vantu. Kaha ve ku pulula na vuasi vua ku komouesa, vuasi vua mu sipilitu ku hiana vuasi vua viuma vi tue ku mona na meso.​—Visamo 103:20; Ndaniele 9:20-23.

Vutuhu va kala na mana a ku hiana na ngolo ya kama, kua kala vimo viuma ka va tantekeya.​—Mateo 24:36; 1 Petulu 1:12.

Tungelo va va tangele na vifua via ku liseza-seza via vungelo, vifua via cili, kaha na vuana vua ku lihanguila viuma. Vunoni ca vusiua, vamo tungelo va hanguile ku muesa lisino kuli Njambi.​—Yunda 6.